ଶାହରୁଖଙ୍କ ‘ଜବାନ’ ଫିଲ୍ମର ରିଲିଜ୍ ଡେଟ୍ ଘୁଞ୍ଚିଲା: ଫିଲ୍ମ ହଲକୁ କେବେ ଆସିବ

ନୂଆଦିଲ୍ଳୀ: ‘ପଠାନ’ ଫିଲ୍ମ ବକ୍ସ ଅଫିସରେ ଧମାଲ କରିବା ପରେ ବଲିଉଡ କିଙ୍ଗ ଖାନ ଶାହରୁଖ ଖାନ ପୁଣି ଥରେ ଫ୍ୟାନ୍ସଙ୍କୁ ଏକ ବଡ଼ ସରପ୍ରାଇଜ୍ ଦେବାକୁ ଯାଉଛନ୍ତି । ତେବେ କିଙ୍ଗ ଖାନଙ୍କ ଆଗାମୀ ଫିଲ୍ମ ‘ଜବାନ’କୁ ନେଇ ସିନେପ୍ରେମୀମାନେ ବେଶ୍ ଉତ୍ସୁକତାର ସହିତ ଚାହିଁ ରହିଥିବା ବେଳେ ଏନେଇ ଏକ ବଡ଼ ଅଫଡେଟ୍ ଆସିଛି । ଆସନ୍ତା ଜୁନ୍ ୨ ତାରିଖରେ ‘ଜବାନ’ ରିଲିଜ୍ ହେବ ନାହିଁ ।

ସୂଚନା ମୁତାବକ, ‘ଜବାନ’ ଫିଲ୍ମ ଜୁନ ୨ରେ ନୁହେଁ ସେପ୍ଟେମ୍ବର ୭ ତାରିଖରେ ରିଲିଜ୍ ହେବ । ଶାହରୁଖ ନିଜେ ଏହାର ଏକ ଝଲକ ଶେୟାର କରି ଘୋଷଣା କରିଛନ୍ତି । ଗୌରୀ ଖାନ ଫିଲ୍ମର ପ୍ରଡକ୍ସନ ଦାୟିତ୍ୱ ସମ୍ଭାଳିଥିବା ବେଳେ ଏଲଟି ଏହାର ନିର୍ଦ୍ଦେଶନା ଦେଇଛନ୍ତି । ତେବେ ଫିଲ୍ମର ପୋଷ୍ଟ ପ୍ରଡକ୍ସନ କାର୍ଯ୍ୟ ବର୍ତ୍ତମାନ ସୁଦ୍ଧା ସରି ନଥିବାରୁ ରିଲିଜ୍ ଡେଟ ପରିବର୍ତ୍ତନ କରାଯାଇଛି । ଫିଲ୍ମକୁ ଏଡିଟିଂ କରିବା ପାଇଁ ଟିମକୁ କିଛି ସମୟର ଆବଶ୍ୟକତା ରହିଥିବାରୁ ଫିଲ୍ମ ନିର୍ମାତା ଏଥିପାଇଁ ବଡ଼ ନିଷ୍ପତ୍ତି ନେବାକୁ ବାଧ୍ୟ ହୋଇଥିଲେ ।

ଖବର ମୁତାବକ, କିଛିଦିନ ପୂର୍ବରୁ ଶାହରୁଖ ବିଳମ୍ବିତ ରାତ୍ରିରେ ନିର୍ଦ୍ଦେଶକ ଏଲଟିଙ୍କୁ ସାକ୍ଷାତ କରିବାକୁ ଯାଇଥିଲେ । ଏହି ଅବସରରେ ଦୁହେଁ ଫିଲ୍ମର ରିଲିଜ୍ ଡେଟ୍ ଘୁଞ୍ଚାଇବା ନେଇ ଆଲୋଚନା କରିଥିଲେ । ଫିଲ୍ମ ନିର୍ମାତା ଫିଲ୍ମକୁ ଅଗଷ୍ଟ ମାସରେ ରିଲିଜ୍ କରିବାକୁ ଇଚ୍ଛୁକ ଥିଲେ, ମାତ୍ର ପରେ ସେପ୍ଟେମ୍ବର ୭ରେ ରିଲିଜ୍ କରିବା ନେଇ ନିଷ୍ପତ୍ତି ହୋଇଥିଲା । ତେବେ ଏହି ଦିନ ଜନ୍ମାଷ୍ଟମୀ ପଡ଼ୁଥିବାରୁ ଫିଲ୍ମକୁ ହଲିଡେ ଫାଇଦା ମିଳିବାର ସମ୍ଭାବନା ରହିଛି । ସେପ୍ଟେମ୍ବର ମାସର ଏକ ସପ୍ତାହ ପୂର୍ବରୁ କୌଣସି ଭାରତୀୟ ଓ ହଲିଉଡ ଫିଲ୍ମ ରିଲିଜ୍ ହେଉ ନଥିବା ଜଣାପଡ଼ିଛି ।