ଦ୍ୱିତୀୟ ଥର ବିବାହ କଲେ ସନୀ ଲିଓନୀ: ୩ ପିଲା ରହିଲେ ସାକ୍ଷୀ, ସୋସିଆଲ ମିଡିଆରେ ଫଟୋ ଭାଇରାଲ
ଓଡ଼ିଶା ଭାସ୍କର: ବଲିଉଡ ଅଭିନେତ୍ରୀ ତଥା ଡେଟିଂ ରିଆଲିଟି ଶୋ’ “ ସ୍ପ୍ଲିର୍ଟ୍ସ ଭିଲ୍ଲା” ହୋଷ୍ଟ ସନୀ ଲିଓନ୍ ଦ୍ୱିତୀୟ ଥର ବିବାହ ବନ୍ଧନରେ ବାନ୍ଧି ହୋଇଛନ୍ତି । କୌଣସି ହିନ୍ଦୀ ଫିଲ୍ମ ଅଭିନେତା କିମ୍ବା କୌଣସି ବଡ଼ ବ୍ୟବସାୟୀଙ୍କୁ ନୁହେଁ ବରଂ ନିଜ ସ୍ୱାମୀ ଡାନିଏଲ୍ ୱେବରଙ୍କୁ ହିଁ ସନୀ ଆଉଥରେ ବିବାହ କରିଛନ୍ତି । ନସୀଙ୍କ ମ୍ୟାରେଜ୍ ସେରିମୋନୀରେ ତାଙ୍କର ୩ ପିଲା ନିଶା, ନୋଆ ଏବଂ ଆଶର ମଧ୍ୟ ସାମିଲ ହୋଇଥିଲେ । ୧୩ ବର୍ଷ ପୂର୍ବେ ସନୀ ବୟଫ୍ରେଣ୍ଡ୍ ଡାନିଏଲଙ୍କୁ ବିବାହ କରିଥିଲେ । ତେବେ ପୁଣିଥରେ ବିବାହ କରିବା ପାଇଁ ସନୀ ଏବଂ ଡାନିଏଲ୍ ଉଭୟଙ୍କ ଇଚ୍ଛା ଥିଲା । କିନ୍ତୁ ଏହି ମ୍ୟାରେଜକୁ ସେମାନଙ୍କଠୁ ଅଧିକ ତାଙ୍କ ପିଲାମାନେ ଉପଭୋଗ କରନ୍ତୁ ବୋଲି ସେମାନେ ଚାହୁଁଥିଲେ । ସେଥିପାଇଁ ଦୁହେଁ ୩ ପିଲାଙ୍କ ସହ ମିଶି ମାଳଦ୍ୱୀପରେ ମ୍ୟାରେଜ୍ ପାର୍ଟିର ଆୟୋଜନ କରିଥିବା ଚର୍ଚ୍ଚା ହେଉଛି ।
ବାହାଘର ପାର୍ଟି ବିଶେଷ ଆଡମ୍ବରପୂର୍ଣ୍ଣ ନ ଥିଲା । ଝିଅ ନିଶା ଓ ଦୁଇ ପୁଅ ନୋଆ ଓ ଆଶର ହିଁ କେବଳ ବିବାହରେ ଉପସ୍ଥିତ ଥିଲେ । ଦୁହିଁଙ୍କ ପରିବାରର ଅନ୍ୟ ସଦସ୍ୟ କିମ୍ବା କୌଣସି ବନ୍ଧୁ ଏଥିରେ ସାମିଲ ହୋଇ ନାହାନ୍ତି । ସନୀଙ୍କ ମ୍ୟାରେଜ୍ ପାର୍ଟି ଥିଲା ଖୁବ୍ ସାଧାରଣ ଓ ସରଳ । ମ୍ୟାରେଜରେ ସମସ୍ତେ ଦଳା ରଙ୍ଗର ପୋଷାକ ପିନ୍ଧିଥିବା ବେଳେ ସନୀ ମଧ୍ୟ ଧଳା ରଙ୍ଗର ଏକ ଡିଜାଇନର୍ ଗାଉନ୍ ପିନ୍ଧିଥିଲେ । ଅଭିନେତ୍ରୀଙ୍କ ମ୍ୟାରେଜ୍ ସେରିମୋନୀର ଫଟୋ ସୋସିଆଲ ମିଡିଆରେ ଏବେ ଖୁବ୍ ଭାଇରାଲ ହେବାରେ ଲାଗିଛି । ୨୦୧୧ ମସିହାରେ ଆମେରିକୀୟ ଫିଲ୍ମ ଅଭିନେତା ତଥା ବିଜନେସ ମ୍ୟାନ୍ ଡାନିଏଲଙ୍କ ହାତ ଧରିଥିଲେ ସନୀ ।
୨୦୧୭ରେ ସନୀ ଓ ଡାନିଏଲ୍ ମହାରାଷ୍ଟ୍ରର ଲାତୁରରୁ ଝିଅ ନିଶାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଥିଲେ । ଏହାପରେ ୨୦୧୮ରେ ସରୋଗେସି ଜରିଆରେ ସନୀ ଯାଆଁଳା ସନ୍ତାନଙ୍କ ମା’ ହୋଇଥିଲେ । ପୂଜା ଭଟ୍ଟଙ୍କ ଫିଲ୍ମ “ଜିସ୍ମ-୨” ଜରିଆରେ ସନୀ ହିନ୍ଦୀ ଫିଲ୍ମ ଇଣ୍ଡଷ୍ଟ୍ରିରେ ଏଣ୍ଟ୍ରି କରିଥିଲେ । ଏକାଧିକ ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରି ପ୍ରଶଂସା ସାଉଁଟିଥିବା ସନୀଙ୍କୁ ଫିଲ୍ମ “ରାଗିନୀ ଏମଏମଏସ୍-୨”ରେ ବଡ଼ ସଫଳତା ମିଳିଥିଲା । ବହୁ ଫିଲ୍ମରେ ସନୀ ଆଇଟମ୍ ଗାର୍ଲ ଭାବେ ମଧ୍ୟ କାମ କରିଛନ୍ତି । ଶେଷ ଥର ପାଇଁ ସନୀ ଫିଲ୍ମ ନିର୍ଦ୍ଦେଶକ ଅନୁରାଗ କାଶ୍ୟପଙ୍କ ଥ୍ରିଲର୍ ଫିଲ୍ମ “କେନେଡି”ରେ ନଜରକୁ ଆସିଥିଲେ ।
