T-20 ବିଶ୍ୱକପରେ ଟିମ ଇଣ୍ଡିଆର ବ୍ୟାଟିଂ ଅର୍ଡର… Playing-11କୁ ନେଇ ଉତ୍ତର ଦେଲେ ରୋହିତ
ନୂଆଦିଲ୍ଲୀ: ଟି-୨୦ ବିଶ୍ୱକପ ଆରମ୍ଭ ହୋଇଯାଇଛି । ଏହାପୂର୍ବରୁ ବାଂଲାଦେଶ ବିପକ୍ଷ ୱାର୍ମ-ଅପ୍ ମ୍ୟାଚରେ ଦମଦାର ବିଜୟ ହାସଲ କରିଛି ଟିମ ଇଣ୍ଡିଆ । ବ୍ୟାଟିଂ ଏବଂ ବୋଲିଂରେ ଦମଦାର ପ୍ରଦର୍ଶନ କରି ଏହି ମ୍ୟାଚକୁ ୬୨ ରନରେ ବିଜୟୀ ହୋଇଛି ରୋହିତ ସେନା । ଷ୍ଟାର କିପର ଋଷଭ ପନ୍ତ ଏବଂ ଉପ-ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଏହି ମ୍ୟାଚରେ ବିସ୍ଫୋରକ ବ୍ୟାଟିଂ କରିଛନ୍ତି । ଏହାବ୍ୟତୀତ ସମସ୍ତ ବୋଲର ମଧ୍ୟ ଭଲ ବୋଲିଂ ବଳରେ ବାଂଲାଦେଶକୁ ଚକମା ଦେବାରେ ସଫଳ ହୋଇଛି ମେନ୍ ଇନ୍ ବ୍ଲୁ । ତେବେ ଏହି ମ୍ୟାଚ ପରେ ଅଧିନାୟକ ରୋହିତ ବିଶ୍ୱକପ ପ୍ଲାନ କହିଛନ୍ତି । ଟି-୨୦ ବିଶ୍ୱକପରେ ଭାରତର ବ୍ୟାଟିଂ ଅର୍ଡରକୁ ନେଇ ଖୁଲାସା କରିଛନ୍ତି ରୋହିତ ।
ଟିମ ଇଣ୍ଡିଆର ଅଧିନାୟକ ରୋହିତ ଶର୍ମା କହିଛନ୍ତି ଯେ, ବର୍ତ୍ତମାନ ସୁଦ୍ଧା ଦଳର ଚୂଡ଼ାନ୍ତ ବ୍ୟାଟିଂ ଅର୍ଡର ଚୟନ ହୋଇନାହିଁ । ତେବେ ଋଷଭ ପନ୍ତଙ୍କୁ ସୁଯୋଗ ଦେବା ପାଇଁ ବାଂଲାଦେଶ ବିପକ୍ଷରେ ଦଳ ବଡ଼ ନିଷ୍ପତ୍ତି ନେଇଛି । ଏପରିକି ବୋଲର ମଧ୍ୟ ଏହି ମ୍ୟାଚରେ ଭଲ ପ୍ରଦର୍ଶନ କରିଛନ୍ତି । ଦଳର ପ୍ରଦର୍ଶନରେ ମୁଁ ଖୁସି ଅଛି । ଆମେ ଯେମିତି ଚାହୁଁଥିଲୁ ଠିକ ସେହି ପରିଣାମ ମଧ୍ୟ ମିଳିଛି । ତେବେ ଆଗାମୀ ଟୁର୍ଣ୍ଣାମେଣ୍ଟରେ ପରିସ୍ଥିତି ଅନୁସାରେ ଦଳର ବ୍ୟାଟିଂ ଅର୍ଡର ଚୟନ କରାଯିବ ।
ତେବେ ଅନେକ ପୂର୍ବତନ କ୍ରିକେଟର ତଥା ସମୀକ୍ଷକ କହିଛନ୍ତି ଯେ, ବିଶ୍ୱକପରେ ରୋହିତଙ୍କ ସହ ବିରାଟ କୋହଲି ଓପନିଙ୍ଗ କରିବା ଉଚିତ୍ । ଏହାପରେ ଋଷଭ ପନ୍ତ ଏବଂ ସଞ୍ଜୁ ସାମସନ ଉଭୟଙ୍କୁ ଦଳରେ ସୁଯୋଗ ମିଳିବାର ସମ୍ଭାବନା ମଧ୍ୟ ରହିଛି । ସେହିପରି ଅଲରାଉଣ୍ଡର ଭୂମିକାରେ ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ ଏବଂ ରବିନ୍ଦ୍ର ଜାଡେଜା ଦଳରେ ସ୍ଥାନ ପାଇପାରନ୍ତି । ଭାରତ ଆସନ୍ତା ୫ ତାରିଖରେ ପ୍ରଥମ ମ୍ୟାଚରେ ଆୟରଲାଣ୍ଡକୁ ଭେଟିବ ଏବଂ ୯ ତାରିଖରେ ପାକିସ୍ତାନ ବିପକ୍ଷରେ ହେବ ବିଗ୍ ଫାଇଟ ।
ଟିମ ଇଣ୍ଡିଆର ପ୍ଲେଇଙ୍ଗ-୧୧: ରୋହିତ ଶର୍ମା(ଅଧିନାୟକ), ବିରାଟ କୋହଲି, ସଞ୍ଜୁ ସାମସନ, ସୂର୍ଯ୍ୟକୁମାର ଯାଦବ, ଋଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ରବିନ୍ଦ୍ର ଜାଡେଜା, ଯଶପ୍ରୀତ ବୁମରାହ, କୁଳଦୀପ ଯାଦବ ଏବଂ ଅର୍ଶଦୀପ ସିଂହ
