ପ୍ରସବ ପୂର୍ବରୁ ଯୌନ ନିର୍ଣ୍ଣୟ ଭିଡ଼ିଓ ଉପରେ ରୋକ ଲଗେଇଲେ କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ..
ନୂଆଦିଲ୍ଲୀ: କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ମଙ୍ଗଳବାର ଦିନ ୟୁଟ୍ୟୁବର୍ମାନଙ୍କୁ ନୋଟିସ୍ ପଠାଇଛି ଯେଉଁମାନେ ପ୍ରସବ ପୂର୍ବରୁ ଯୌନ ନିର୍ଣ୍ଣୟ ଉପରେ ଭିଡିଓ ଅପଲୋଡ୍ କରିଥିଲେ। ୩୬ ଘଣ୍ଟା ମଧ୍ୟରେ ଏଭଳି ଭିଡିଓ ହଟାଇବାକୁ ମନ୍ତ୍ରଣାଳୟ ନିର୍ଦ୍ଦେଶ ଦେଇଛି। ମନ୍ତ୍ରଣାଳୟ ପ୍ରାୟ ୪,୦୦୦ ଏଭଳି ଭିଡିଓ ତାଲିକାଭୁକ୍ତ କରିଛି, ଯାହା ବିଭିନ୍ନ ଗର୍ଭଧାରଣ ରିପୋର୍ଟକୁ ଦେଖି ଗର୍ଭସ୍ଥ ଶିଶୁର ଲିଙ୍ଗ କିପରି ନିର୍ଣ୍ଣୟ କରାଯିବ ସେ ସମ୍ବନ୍ଧରେ ସୂଚନା ଦେଇଥାଏ।
ପ୍ରି-କନ୍ସେପ୍ଟ ଏବଂ ପ୍ରି-ନାଟାଲ୍ ଡାଇଗ୍ନୋଷ୍ଟିକ୍ ଟେକ୍ନିକ୍ସ ଆକ୍ଟ, ୧୯୯୪ (PCPNDT ଆକ୍ଟ) ଭାରତରେ ପ୍ରସବ ପୂର୍ବରୁ ଯୌନ ନିର୍ଣ୍ଣୟକୁ ନିଷିଦ୍ଧ କରିଛି ଏବଂ ଏହାର ଅଧୀନରେ ଡାଇଗ୍ନୋଷ୍ଟିକ୍ କେନ୍ଦ୍ରଗୁଡିକ କଡାକଡି ଭାବରେ ନିୟନ୍ତ୍ରିତ ହୋଇଛି। ମହିଳା ଗର୍ଭପାତକୁ ରୋକିବା ଏବଂ ଭାରତରେ ଯୌନ ଅନୁପାତକୁ ରୋକିବା ପାଇଁ ଏହି ନିୟମ କରାଯାଇଥିଲା।
ସୂଚାନମୂତାବକ ସଚିବ ପିଭି ମୋହନଦାସ କହିଛନ୍ତି ଯେ ଆପତ୍ତିଜନକ ବିଷୟବସ୍ତୁ ପାଇଁ ମନ୍ତ୍ରଣାଳୟ ନିୟମିତ ଭାବେ ସୋସିଆଲ ମିଡିଆ ଉପରେ ନଜର ରଖେ। ସେ କହିଛନ୍ତି, “ଯେତେବେଳେ ଏହି ଭିଡିଓଗୁଡିକ ଆମ ନଜରକୁ ଆସିଲା, ଆମେ ପ୍ରଥମେ ଆପତ୍ତିଜନକ ଚ୍ୟାନେଲଗୁଡିକୁ ଚିହ୍ନଟ କରି ତାଲିକାଭୁକ୍ତ କଲୁ। ମଙ୍ଗଳବାର ଦିନ ଆମେ ବିଷୟବସ୍ତୁକୁ ହଟାଇବା ପାଇଁ ନୋଟିସ୍ ପଠାଇଥିଲୁ ଏବଂ ଏହା ଏକ ଦଣ୍ଡନୀୟ ଅପରାଧ ବୋଲି ମଧ୍ୟ ସୂଚନା ଦେଇଥିଲୁ।”
