‘ଶନିବାର ଏବଂ ରବିବାର ଛୁଟି ଏକ ଭାରତୀୟ ପରମ୍ପରା ନୁହେଁ’, ଲୋକଙ୍କ ଟାର୍ଗେଟକୁ ଆସିଲେ OLA ସିଇଓ
ନୂଆଦିଲ୍ଲୀ: ଇୱାଇ ଇଣ୍ଡିଆ ଏବଂ ବଜାଜ ଫାଇନାନ୍ସ ଭଳି କମ୍ପାନୀ ବର୍ତ୍ତମାନ ନିଜ ୱାର୍କ କଲ୍ଚରକୁ ନେଇ ଲୋକଙ୍କ ଟାର୍ଗେଟରେ ଅଛନ୍ତି। ଇୱାଇ ଇଣ୍ଡିଆର କର୍ମଚାରୀ ଏନା ସେବାଷ୍ଟିନ ପେରାଇଲଙ୍କ ମାଆ ଅନୀତା ଅଗଷ୍ଟାଇନ ନିଜ ଝିଅଙ୍କ ମୃତ୍ୟୁ ପାଇଁ କମ୍ପାନୀ ଦ୍ୱାରା କାମର ଅଧିକ ପ୍ରେସର ଦେବା କଥା କହିଥିଲେ। ସେହିପରି ବଜାଜ ଫାଇନାନ୍ସ ପାଇଁ କାମ କରୁଥିବା ତରୁନ ସାକ୍ସେନା କାର୍ଯ୍ୟ ଭାରି ପାଇଁ ଆତ୍ମହତ୍ୟା କରିଥିଲେ। ଏହି ଘଟଣା ୱାର୍କ ଲାଇଫ ବାଲାନ୍ସକୁ ନେଇ ବିତର୍କ ଆରମ୍ଭ କରିଛି।
ଏହି ସମୟରେ ଓଲାର ସିଇଓ ଭବିଷ ଅଗ୍ରୱାଲଙ୍କ ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ସେ ଶନିବାର ଏବଂ ରବିବାର ଛୁଟି ବିରୋଧରେ କହିଛନ୍ତି। ଏହାକୁ ନେଇ ବର୍ତ୍ତମାନ ସୋସିଆଲ ମିଡିଆରେ ଖୁବ ଆଲୋଚନା ହେଉଛି।
ଏହି ଭାଇରାଲ ଭିଡିଓରେ ଭବିଷ ଅଗ୍ରୱାଲ କହିଛନ୍ତି ଯେ, ସେ କାର୍ଯ୍ୟ ଜୀବନ ସନ୍ତୁଳନର ଆଧୁନିକ ଚିନ୍ତାଧାରାକୁ ସଠିକ୍ ମନେ କରନ୍ତି ନାହିଁ। ଶନିବାର ଏବଂ ରବିବାର ଛୁଟି ଏକ ଭାରତୀୟ ପରମ୍ପରା ନୁହେଁ। ଏହା ପାଶ୍ଚାତ୍ୟ ସଭ୍ୟତାର ଏକ ଅଂଶ। ଏହାପୂର୍ବରୁ ଆମ ଦେଶରେ ଶନିବାର ଏବଂ ରବିବାର ଛୁଟି ନଥିଲା । ଆମର କ୍ୟାଲେଣ୍ଡର ମଧ୍ୟ ଭିନ୍ନ ଥିଲା। ଏହି ଆଧାରରେ, ଆମେ ଛୁଟି ନେଇଥାଉ, ଯାହା ପ୍ରତି ମାସରେ ଥରେ କିମ୍ବା ଦୁଇଥର। ଶିଳ୍ପ ବିପ୍ଳବ ପରେ ସାପ୍ତାହିକ ଛୁଟି ଆମ ସଂସ୍କୃତିରେ ଆସିଥିଲା, ତଥାପି, ଆଧୁନିକ ଯୁଗରେ ଏହା ଆଉ ଆବଶ୍ୟକ ନୁହେଁ। ଯଦି ଆମେ କିଛି ଦଶନ୍ଧି ପଛକୁ ଦେଖିବା, ଆମେ ପାଇବୁ ଯେ ଲୋକମାନେ ସପ୍ତାହରେ ୫ ଦିନ କାମ କରିବା ପରେ ଛୁଟି ମାଗି ନାହାଁନ୍ତି।
ଓଲା ସିଇଓଙ୍କ ଏହି ଚିନ୍ତାଧାରା ସୋସିଆଲ ମିଡିଆରେ ବିଲକୁଲ ପସନ୍ଦ କରୁନାହାନ୍ତି। ନିଜର ନିରାଶ ବ୍ୟକ୍ତ କରି ଲୋକେ ମନ୍ତବ୍ୟ ଦେଇଛନ୍ତି ଯେ, ସେ ପାଶ୍ଚାତ୍ୟ ଭାଷା କୁହନ୍ତି। ପାଶ୍ଚାତ୍ୟ ପୋଷାକ ପିନ୍ଧନ୍ତି। ପାଶ୍ଚାତ୍ୟ ଟେକ୍ନୋଲୋଜି ବ୍ୟବହାର କରନ୍ତି। ଏଭଳି ଲୋକଙ୍କ କାରଣରୁ ଆମେ ବିକାଶ କରିପାରୁ ନାହୁଁ। ସେମାନେ ରୋବଟ୍ ଚାହୁଁଛନ୍ତି ଏବଂ ଆମେ ମଣିଷ ଅଟୁ।
