କୋଟି କୋଟି ରୋଜଗାର କରୁଛି ସାଉଥ୍ ସିନେମା, ବଲିଉଡ୍ ହାତ ଖାଲି

ମୁମ୍ବାଇ: ଦକ୍ଷିଣ ଭାରତୀୟ ଫିଲ୍ମ ଜଗତ କୋଟି କୋଟି ଟଙ୍କା ବ୍ୟବସାୟ କରିବାରେ ଲାଗିଛି । ମାଲାୟଲମ, ତେଲୁଗୁ ଏବଂ କନ୍ନଡ ଭଳି ଆଞ୍ଚଳିକ ସିନେମା ମଧ୍ୟ ପୂର୍ବ ଅପେକ୍ଷା ଭଲ ବ୍ୟବସାୟ କରିବାରେ ଲାଗିଛନ୍ତି । କିନ୍ତୁ ଉତ୍ତର ଭାରତରେ କୌଣସି ଆଞ୍ଚଳିକ ଫିଲ୍ମ ଇଣ୍ଡଷ୍ଟ୍ରୀ ସାଉଥ୍ ଫିଲ୍ମ ପରି ବ୍ୟବସାୟ କରୁନାହିଁ । ଏହାଛଡ଼ା ଦକ୍ଷିଣ ଭାରତୀୟ ଫିଲ୍ମ ଇଣ୍ଡଷ୍ଟ୍ରୀ ପ୍ରାୟତଃ ଅନ୍ୟ ଆଞ୍ଚଳିକ ଭାଷା ଫିଲ୍ମ ଜଗତ ଉପରେ ଭାରି ପଡ଼ିବାରେ ଲାଗିଛି ବୋଲି ଫିଲ୍ମ ଜଗତକୁ ନେଇ ଏମିତି କିଛି ବିବୃତ୍ତି ରଖିଛନ୍ତି ତାମିଲନାଡ଼ୁ ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟଲିନ୍ । ଯାହାକୁ ନେଇ ରାଜନୀତି ଜୋର୍ ଧରିଛି ।

କୋଝିକୋଡରେ ଆୟୋଜିତ ଭାଷା ସମ୍ବନ୍ଧୀୟ କାର୍ଯ୍ୟକ୍ରମରେ ଭାଷଣ ଦେଇ ଉଦୟନିଧି ଆଉ ମଧ୍ୟ କହିଛନ୍ତି, ମୁମ୍ବାଇରେ କେବଳ ହିନ୍ଦୀ ଫିଲ୍ମ ନିର୍ମାଣ ହେଉଛି । ଅନ୍ୟ ଭାଷାଭାଷୀ ସିନେମା ଯେମିତି, ମରାଠୀ, ଭୋଜପୁରୀ, ବିହାରୀ ଆଦି ଚଳଚ୍ଚିତ୍ରକୁ ସେମାନଙ୍କ ଉଚିତ୍ ମାନ୍ୟତା ମିଳିପାରୁ ନାହିଁ । ଉତ୍ତର ଭାରତର କୌଣସି ସିନେମା ସାଉଥ୍ ଫିଲ୍ମ ଇଣ୍ଡଷ୍ଟ୍ରୀ ଭଳି ବିଜ୍‌ନେସ୍ କରିବା ପାଇଁ ସକ୍ଷମ ହେଉନାହିଁ । ଏମିତି କିଛି ରାଜ୍ୟରେ ନିଜର ଫିଲ୍ମ ଇଣ୍ଡଷ୍ଟ୍ରୀ ମଧ୍ୟ ନାହିଁ ବୋଲି ଉଦୟନିଧି ଉପହାସ କରିଛନ୍ତି ।

