ବଢୁଥିବା କୋଭିଡ-୧୯ ଓ ଇନ୍ଫ୍ଲୁଏଞ୍ଜା ପାଇଁ ଜନ ସ୍ୱାସ୍ଥ୍ୟ ମୁକାବିଲା ସ୍ଥିତି ଓ ପ୍ରସ୍ତୁତି ସମୀକ୍ଷା କଲେ ପ୍ରଧାନମନ୍ତ୍ରୀ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଏକ ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରିବା ସହିତ ଦେଶରେ କୋଭିଡ-୧୯ ଏବଂ ଇନଫ୍ଲୁଏଞ୍ଜାର ସ୍ଥିତି ଅନୁଧ୍ୟାନ କରିଛନ୍ତି। ପ୍ରଧାନମନ୍ତ୍ରୀ ଏହି ବୈଠକରେ ସ୍ୱାସ୍ଥ୍ୟ ଭିତ୍ତିଭୂମି ଓ ଲଜିଷ୍ଟିକ୍ସର ପ୍ରସ୍ତୁତି, ଟିକାକରଣ ଅଭିଯାନର ସ୍ଥିତି, ନୂଆ କୋଭିଡ-୧୯ ଭେରିଏଣ୍ଟ ଓ ଇନଫ୍ଲୁଏଞ୍ଜା ବା ସର୍ଦ୍ଦିରୋଗର ପ୍ରକାର ଏବଂ ଦେଶର ଜନସ୍ୱାସ୍ଥ୍ୟ ଉପରେ ସେଗୁଡ଼ିକର ପ୍ରଭାବ ସମ୍ପର୍କରେ ସମୀକ୍ଷା କରିଥିଲେ।
ଦେଶରେ ଇନଫ୍ଲୁଏଞ୍ଜା ଭଳି ସର୍ଦ୍ଦିରୋଗ ଓ ଜ୍ୱର ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବା ଏବଂ ଗତ ଦୁଇ ସପ୍ତାହ ମଧ୍ୟରେ କୋଭିଡ-୧୯ ସଂକ୍ରମିତଙ୍କ ସଂଖ୍ୟା ବଢ଼ିବା ଦୃଷ୍ଟିରୁ ଏହି ଉଚ୍ଚସ୍ତରୀୟ ବୈଠକ ଆୟୋଜନ କରାଯାଇଥିଲା। ଏଥିପୂର୍ବରୁ ୨୨ ଡିସେମ୍ବର ୨୦୨୨ରେ ପ୍ରଧାନମନ୍ତ୍ରୀ କୋଭିଡ-୧୯ ସମୀକ୍ଷା ବୈଠକରେ କେତେକ ନିର୍ଦ୍ଦେଶ ଦେଇଥିଲେ, ସେ ଦିଗରେ ଗ୍ରହଣ କରାଯାଇଥିବା କାର୍ଯ୍ୟାନୁଷ୍ଠାନ ସମ୍ପର୍କରେ ଆଜିର ବୈଠକରେ ସମୀକ୍ଷା କରାଯାଇଥିଲା।
ଏହି ଅବସରରେ ପ୍ରଧାନମନ୍ତ୍ରୀଙ୍କୁ ସୂଚନା ଦିଆଯାଇଥିଲା ଯେ ୨୦ଟି ମୁଖ୍ୟ କୋଭିଡ ଔଷଧ, ୧୨ଟି ଅନ୍ୟାନ୍ୟ ଔଷଧ, ୮ଟି ବଫର ଔଷଧ ଏବଂ ଗୋଟିଏ ଇନଫ୍ଲୁଏଞ୍ଜା ଔଷଧ ଦର ପ୍ରତି ନଜର ରଖାଯାଇଛି । ଦେଶର ୨୨ ହଜାର ଡାକ୍ତରଖାନାରେ ଗତ ୨୭ ଡିସେମ୍ବର ୨୦୨୨ରେ ଏକ ମକ୍ଡ୍ରିଲ ଅନୁଷ୍ଠିତ ହୋଇଥିଲା ଏବଂ ଏହାପରେ ଡାକ୍ତରଖାନାଗୁଡ଼ିକ ଦ୍ୱାରା ନିରାକରଣ ପଦକ୍ଷେପ ଗ୍ରହଣ କରାଯାଇଥିଲା। ବିଶେଷ କରି ଗତ କିଛି ମାସ ମଧ୍ୟରେ ଏଚୱାନ୍ଏନୱାନ୍ ଏବଂ ଏଚ୍ଥ୍ରୀଏନ୍ଟୁ ସଂକ୍ରମିତ ସଂଖ୍ୟା ବୃଦ୍ଧି ପାଇବାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀଙ୍କୁ ଇନଫ୍ଲୁଏଞ୍ଜା ସ୍ଥିତି ସମ୍ପର୍କରେ ଅବଗତ କରାଯାଇଥିଲା।
