ଗାଡ଼ି ଆଗରେ ଚାଲିଗଲା ବିଲେଇ, ଧରି ନେଇ ପେଟ୍ରୋଲ ଢ଼ାଳି ନିଆଁ ଲଗାଇଦେଲେ

ଉତ୍ତରପ୍ରଦେଶ: ଆପଣମାନେ ଅନେକ ସମୟରେ ରାସ୍ତା ପାର ହେଉଥିବା ସମୟରେ ବିଲେଇ ରାସ୍ତା କାଟିଥିବ ନିଶ୍ଚୟ। ଏହାକୁ କେହି କେହି ସତର୍କତାର ସଙ୍କେତ ବୋଲି କହୁଥିବା ବେଳେ କେହି କେହି ଅଶୁଭ କହି କିଛି ସମୟ ପାଇଁ ସେହିଠାରେ ଅଟକି ଯାନ୍ତି। ଆଉ କେହି କେହି ସାତ ପାଦ ପଛକୁ ଫେରି ଯାଆନ୍ତି।

ହେଲେ ଏବେ ଏମିତି ଏକ ଆଶ୍ଚର୍ଯ୍ୟକର ଘଟଣା4 ସାମ୍ନାକୁ ଆସିଛି ଯାହାକୁ ଶୁଣିଲେ ଆପଣଙ୍କ ମନରେ ବି ସେହି ଲୋକଙ୍କ ପାଇଁ ଘୃଣ ଆସିଯିବ ଯେଉଁମାନେ ଏପରି କାମ କରିଛନ୍ତି। ତେବେ ଆମେ ଆଉ ସସପେନ୍ସ ନରଖି ସମ୍ପୂର୍ଣ୍ଣ ଘଟଣା ଉପରେ ନଜର ପକାଇବା। ଯେଉଁଠାରେ କିଛି ଦୁର୍ବୃତ୍ତ ଏକ ବିଲେଇକୁ ଧରି ଜାଳି ମାରିଦେଇଛନ୍ତି। ତାହା ପୁଣି ରାସ୍ତା ପାର ହେବା କାରଣରୁ।

ଭିଡିଓ ଭାଇରାଲ: ଏପରି ଏକ ଆଶ୍ଚର୍ଯ୍ୟଜନକ ଘଟଣା ମୁରାଦାବାଦ ଜିଲ୍ଲାରୁ ସାମ୍ନାକୁ ଆସିଛି। କୁହାଯାଉଛି ବିଲେଇଟି ରାସ୍ତା କାଟି ଥିବାରୁ ତାକୁ ଦୁର୍ବୃତ୍ତମାନେ ଧରି ପକାଇଥିଲେ। ସୂଚନାନୁସାରେ, ଭାଇରାଲ ଭିଡିଓରୁ ସ୍ପଷ୍ଟ ଦେଖାଯାଉଛି କି ଏକ ବାଇକ୍ ପାଖରେ ଠିଆ ହୋଇଥିବା କିଛି ଲୋକ ବିଲେଇଟିକୁ ଧରିଥିବା ଦେଖାଯାଉଛି।

ପରେ, ସେମାନେ ତାକୁ ବହୁତ ପିଟିଲେ, ଯାହା ଫଳରେ ବିଲେଇଟିର ମୃତ୍ୟୁ ହେଲା। ପରେ ଅଭିଯୁକ୍ତମାନେ ବିଲେଇ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ଭିଡିଓରେ ଦାବି କରାଯାଇଛି ଯେ ଅଭିଯୁକ୍ତମାନେ ଜଙ୍ଗଲୀ ବିଲେଇଟିକୁ ହତ୍ୟା କରିଛନ୍ତି କାରଣ ଏହା ରାସ୍ତା ପାର ହେଉଥିଲା।

ଭିଡ଼ିଓ କରିଥିଲେ ମହିଳା: ଭିଡିଓକୁ କେନ୍ଦ୍ର କରି ପୋଲିସ ଏହି ମାମଲାରେ ପ୍ରିୟା ନାମକ ଜଣେ ମହିଳାଙ୍କୁ ଚିହ୍ନଟ କରିଛି। ଯିଏ ଏକ ଫେସବୁକ୍ ପେଜ୍ ମାଧ୍ୟମରେ ଘଟଣାର ଭିଡିଓ ଅପଲୋଡ୍ କରୁଥିବାର ଦେଖାଯାଇଥିଲା। ଏହି ଘଟଣାଟି ମୋରାଦାବାଦର ଲାଲୁୱାଲା ଗାଁର ବୋଲି କୁହାଯାଉଛି।

ପୋଲିସ ବାଇକର ନମ୍ବର ଦେଖି ମହିଳାଙ୍କ ନାମ ପ୍ରକାଶ କରିଛି, କିନ୍ତୁ ଯେତେବେଳେ ପୋଲିସ ଗାଁରେ ଖୋଜାଖୋଜି କରିଥିଲା, ସେତେବେଳେ ପ୍ରିୟା ନାମକ କୌଣସି ମହିଳାଙ୍କୁ ପାଇନଥିଲା।

ଟିହ୍ନଟ ହୋଇପାରୁନି ଅଭିଯୁକ୍ତ: ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ପୋଲିସ ରବିବାର ଗାଁ ମୁଖିଆଙ୍କୁ ଭିଡିଓଟି ଦେଖାଇଲା। ଭିଡିଓରେ ଦେଖାଯାଉଥିବା ଯୁବକମାନଙ୍କୁ ଚିହ୍ନଟ କରିବାକୁ ପ୍ରଧାନ ସ୍ପଷ୍ଟ ଭାବରେ ମନା କରିଦେଇଥିଲେ। ଏହା ପରେ, ପୋଲିସ ଭିଡିଓଟି ପ୍ରକୃତରେ କେବେ ତିଆରି ହୋଇଥିଲା ଏବଂ ଅଭିଯୁକ୍ତ କିଏ ହୋଇପାରେ ତାହାର ତଦନ୍ତ ଆରମ୍ଭ କରିଛି।

ଦଣ୍ଡର ବ୍ୟବସ୍ଥା: ଏହି ମାମଲାରେ ବନ୍ୟପ୍ରାଣୀ ସୁରକ୍ଷା ଆଇନ, ୧୯୭୨ର ଧାରା ୯, ୩୯ ଏବଂ ୫୧ ଅନୁଯାୟୀ ଏକ ଏଫଆଇଆର ପଞ୍ଜିକୃତ ହୋଇଥିଲା। ଏହି ଧାରା ଅନୁଯାୟୀ, ଅଭିