ପୁଣି ରେଳ ଭଡ଼ାରେ ରିହାତି ପାଇବେ କି ବରିଷ୍ଠ ନାଗରିକ? ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଦେଲେ ଅପଡେଟ୍‌

ନୂଆଦିଲ୍ଲୀ: ବରିଷ୍ଠ ନାଗରିକଙ୍କୁ ରେଲୱେ ଭଡ଼ାରେ ମିଳିବାକୁ ଥିବା ରିହାତି ବହୁ ସମୟ ପର୍ଯ୍ୟନ୍ତ ବନ୍ଦ ରହିଛି । ଏନେଇ ବହୁଥର ଆଲୋଚନା ହୋଇଛି । ଏପର୍ଯ୍ୟନ୍ତ ରାଜ୍ୟସଭା ଏବଂ ଲୋକସଭାରେ ମଧ୍ୟ ଏନେଇ ଆଲୋଚନା ହୋଇସାରିଛି । କେନ୍ଦ୍ର ସରକାର ବର୍ତ୍ତମାନ ବରିଷ୍ଠ ନାଗରିକମାନଙ୍କଠାରୁ ମିଳୁଥିବା ରିହାତି ସିନିୟର ସିଟିଜେନ କନସେଶନ ଉପରେ ନୂଆ ଅପଡେଟ ଦେଇଛି ।

କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଶୁକ୍ରବାର ଦିନ ଅହମଦାବାଦରେ ଏନେଇ କିଛି ଆଲୋଚନା କରିଛନ୍ତି । ସେ ବୁଲେଟ ଟ୍ରେନ ପ୍ରୋଜେକ୍ଟ ଉପରେ ଚାଲୁଥିବା କାମର ସମୀକ୍ଷା କରିବା ପାଇଁ ଅହମଦାବାଦ ଗସ୍ତ କରିଥିଲେ । ଏହି ସମୟରେ ତାଙ୍କୁ ସାମ୍ବାଦିକମାନେ ରେଲୱେ ଭଡ଼ାକୁ ନେଇ କିଛି ପ୍ରଶ୍ନ କରିଥିଲେ । ଅଶ୍ୱିନୀ ବୈଷ୍ଣବ ପରୋକ୍ଷ ଭାବେ ଏହାର ଉତ୍ତର ଦେଇଥିଲେ । କହିଥିଲେ ଯେ,ପ୍ରଥମେ ସମସ୍ତ ଟ୍ରେନ ଯାତ୍ରୀଙ୍କ ଭଡ଼ା ୫୫ ପ୍ରତିଶତ କମ କରାଯାଇଛି।

କେନ୍ଦ୍ର ସରକାର ଅନେକ ଥର ନିଜର ଆଭିମୁଖ୍ୟ ସ୍ପଷ୍ଟ କରିସାରିଛନ୍ତି, ଯାହା ଦର୍ଶାଉଛି ଯେ ବରିଷ୍ଠ ନାଗରିକମାନେ ରେଳ ଭଡ଼ାରେ କୌଣସି ରିହାତି ପାଇବେ ନାହିଁ। ରେଳ ମନ୍ତ୍ରୀ ଏଥର ସରକାରଙ୍କ ସମାନ ଯୁକ୍ତିକୁ ଦୋହରାଇଛନ୍ତି ଯେ ସମସ୍ତ ରେଳ ଯାତ୍ରୀଙ୍କୁ ଭଡା ଉପରେ ୫୫ ପ୍ରତିଶତ ରିହାତି ମିଳୁଛି। ସେ ଏହା ପୂର୍ବରୁ ମଧ୍ୟ କହିଛନ୍ତି ଯେ, ଯଦି କୌଣସି ମାର୍ଗରେ ଟ୍ରେନ ଟିକେଟର ମୂଲ୍ୟ ୧୦୦ ଟଙ୍କା ଥାଏ, ତେବେ ରେଳବାଇ ଦ୍ୱାରା କେବଳ ୪୫ ଟଙ୍କା ଆଦାୟ କରାଯାଏ, ଅର୍ଥାତ୍ ପ୍ରତ୍ୟେକ ଯାତ୍ରୀଙ୍କୁ ୧୦୦ ଟଙ୍କା ଟିକେଟରେ ୫୫ ଟଙ୍କା ରିହାତି ଦିଆଯାଉଛି। ।

ବରିଷ୍ଠ ନାଗରିକମାନଙ୍କୁ ମିଳିବାକୁ ଥିବା ରିହାତି ବନ୍ଦ କରି ରେଳବାଇ ବିପୁଳ ସଞ୍ଚୟ କରୁଛି। ଗତ ବର୍ଷ ରେଳବାଇ ଏକ ଆରଟିଆଇର ଉତ୍ତରରେ ଏହି ସୂଚନା ଦେଇଥିଲା। ରେଳବାଇ କହିଛି ଯେ ମାର୍ଚ୍ଚ ୩୦, ୨୦୨୦ ରୁ ୩୧ ମାର୍ଚ୍ଚ ୨୦୨୨ ମଧ୍ୟରେ ଏହା ବରିଷ୍ଠ ନାଗରିକଙ୍କ ଠାରୁ ୩,୪୬୪ କୋଟି ଟଙ୍କା ଆୟ କରିଛି। ରିହାତି ରଦ୍ଦ ହେତୁ ଏଥିରେ ୧,୫୦୦ କୋଟି ଟଙ୍କା ଅତିରିକ୍ତ ସଞ୍ଚୟ ମଧ୍ୟ ଅନ୍ତର୍ଭୁକ୍ତ।