ମାନ୍ୟତାପ୍ରାପ୍ତ ଆଇନଏସଏସିଓଜି ଜିନମ ସିକୁଏନ୍ସିଂ ପରୀକ୍ଷାଗାରଗୁଡ଼ିକରେ ପଜିଟିଭ ନମୁନାଗୁଡ଼ିକର ଜିନୋମ୍ ସିକୁଏନ୍ସିଂ ବା ଜିନ୍ ଅନୁଶୀଳନ ସଂଖ୍ୟା ବଢ଼ାଇବା ଲାଗି ବୈଠକରେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ପ୍ରଧାନମନ୍ତ୍ରୀ। ଏହା ନୂଆ ଭେରିଏଣ୍ଟ ବା ଭୂତାଣୁ ପ୍ରତିରୂପକୁ ଚିହ୍ନଟ କରିବା କ୍ଷେତ୍ରରେ ସହାୟକ ହୋଇପାରିବ, ଯଦ୍ଦ୍ୱାରା ସମୟୋଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସମ୍ଭବ ହୋଇପାରିବ ।
ଡାକ୍ତରଖାନା ପରିସରରେ ରୋଗୀ, ସ୍ୱାସ୍ଥ୍ୟସେବା ପେସାଦାର ଓ ସ୍ୱାସ୍ଥ୍ୟ କର୍ମୀଙ୍କ ମାସ୍କ ପରିଧାନ ସମେତ କୋଭିଡ ଉପଯୁକ୍ତ ବ୍ୟବହାର ଉପରେ ପ୍ରଧାନମନ୍ତ୍ରୀ ଜୋର ଦେଇଥିଲେ । ସେହିପରି ବରିଷ୍ଠ ନାଗରିକ ଓ ଅନ୍ୟାନ୍ୟ ରୋଗ ଥିବା ଲୋକମାନେ ଯେତେବେଳେ ଭିଡ଼ ଥିବା ଅଞ୍ଚଳକୁ ଯାଉଛନ୍ତି ସେମାନେ ମାସ୍କ ପିନ୍ଧିବା ଉଚିତ୍ ବୋଲି ସେ ବିଶେଷ ଭାବେ ପରାମର୍ଶ ଦେଇଥିଲେ।
ଆଇଆରଆଇ/ଏସଏଆରଆଇ ସଂକ୍ରମିତଙ୍କ ପ୍ରଭାବୀ ଅନୁଧ୍ୟାନ, ଏବଂ ଇନଫ୍ଲୁଏଞ୍ଜା, ସାର୍ସ-କୋଭ-୨ ଏବଂ ଆଡେନୋ ଭୂତାଣୁର ପରୀକ୍ଷଣ ପାଇଁ ପ୍ରଧାନମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଦେଶର ସବୁ ଡାକ୍ତରଖାନାଗୁଡ଼ିକରେ ଯଥେଷ୍ଟ ଶଯ୍ୟା ଓ ସ୍ୱାସ୍ଥ୍ୟ କର୍ମୀଙ୍କୁ ଉପଲବ୍ଧ ରଖିବା ସହିତ ଇନଫ୍ଲୁଏଞ୍ଜା ଓ କୋଭିଡ-୧୯ ପାଇଁ ଆବଶ୍ୟକ ଔଷଧ ଓ ସାମଗ୍ରୀ ମହଜୁଦ ରଖିବା ଉପରେ ଶ୍ରୀ ମୋଦୀ ଜୋର ଦେଇଥିଲେ ।
ଏହି ବୈଠକରେ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଶ୍ରୀ ପିକେ ମିଶ୍ର, ନୀତି ଆୟୋଗ ସଦସ୍ୟ (ସ୍ୱାସ୍ଥ୍ୟ) ଡକ୍ଟର ଭି କେ ପଲ, କ୍ୟାବିନେଟ ସଚିବ ଶ୍ରୀ ରାଜୀବ ଗୌବା, ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ, ଫାର୍ମସ୍ୟୁଟିକାଲ୍ସ ବିଭାଗ ସଚିବ ଏବଂ ବାୟୋଟେକ୍ନୋଲୋଜି ବିଭାଗ ସଚିବଙ୍କ ସମେତ ଆଇସିଏମଆର ମହାନିର୍ଦ୍ଦେଶକ, ପ୍ରଧାନମନ୍ତ୍ରୀ କାର୍ଯ୍ୟାଳୟର ପରାମର୍ଶଦାତା ଶ୍ରୀ ଅମିତ ଖାରେ ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
