ଅଭିନେତ୍ରୀ ସ୍ୱରା ଭାସ୍କରଙ୍କ ସ୍ୱାମୀଙ୍କୁ ପ୍ରାର୍ଥୀ କଲା ଏନସିପି (ସରଦ ପାୱାର) ପାର୍ଟି
ମୁମ୍ବାଇ: ମହାରାଷ୍ଟ୍ର ନିର୍ବାଚନ ପାଇଁ ସବୁ ଦଳ ନିଜ ନିଜ ପ୍ରାର୍ଥୀଙ୍କ ନାଁ ଘୋଷଣା କରୁଛନ୍ତି । ଆଜି ଏନସିପି (ସରଦ) ଗୋଷ୍ଠୀ ପକ୍ଷରୁ ତୃତୀୟ ତାଲିକା ଜାରି କରାଯାଇଛି । ଏହି ତାଲିକାରେ ୯ ଜଣଙ୍କ ନାଁ ସାମ୍ନାକୁ ଆସିଥିବା ବେଳେ ତିନୋଟି ତାଲିକା ମାଧ୍ୟମରେ ଦଳ ତାର ୭୬ ଆସନ ପାଇଁ ପ୍ରାର୍ଥୀଙ୍କ ନାଁ ପ୍ରକାଶ କରିସାରିଛି । ତୃତୀୟ ତାଲିକା ମୁତାବକ କରଞ୍ଜା ସିଟରୁ ଜ୍ଞାୟକ ପଟଣୀ, ହିଙ୍ଗଣଘାନରୁ ଅତୁଲ ବାନ୍ଦିଲେ, ହିଙ୍ଗଣାରୁ ରମେଶ ବଂଙ୍ଗ, ଅଣୁଶକ୍ତିନଗରରୁ ଫହାଦ ଅହମଦ, ଚିଞ୍ଚବଡରୁ ରାହୁଲ କଲାଟେ, ଭୋସରିରୁ ଅଜିତ ଗବ୍ହାଣେ, ମାଝଲଗାବରୁ ମୋହନ ବାଜିରାବ ଜଗତାପ, ପରଲିରୁ ରାଜେସାହେବ ଦେଶମୁଖ ଓ ମୋହୋଲରୁ ସିଦ୍ଧି ରମେଶ କଦମଙ୍କୁ ଦଳ ପ୍ରାର୍ଥୀ କରିଛି ।
ଅଣୁଶକ୍ତିନଗର ପ୍ରାର୍ଥୀ ଫହାଦ ଅହମଦ ହେଉଛନ୍ତି ଅଭିନେତ୍ରୀ ସ୍ୱରା ଭାସ୍କରଙ୍କ ସ୍ୱାମୀ । ଫହାଦ ରବିବାର ଦିନ ସମାଜବାଦୀ ପାର୍ଟି ଛାଡି ଏନସିପି (ସରଦ) ଗୋଷ୍ଠୀରେ ସାମିଲ ହୋଇଥିଲେ । ଫହାଦ ଦଳରେ ସାମିଲ ହେବା ପରେ ଦଳୀୟ ନେତା ଜୟନ୍ତ ପାଟିଲ ଘୋଷଣା କରିଥିଲେ କି, ସମାଜବାଦୀ ନେତା ଓ ଅଭିନେତ୍ରୀ ସ୍ୱରା ଭାସ୍କରଙ୍କ ସ୍ୱାମୀ ଫହାଦ ଅହମଦ ଏନସିପି-ଏନସିପିରେ ସାମିଲ ହୋଇଛନ୍ତି । ତାଙୁ ଏନସିପି (ଅଜିତ ପାୱାର)ଙ୍କ ସନା ମଲିକଙ୍କ ବିରୋଧରେ ଅଣୁଶକ୍ତି ନଗରରୁ ପ୍ରାର୍ଥୀ କରାଯାଇଛି ।
ଜୟନ୍ତ ଆଗକୁ ଫହାଦଙ୍କ ପ୍ରଶଂସାରେ କହିଥିଲେ କି, ଫହାଦ ଅହମଦ ଜଣେ ସୁଶିକ୍ଷିତ ୟୁବ ମୁସଲିମ । ସେ ଦେଶବ୍ୟାପୀ କର୍ମକର୍ତ୍ତା ବାବେ କାମ କରିଛନ୍ତି । ଲୋକ ଚାହୁଁଛନ୍ତି, ଆମେ ଏମିତି ବ୍ୟକ୍ତିବିଶେଷଙ୍କୁ ପ୍ରାର୍ଥୀ କରୁ । ସେ ଆଗରୁ ସମାଜବାଦୀ ପାର୍ଟିରେ ଥିଲେ । ଆମେ ତାଙ୍କ ସହ ଆଲୋଚନା କରିବା ପରେ ସେ ଆମ ସହ ସାମିଲ ହୋଇଛନ୍ତି ।