ଯାହାର ଉତ୍ତରରେ ତାମିଲନାଡ଼ୁ ଭାଜପା ଉପାଧ୍ୟକ୍ଷ ଏନ. ତିରୁପତି କହିଛନ୍ତି, ଉପମୁଖ୍ୟମନ୍ତ୍ରୀ ଜଣେ ଅସଫଳ ଅଭିନେତା ଓ ଅସଫଳ ଫିଲ୍ମ ପର୍ସନାଲିଟି । ଅଳ୍ପ ଜ୍ଞାନ ଯୋଗୁ ସେ ଏଭଳି କଥା କହିବା ସହ ଭାଷା ଆଳରେ ଦେଶକୁ ଭାଗ-ଭାଗ କରିବାର ପ୍ରୟାସ କରୁଛନ୍ତି ବୋଲି ସେ ପ୍ରତିକ୍ରିୟା ରଖିଛନ୍ତି । ଉଦୟନିଧିଙ୍କ ଫଲ୍ମ ପ୍ରଡକ୍ସନ୍ କମ୍ପାନୀ ରେଡ୍ ଜଏଣ୍ଟ ଫିଲ୍ମସ ହିନ୍ଦୀ ଅନୁବାଦ ଫିଲ୍ମ ନିର୍ମାଣ କରୁଛି । ସେ ରୋଜଗାର ପାଇଁ ହିନ୍ଦୀ ଭାଷା ବାଛୁଛନ୍ତି କିନ୍ତୁ ଶାସନ କ୍ଷମତାରେ ରହିବା ଲାଗି ସେ ଚାହୁଁଛନ୍ତି ଲୋକେ ହିନ୍ଦୀ ନ ଶିଖନ୍ତୁ । ଏଠି କହିରଖୁ କି, ଏହାପୁର୍ବରୁ ଉଦୟନିଧି ସନାତନକୁ ଡେଙ୍ଗୁ ମଶା ସହ ତୁଳନା କରିଥିଲେ । ଯାହାପାଇଁ ସେ ଉପହାସର ଶିକାର ମଧ୍ୟ ହୋଇଥିଲେ ।

ବର୍ତ୍ତମାନ ସମୟରେ ଫିଲ୍ମକୁ ନେଇ ଦର୍ଶକଙ୍କ ରୁଚି ବଦଳିଯାଇଛି । ପୂର୍ବରୁ ହିନ୍ଦୀ ଫିଲ୍ମର କ୍ରେଜ୍ ଅଧିକ ଥିଲା । ଲୋକେ ନିଜ ଆଞ୍ଚଳିକ ଫିଲ୍ମକୁ ଦେଖିବା ବଦଳରେ ବଲିଉଡ୍ ସିନେମା ଦେଖିବାକୁ ଅଧିକ ପସନ୍ଦ କରୁଥିଲେ । କିନ୍ତୁ ଏବେ ସମୟ ବଦଳି ଯାଇଛି । ବର୍ତ୍ତମାନର ଯୁବପିଢ଼ି ଦକ୍ଷିଣ ଭାରତୀୟ ଫିଲ୍ମ ଦେଖିବାକୁ ଆଗ୍ରହ ପ୍ରକାଶ କରୁଛି । କାରଣ ମନୋରଞ୍ଜନ ପାଇଁ ଦରକାର ପଡ଼ୁଥିବା କାହାଣୀ ଆଜିକାଲି ସାଉଥ୍ ଫିଲ୍ମରେ ହିଁ ମିଳୁଛି । କିଛି କିଛି ଫିଲ୍ମ ନିର୍ମାତା ଓ ପ୍ରଯୋଜକ ବ୍ୟବସାୟିକ ସଫଳତା ପାଇଁ ସାଉଥ୍ ଡିରେକ୍ଟର ଓ ପ୍ରଡ୍ୟୁସରଙ୍କ ସହ ମିଶି ପାନ୍ ଇଣ୍ଡିଆନ୍ ଫିଲ୍ମ ତିଆରି କରିବାରେ ଲାଗିଛନ୍ତିି । ଯାହା ସେମାନଙ୍କୁ ମନ ମୁତାବକ ବ୍ୟବସାୟିକ ସଫଳତା ବି ଦେଉଛି । ଆର୍‌.ଆର୍‌.ଆର୍‌., ଜୱାନ୍ ଭଳି ମଲ୍ଟି ଷ୍ଟାରର୍ ଓ ପାନ୍ ଇଣ୍ଡିଆନ୍ ଫିଲ୍ମ ସବୁ ଏହାର ଗୋଟିଏ ଗୋଟିଏ ଉଦାହରଣ । ଯାହା ଦର୍ଶାଉଛି, ଗୋଟିଏ ଫିଲ୍ମ ଏକକାଳୀନ ଏକାଧିକ ଭାଷାରେ ଅନୁବାଦ ହେବା ଦ୍ୱାରା ଦର୍ଶକଙ୍କ ସଂଖ୍ୟା ବଢ଼ୁଛି, ଯାହା ସ୍ୱଭାବିକ । ତେଣୁ ସାଉଥ୍ ଫିଲ୍ମ ଅଧିକ ସଫଳ, ଏପରି କହିବା କେତେଦୂର ଯଥାର୍ଥ?