ରୋହିତ ଶର୍ମାଙ୍କ ପାଇଁ ବଢୁଛି ଚିନ୍ତା: ଶ୍ରୀଲଙ୍କା ବିପକ୍ଷ ଟି-୨୦ ସିରିଜ ପୂର୍ବରୁ ବାଦ ପଡିଲେ ଦଳର ଦୁଇ ଷ୍ଟାର ଖେଳାଳି
ନୂଆଦିଲ୍ଲୀ: ଶ୍ରୀଲଙ୍କା ବିପକ୍ଷ ଟି-୨୦ ସିରିଜ ପୂର୍ବରୁ ଭାରତକୁ ଲାଗିଛି ଗୋଟିଏ ପରେ ଗୋଟିଏ ଝଟକା । ଦଳର ଗୋଟିଏ ପରେ ଗୋଟିଏ ଷ୍ଟାର ଖେଳାଳିଙ୍କୁ ହରାଇ ଚାଲିଛି ମେନ ଇନ ବ୍ଲୁ । ୱେଷ୍ଟଇଣ୍ଡିଜ ବିପକ୍ଷ ଶେଷ ଟି-୨୦ ମ୍ୟାଚରେ ମାଂସପେଶୀ ଜନିତ ଆଘାତ ସମସ୍ୟା ଯୋଗୁଁ ବିଶ୍ରାମ ନେଇଛନ୍ତି ଦୀପକ ଚହର । ସେପଟେ ଆଉ ଜଣେ ଷ୍ଟାର ଖେଳାଳି ମଧ୍ୟ ଏବେ ସିରିଜରୁ ବାଦ ପଡିଛନ୍ତି । ୱେଷ୍ଟଇଣ୍ଡିଜ ବିପକ୍ଷରେ ନିଜକୁ ପ୍ରମାଣ କରିଥିବା ସୂର୍ଯ୍ୟକୁମାର ଯାଦବ ଆହତ ହୋଇ ଦଳରୁ ବାଦ ପଡିଛନ୍ତି । ଏହାପରେ ଚିନ୍ତାରେ ପଡି ଯାଇଛନ୍ତି ଅଧିନାୟକ ରୋହିତ ଶର୍ମା ।
ପୂର୍ବତନ ଅଧିନାୟକ ବିରାଟ କୋହଲି ଏବଂ ଋଷଭ ପନ୍ତଙ୍କୁ ଏହି ସିରିଜ ପାଇଁ ବିଶ୍ରାମ ଦିଆଯାଇଥିବା ବେଳେ ଏବେ ସୂର୍ଯ୍ୟକୁମାରଙ୍କ ଆଘାତ ଦଳକୁ ଚିନ୍ତାରେ ପକାଇ ଦେଇଛି । ସୂର୍ଯ୍ୟକୁମାରଙ୍କ ବିନା ଦଳ ଏବେ ମଧ୍ୟକ୍ରମରେ ସାମାନ୍ୟ ଦୁର୍ବଳ ନଜର ଆସିଛି । ଏହି ସମୟରେ ଦଳର ସମସ୍ତ ଦାୟିତ୍ୱ ଶ୍ରେୟସ ଅୟର ଏବଂ ଇଶାନ କିଶାନଙ୍କ ଉପରେ ରହିବ । ଏହି ସିରିଜରେ ରୋହିତ ଋତୁରାଜ ଗାଏକ୍ୱାଡଙ୍କ ସହ ପାଳି ଆରମ୍ଭ କରି ଇଶାନ କିଶାନଙ୍କୁ ମଧ୍ୟକ୍ରମରେ ଖେଳାଇ ପାରନ୍ତି । ତାଭ୍କ ବ୍ୟତୀତ ଶ୍ରେୟସ ଅୟର ଏବଂ ଭେଙ୍କଟେଶ ଅୟର ଦଳର ସନ୍ତୁଳନ ରକ୍ଷା କରିବା ଦାୟିତ୍ୱ ମୁଣ୍ଡକୁ ନେବେ । ତେବେ ଦୀପକ ହୁଡ୍ଡା ଏବଂ ସଞ୍ଜୁ ସାମସନଙ୍କ ମଧ୍ୟରୁ ଜଣେ ଏହି ମ୍ୟାଚରେ ଖେଳିବାର ସୁଯୋଗ ପାଇ ପାରନ୍ତି । ତେବେ ଉଭୟଙ୍କ ପାଖରେ ନିଜକୁ ପ୍ରମାଣ କରିବାର ସୁବର୍ଣ୍ଣ ସୁଯୋଗ ରହିବ ।
ସେପଟେ ଷ୍ଟାର ଅଲରାଉଣ୍ଡର ରବୀନ୍ଦ୍ର ଜାଡେଜା ଏବଂ ୟର୍କର କିଙ୍ଗ ଜଶପ୍ରୀତ ବୁମରାହ ଦଳକୁ କମବ୍ୟାକ କରୁଛନ୍ତି । ତେଣୁ ଚହରଙ୍କ ଅନୁପସ୍ଥିତିରେ ବୁମରାହ, ଭୁବନେଶ୍ୱର କୁମାର ଏବଂ ହର୍ଷଲ ପଟେଲ ଦଳର ମୁଖ୍ୟ ବୋଲର ଭୂମିକା ତୁଲାଇ ପାରନ୍ତି ।
ଭାରତର ସମ୍ଭାବ୍ୟ ଦଳ:
ରୋହିତ ଶର୍ମା(ଅଧିନାୟକ), ଋତୁରାଜ ଗାଏକ୍ୱାଡ, ଇଶାନ କିଶାନ(ୱିକେଟ କିପର), ଶ୍ରେୟସ ଅୟର, ଦୀପକ ହୁଡ୍ଡା/ ସଞ୍ଜୁ ସାମସନ, ଭେଙ୍କଟେଶ ଅୟର, ରବିନ୍ଦ୍ର ଜାଡେଜା, ୟୁଜବେନ୍ଦ୍ର ଚହଲ, ହର୍ଷଲ ପଟେଲ, ଭୁବନେଶ୍ୱର କୁମାର, ଜଶପ୍ରୀତ ବୁମରାହ
ଶ୍ରୀଲଙ୍କା ସମ୍ଭାବ୍ୟ ଦଳ:
ଦାସୁନ ଶନାକା(ଅଧିନାୟକ), ପାଥୁମ ନିସାନକା, ଦାନୁଷ୍କା ଗୁଣତିଲକା, କୁସଲ ମେଣ୍ଡିସ, ଚରିତ ଅସଲଙ୍କା, ଦିନେଶ ଚାନ୍ଦିମାଲ(ୱିକେଟ କିପର), ଚମିକା କରୁଣାରତ୍ନେ, ଦୁଷ୍ମନ୍ତା ଚମୀରା, ମହେଶ ଥିକରାନା, ଜେଫରୀ, ୱେଣ୍ଡରସ ଏବଂ ଲାହିରୁ କୁମାରା