ସୋସିଆଲ ମିଡିଆ କଣ୍ଟେଣ୍ଟ୍ ଉପରେ ରହିବ କଡା ନଜର; ଫ୍ୟାକ୍ଟ ଚେକିଂ ପାଇଁ ସରକାର ପ୍ରସ୍ତୁତ

ନୂଆଦିଲ୍ଲୀ: ସୋସିଆଲ ମିଡିଆରେ କଣ୍ଟେଣ୍ଟ ଉପରେ ନଜର ରଖିବା ପାଇଁ ଫ୍ୟାକ୍ଟ ଚେକ୍ ୟୁନିଟ୍ ଗଠନ ପାଇଁ କେନ୍ଦ୍ର ସରକାର ବିଜ୍ଞପ୍ତି ଜାରି କରିଛନ୍ତି। ନିକଟରେ ସଂଶୋଧିତ ଆଇଟି ନିୟମ ଅନୁଯାୟୀ ଏହି ଫ୍ୟାକ୍ଟ ଚେକିଂ ୟୁନିଟ୍ ଗଠନ କରାଯାଇଛି। ବିଜ୍ଞପ୍ତି ଅନୁଯାୟୀ, କେନ୍ଦ୍ର ସରକାର ସୂଚନା ପ୍ରଯୁକ୍ତି ବିଦ୍ୟା (ମଧ୍ୟସ୍ଥି ନିର୍ଦ୍ଦେଶାବଳୀ ଏବଂ ଡିଜିଟାଲ ମିଡିଆ ନୈତିକତା କୋଡ୍) ନିୟମ, ୨୦୨୧ର ନିୟମ-୩ର ଉପ-ନିୟମ (୧)ର ଧାରା (ବି) ଦ୍ୱାରା ପ୍ରଦତ୍ତ କ୍ଷମତାର ବ୍ୟବହାର କରି ସୂଚନା ଓ ପ୍ରସାରଣ ମନ୍ତ୍ରଣାଳୟର ପ୍ରେସ୍ ସୂଚନା ବ୍ୟୁରୋ ଅଧୀନରେ ଥିବା ଫ୍ୟାକ୍ଟ ଇନଭେଷ୍ଟିଗେସନ୍ ୟୁନିଟ୍କୁ କେନ୍ଦ୍ର ସରକାରଙ୍କ କୌଣସି କାର୍ଯ୍ୟ ସମ୍ବନ୍ଧରେ କେନ୍ଦ୍ର ସରକାରଙ୍କ ଏକ ଫ୍ୟାକ୍ଟ ଚେକିଂ ୟୁନିଟ୍ ଭାବରେ ସୂଚିତ କରିଛନ୍ତି। ଗତ ମାର୍ଚ୍ଚ ୧୩ ତାରିଖରେ ବମ୍ବେ ହାଇକୋର୍ଟ ଫ୍ୟାକ୍ଟ ଚେକିଂ ୟୁନିଟ୍ ପ୍ରତିଷ୍ଠା ଉପରେ ରୋକ୍ ଲଗାଇବା ପାଇଁ ହୋଇଥିବା ଆବେଦନକୁ ଖାରଜ କରିଦେଇଥିଲେ।

୨୦୨୩ରେ ଏହି ଫ୍ୟାକ୍ଟ ଚେକିଂ ୟୁନିଟକୁ ଆଇନରେ ଅନ୍ତର୍ଭୁକ୍ତ କରାଯାଇଥିଲା। ସରକାର କହୁଛନ୍ତି ଯେ ଏହାର ଉଦ୍ଦେଶ୍ୟ ଭୁଲ ସୂଚନାକୁ ରୋକିବା, କିନ୍ତୁ ଏହି ୟୁନିଟକୁ ଆଇନରେ ଅନ୍ତର୍ଭୁକ୍ତ କରିବାକୁ ଉଦ୍ୟମ ବିବାଦଘେରରେ ରହିଛି। ସରକାରଙ୍କୁ ସମାଲୋଚନା କରୁଥିବା ଗଣମାଧ୍ୟମଦ୍ୱାରା ଅଭିବ୍ୟକ୍ତିର ସ୍ୱାଧୀନତା ଏବଂ ସ୍ୱାଧୀନ ରିପୋର୍ଟିଂକୁ ଦମନ କରିବା ପାଇଁ ଏହା ଏକ ପ୍ରୟାସ ବୋଲି ଅନେକ ସାମ୍ବାଦିକ ଓ ବିଶେଷଜ୍ଞ ଆଶଙ୍କା ପ୍ରକାଶ କରିଛନ୍ତି। ତେବେ ଏହି ୟୁନିଟ୍ର ସାମ୍ବିଧାନିକତା ପାଇଁ ଏକ ପିଟିସନ୍ ଏବେ ବି ବମ୍ବେ ହାଇକୋର୍ଟରେ ବିଚାରାଧୀନ ରହିଛି।