ରଣଜୀ ଟ୍ରଫି: ମୁମ୍ବାଇ ନିକଟରୁ ଓଡିଶାର ଶୋଚନୀୟ ପରାଜୟ

ଅହମଦାବାଦ: ଚଳିତ ବର୍ଷର ଘରୋଇ ରଣଜୀ ଟ୍ରଫି କ୍ରିକେଟ ପ୍ରତିଯୋଗିତାରେ ଲଗାତର ଦ୍ୱିତୀୟ ପରାଜୟ ସ୍ୱିକାର କଲା ଓଡିଶା । ରଣଜୀ ଟ୍ରଫି ଏଲିଟ ଗ୍ରୁ ଡି” ଦ୍ୱିତୀୟ ମ୍ୟାଚରେ ସୌରାଷ୍ଟ୍ର ଠାରୁ ଶୋଚନୀୟ ପରାଜୟ ସ୍ୱିକାର କରିଥିବା ଓଡିଶା ଏଠାରେ ଅନୁଷ୍ଠିତ ତୃତୀୟ ମ୍ୟାଚରେ ମୁମ୍ବାଇ ଠାରୁ ଇନିଂସ ପରାଜୟ ଭୋଗିବାକୁ ପଡିଛି । ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ଓଡିଶା ପ୍ରଥମେ ବ୍ୟାଟିଂ କରି ପ୍ରଥମ ଇନିଂସରେ ୨୮୪ ରନ କରିଥିବା ବେଳେ ମୁମ୍ବାଇ ପ୍ରଥମ ଇନିଂସରେ ୯ ୱିକେଟ ହରାଇ ୫୩୨ ରନ କରିବା ସହିତ ପାଳି ସମାପ୍ତି ଘୋଷଣା କରିଥିଲା । ତେବେ ପ୍ରଥମ ଇନିଂସରେ ମୁମ୍ବାଇ ଠାରୁ ବିପୁଳ ରନଦ ପଛରେ ରହି ଶନିବାର ଦିନ ଦ୍ୱିତୀୟ ଇନିଂସ ଆରମ୍ଭ କରିଥିବା ଓଡିଶା ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୮୫ ରନରେ ୫ ୱିକେଟ ହରାଇ ଥିଲା । ତେଣୁ ପରାଜୟ ଏଡାଇବା ଓଡିଶା ପାଇଁ ବଡ ଚାଲେଞ୍ଜ ଥିଲା । ରବିବାର ଦିନ ମ୍ୟାଚର ଚତୁର୍ଥ ତଥା ଅନ୍ତିମ ଦିବସ ଖେଳ ଆରମ୍ଭ କରି ଓଡିଶା ୧୪୦ ରନରେ ଅଲଆଉଟ ହୋଇ ଯାଇଥିଲା । ତେଣୁ ମୁମ୍ବାଇ ଏହି ମ୍ୟାଚକୁ ଏକ ଇନିଂସ ଓ ୧୦୮ ରନରେ ଜିତି ନେଇଛି ।

ସୂଚନା ଯୋଗ୍ୟ ଯେ ନୂଆ କୋଚ ୱାସିମ ଜାଫରଙ୍କ ତତ୍ତ୍ୱାବଧାନରେ ଓଡିଶା ଚଳିତ ବର୍ଷ ରଣଜୀ ଟ୍ରଫି ଅଭିଯାନ ଆରମ୍ଭ କରି ଗୋଆ ବିକ୍ଷ ପ୍ରଥମ ମ୍ୟାଚ ଡ୍ର ରଖିଥିଲେ ହେଁ ପ୍ରଥମ ଇନିଂସରେ ଅଗ୍ରଣୀ ହାସଲ କରି ୩ ପଏଣ୍ଟ ପାଇଥିଲା । ମାତ୍ର ପରବର୍ତ୍ତୀ ଦୁଇ ମ୍ୟାଚରେ ପରାଜୟ ସ୍ୱିକାର କରିଛି । ରଣଜୀ ଟ୍ରଫି ମୁକାବିଲାର ଅନ୍ୟଏକ ଏଲିଟ ଗ୍ରୁପ ତୃତୀୟ ମ୍ୟାଚରେ ପୁଡୁଚେରୀକୁ ଏକ ଇନିଂସ ଓ ୨୦ ରନରେ ପରାସ୍ତ କରି କର୍ଣ୍ଣାଟକ ନକ ଆଉଟ ପର୍ଯ୍ୟାୟକୁ ଉନ୍ନୀତ ହୋଇଛି ।