ମୋହନଦାସ କହିଛନ୍ତି ଯେ ଗୁଗୁଲକୁ ଏହାର ୱେବସାଇଟରୁ ବିଷୟବସ୍ତୁ ହଟାଇବାକୁ ମଧ୍ୟ ଅନୁରୋଧ କରାଯାଇଛି। ସେ କହିଛନ୍ତି ଯେ PCPNDT ନିୟମକୁ ଉଲ୍ଲଂଘନ କରୁଥିବା ବିଷୟବସ୍ତୁ ସାମ୍ନାକୁ ଆସୁଥିବା ବ୍ୟକ୍ତି ଏହାକୁ ନିଜ ରାଜ୍ୟର ନୋଡାଲ ଅଧିକାରୀ କିମ୍ବା [email protected] ଇମେଲ ଠିକଣାରେ ରିପୋର୍ଟ କରିପାରିବେ।
ବାସ୍ତବରେ, ଦିଲ୍ଲୀର ରେଡିଓଲୋଜିଷ୍ଟ ଡ ଅନୁଜ ଅଗ୍ରୱାଲ ପ୍ରଥମେ ଟ୍ୱିଟରରେ ଏଭଳି ଯୌନ ନିର୍ଣ୍ଣୟ ଭିଡିଓ ବିଷୟରେ ଲେଖିଥିଲେ। ଅଗ୍ରୱାଲ ରେଡିଓଲୋଜି ଉପରେ ଭିଡିଓ ସନ୍ଧାନରେ ୟୁଟ୍ୟୁବ୍ ମାଧ୍ୟମରେ ସ୍କ୍ରୋଲ୍ କରୁଥିଲେ ଏବଂ ଏହିପରି ଏକ ଆପତ୍ତିଜନକ ଭିଡିଓ ସାମ୍ନାକୁ ଆସିଥିଲେ । ଯେଉଁ ଚ୍ୟାନେଲରେ ଭିଡିଓ ପୋଷ୍ଟ କରାଯାଇଥିଲା ଗର୍ଭଧାରଣ, ଗର୍ଭଧାରଣ ଟିପ୍ସ ଏବଂ ପ୍ରସବକାଳୀନ ଯୌନ ନିର୍ଣ୍ଣୟ କୌଶଳ ଉପରେ ଭିଡିଓରେ ପରିପୂର୍ଣ୍ଣ ଥିଲା ।
ଡକ୍ଟର ଅଗ୍ରୱାଲ କହିଛନ୍ତି, “ପ୍ରାରମ୍ଭରେ ମୁଁ ଭାବିଲି ଏଗୁଡିକ ଅନ୍ୟ ଦେଶରୁ ୟୁଟ୍ୟୁବର୍ ଦ୍ୱାରା ଅପଲୋଡ୍ ହୋଇଥିବା ଭିଡିଓ, କିନ୍ତୁ ଆଶ୍ଚର୍ଯ୍ୟଜନକ କଥା ହେଉଛି ଏଗୁଡ଼ିକ ଭାରତରୁ ଆସିଛି। ମୁଁ ଦେଖି ଆଶ୍ଚର୍ଯ୍ୟ ହୋଇଥିଲି ଯେ ମୁଁ ଦେଖିଥିବା ଭିଡିଓଟି ବହୁତ ଭ୍ୟୁ ପାଇଛି। ତେଣୁ ଏହି ପ୍ରସଙ୍ଗରେ କଠୋର ଏବଂ କଡା ନଜର ରଖିବା ଉଚିତ୍ । ଏହିପରି ସମସ୍ତ ଭିଡିଓ ଉପରେ ପ୍ରତିବନ୍ଧକ ଲଗାଯିବା ଉଚିତ । ଏହାପରେ ମନ୍ତ୍ରଣାଳୟ ଏଭଳି ପଦକ୍ଷପ ଉଠାଇଛନ୍ତି ।
