ବର୍ଣ୍ଣ ବୈଷମ୍ୟ ବିରୋଧରେ ଆଣ୍ଠୁରେ ବସିବାକୁ ରାଜି ହେଲେ କ୍ୱିଣ୍ଟନ ଡିକକ, ନିଜ ବ୍ୟବହାର ପାଇଁ କ୍ଷମା ମାଗିଲେ
ନୂଆଦିଲ୍ଲୀ : ଦକ୍ଷିଣ ଆଫ୍ରିକାର ୱିକେଟ କିପର ବ୍ୟାଟସମ୍ୟାନ କ୍ୱିଣ୍ଟନ ଡିକକ୍ ବ୍ଲାକ୍ ଲାଇଭ୍ସ ମ୍ୟାଟର ବା ବର୍ଣ୍ଣ ବୈଷମ୍ୟ ଅଭିଯାନକୁ ସମର୍ଥନ ଜଣାଇ ଆଣ୍ଠୁରେ ବସିବାକୁ ରାଜି ହୋଇଛନ୍ତି । ଏଥିସହ ୱେଷ୍ଟଇଣ୍ଡିଜ ବିପକ୍ଷ ମୁକାବିଲାରେ ସେ କରିଥିବା ବ୍ୟବହାର ପାଇଁ ସାଥୀ ଖେଳାଳି ଓ ପ୍ରଶଂସକଙ୍କୁ କ୍ଷମା ମାଗିଛନ୍ତି । ଡିକକ୍ ଟି-୨୦ ବିଶ୍ୱ କପ ୨୦୨୧ରେ ୱେଷ୍ଟଇଣ୍ଡିଜ ବିପକ୍ଷ ମ୍ୟାଚରେ ଆଣ୍ଠୁରେ ବସି ବର୍ଣ୍ଣ ବୈଷମ୍ୟ ଅଭିଯାନକୁ ସମର୍ଥନ କରିବାକୁ ମନା କରି ଦେଇଥିଲେ । ଏପରିକି ଉକ୍ତ ମ୍ୟାଚ ଖେଳିବାକୁ ସେ ମନା କରି ଦେଇଥିଲେ । ଏହା ପରେ କ୍ରିକେଟ୍ ସାଉଥ ଆଫ୍ରିକା ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେଇପାରେ ବୋଲି ଆଶା କରାଯାଉଥିଲା ।
ହେଲେ ଡିକକ୍ ଏବେ ପ୍ରେସ ବିବୃତି ଜାରି କରି କହିଛନ୍ତି, ମୁଁ ନିଜର ସାଥୀ ଖେଳାଳି ଓ ପ୍ରଶଂସକଙ୍କୁ ସର୍ବପ୍ରଥମେ କ୍ଷମା ମାଗୁଛି । ମୁଁ କେବେ ବି ଏହାକୁ କ୍ୱିଣ୍ଟନ ବିବାଦ କରିବାକୁ ଚାହୁଁନାହିଁ । ମୁଁ ବର୍ଣ୍ଣ ବୈଷମ୍ୟ ବିରୋଧୀ ଲଢେଇର ଗୁରୁତ୍ୱକୁ ବୁଝି ପାରୁଛି । ଏହା ମଧ୍ୟ ବୁଝି ପାରୁଛି ଯେ, ଜଣେ ଖେଳାଳି ହିସାବରେ ଉଦାହରଣ ସୃଷ୍ଟି କରିବା ଆମର ଦାୟିତ୍ୱ । ଯଦି ମୁଁ ଆଣ୍ଠୁରେ ବସିଲେ ଲୋକେ ସଚେତନ ହେବେ ଏବଂ ସେମାନଙ୍କ ଜୀବନରେ ଉନ୍ନତି ଘଟିବ ତେବେ ମୁଁ ଖୁସି ଖୁସିରେ ଏହା କରିବାକୁ ପ୍ରସ୍ତୁତ ।
Quinton de Kock statement ? pic.twitter.com/Vtje9yUCO6
— Cricket South Africa (@OfficialCSA) October 28, 2021
ସୂଚନାଯୋଗ୍ୟ, ପ୍ରଥମେ କୁହାଯାଇଥିଲା ଯେ, ଡିକକ ନିଜର ବ୍ୟକ୍ତିଗତ କାରଣରୁ ମ୍ୟାଚ୍ ନଖେଳିବାକୁ ନିଷ୍ପତ୍ତି ନେଇଛନ୍ତି । ମାତ୍ର ପରେ ସିଏସଏ ପ୍ରେସ ବିବୃତି ଜାରି କରି ଡିକକଙ୍କ ନଖେଳିବାର ପ୍ରକୃତ କାରଣ ଜଣାଇଥିଲା । ଦକ୍ଷିଣ ଆଫ୍ରିକା ଅଧିନାୟକ ତେମ୍ବା ବାଭୁମା ମଧ୍ୟ ଡିକକଙ୍କ ନିଷ୍ପତ୍ତିକୁ ସମ୍ମାନ ଜଣାଇଥିଲେ ।
