ବର୍ଷିଲେ ଗୃହମନ୍ତ୍ରୀ, ହିଂସାର ପଥ ଛାଡି ଶାନ୍ତି ଏବଂ ବିକାଶର ପଥ ବାଛନ୍ତୁ: ଅମିତ ଶାହ

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପୁଣି ଥରେ ଘୋଷଣା କରିଛନ୍ତି ଯେ 31 ମାର୍ଚ୍ଚ, 2026 ସୁଦ୍ଧା ଦେଶରୁ ନକ୍ସଲବାଦ ମୂଳୋତ୍ପାଟନ କରାଯିବ । ସେ ନକ୍ସଲବାଦୀମାନଙ୍କୁ ହିଂସାର ପଥ ଛାଡି ଶାନ୍ତି ଏବଂ ବିକାଶର ପଥ ବାଛିବାକୁ ମଧ୍ୟ ନିବେଦନ କରିଛନ୍ତି ।

ଶନିବାର ଛତିଶଗଡ଼ର ସୁକମା ଜିଲ୍ଲାରେ ସୁରକ୍ଷା ବାହିନୀର ଏକ ଅପରେସନରେ ୧୬ ଜଣ ନକ୍ସଲ ନିହତ ହେବା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହାକୁ ୩୧ ମାର୍ଚ୍ଚ, ୨୦୨୬ ପୂର୍ବରୁ ନକ୍ସଲବାଦ ସମାପ୍ତ କରିବା ପାଇଁ ସରକାରଙ୍କ ସଂକଳ୍ପର ଏକ ଅଂଶ ବୋଲି କହିଛନ୍ତି ।

ଅମିତ ଶାହଙ୍କ ଟ୍ବିଟ- ସୁକମାରେ ସୁରକ୍ଷା ଏଜେନ୍ସିଗୁଡ଼ିକର ଅପରେସନ୍ ବିଷୟରେ ସୂଚନା ଦେଇ ଗୃହମନ୍ତ୍ରୀ ଅମିତ ଶାହ ଟ୍ୱିଟ୍ କରିଛନ୍ତି, “ନକ୍ସଲବାଦକୁ ଆଉ ଏକ ଝଟକା! ଆମର ସୁରକ୍ଷା ଏଜେନ୍ସିଗୁଡ଼ିକ ସୁକମାରେ ଏକ ଅପରେସନରେ 16 ଜଣ ନକ୍ସଲଙ୍କୁ ହତ୍ୟା କରିଛନ୍ତି ଏବଂ ଏକ ବଡ଼ ପରିମାଣର ସ୍ୱୟଂଚାଳିତ ଅସ୍ତ୍ରଶସ୍ତ୍ର ଉଦ୍ଧାର କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ, ଆମେ 31 ମାର୍ଚ୍ଚ 2026 ପୂର୍ବରୁ ନକ୍ସଲବାଦକୁ ସମାପ୍ତ କରିବାକୁ ସଂକଳ୍ପବଦ୍ଧ । ଯେଉଁମାନେ ଅସ୍ତ୍ର ଧରିଛନ୍ତି ସେମାନଙ୍କୁ ମୋର ନିବେଦନ ଯେ ଅସ୍ତ୍ରଶସ୍ତ୍ର ଏବଂ ହିଂସା ମାଧ୍ୟମରେ ପରିବର୍ତ୍ତନ ଆସିପାରିବ ନାହିଁ; କେବଳ ଶାନ୍ତି ଏବଂ ବିକାଶ ହିଁ ପରିବର୍ତ୍ତନ ଆଣିପାରିବ।”

ସୁରକ୍ଷା ବାହିନୀ ଏନକାଉଣ୍ଟର ସ୍ଥଳରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଜବତ କରିଛନ୍ତି, ଯେଉଁଥିରେ AK-47, SLR, INSAS ରାଇଫଲ୍, ପଏଣ୍ଟ 303 ରାଇଫଲ୍, ରକେଟ୍ ଲଞ୍ଚର୍, BGL ଲଞ୍ଚର୍ ଏବଂ ବିସ୍ଫୋରକ ସାମଗ୍ରୀ ଅନ୍ତର୍ଭୁକ୍ତ । ଏନକାଉଣ୍ଟରରେ ନିହତ ନକ୍ସଲମାନଙ୍କୁ ଚିହ୍ନଟ କରାଯାଉଛି, ଏବଂ ସୁରକ୍ଷା ବାହିନୀ ଏହି ଅପରେସନରେ ଆହୁରି ନକ୍ସଲ ନିହତ କିମ୍ବା ଆହତ ହେବାର ସମ୍ଭାବନା ପ୍ରକାଶ କରିଛନ୍ତି । ଏହି ଅପରେସନ ସମୟରେ, ଦୁଇଜଣ DRG ସୈନିକ ଆହତ ହୋଇଥିଲେ । ଆହତ ସୈନିକଙ୍କ ଅବସ୍ଥା ସ୍ୱାଭାବିକ ଏବଂ ସେମାନେ ବିପଦ ବାହାରେ ଅଛନ୍ତି ବୋଲି କୁହାଯାଉଛି ।