ସୁଜୁକି ମୋଟର କର୍ପୋରେସନର ପୂର୍ବତନ ଚେୟାରମ୍ୟାନ୍ ଓସାମୁ ସୁଜୁକିଙ୍କର ପରଲୋକ
ନୂଆଦିଲ୍ଲୀ: ସୁଜୁକି ମୋଟର କର୍ପୋରେସନର ପୂର୍ବତନ ଚେୟାରମ୍ୟାନ୍ ଓସାମୁ ସୁଜୁକିଙ୍କର ୯୪ ବର୍ଷ ବୟସରେ ପରଲୋକ ହୋଇଛି । ସେ ଲିମ୍ଫୋମା ନାମକ ଏକ ରୋଗରେ ପୀଡିତ ଥିଲେ । ଓସାମୁ ୩୦ ଜାନୁଆରୀ ୧୯୩୦ ରେ ଜାପାନର ଜିରୋରେ ଜନ୍ମଗ୍ରହଣ କରିଥିଲେ । ୧୯୫୮ ମସିହାରେ ସେ ସୁଜୁକି ପରିବାରର ଝିଅ ଶୋକୋ ସୁଜୁକିଙ୍କୁ ବିବାହ କରିଥିଲେ ଏବଂ ତାଙ୍କୁ (ପତ୍ନୀଙ୍କ) ସରନେମ ନେଇଥିଲେ । ସେହି ବର୍ଷ ସେ ସୁଜୁକିରେ ମଧ୍ୟ ଯୋଗ ଦେଇଥିଲେ ।
ସମଗ୍ର ବିଶ୍ୱରେ ସୁଜୁକିର ବିସ୍ତାର ପାଇଁ ଶ୍ରେୟ ଓସାମୁକୁ ଦିଆଯାଇଛି । ତାଙ୍କ ଉଦ୍ୟମ ଯୋଗୁଁ ସୁଜୁକିଙ୍କର ଛୋଟ କାର ଏବଂ ମୋଟରସାଇକେଲ ସମଗ୍ର ବିଶ୍ୱରେ ଏକ ସ୍ୱତନ୍ତ୍ର ପରିଚୟ ପାଇଲା । ଓସାମୁ ଅନେକ ଦଶନ୍ଧି ଧରି କମ୍ପାନୀ ସହିତ ଜଡିତ ରହିଲେ । ସେ ଦୁଇଥର କମ୍ପାନୀର ଚେୟାରମ୍ୟାନ୍ ହୋଇଥିଲେ । ସେ ହେଉଛନ୍ତି ସେହି ବ୍ୟକ୍ତି ଯିଏକି ଦୀର୍ଘ ସମୟ ଧରି ଏହି ପଦବୀରେ ରହିଆସିଛନ୍ତି ।
ତାଙ୍କ ମାର୍ଗଦର୍ଶନରେ ସୁଜୁକି ମୋଟର ଜେନେରାଲ ମୋଟର୍ସ ଏବଂ ଫୋଲ୍ସୱେଗେନ ସହିତ ରଣନୀତିକ ଭାଗିଦାରୀରେ ପ୍ରବେଶ କଲା । ୧୯୮୦ ଦଶକରେ ଭାରତୀୟ ବଜାରରେ ପ୍ରବେଶ କରିବା ସେମାନଙ୍କର ସାହସିକ ପଦକ୍ଷେପ ବୋଲି ବିବେଚନା କରାଯାଏ ।
୧୯୮୨ ମସିହାରେ ସୁଜୁକି ଭାରତ ସରକାରଙ୍କ ସହ ମିଳିତ ଉଦ୍ୟମ କରି ମାରୁତି ଉଦୟୋଗ ସୃଷ୍ଟି କରିଥିଲେ । ଏହି ସହଭାଗୀତା ମାରୁତି ୮୦୦ ନାମକ ଏକ ଛୋଟ କାରର ପରିଚୟ ଦେଇଥିଲା । ଏହା ଲଞ୍ଚ ହେବା ମାତ୍ରେ ଏହି ମଡେଲ ଭାରତୀୟ ବଜାରରେ ଏକ ହିଟ୍ ହୋଇଗଲା ଏବଂ ସୁଜୁକିଙ୍କୁ ଏକ ଶକ୍ତିଶାଳୀ ସ୍ଥାନ ଦେଲା ।
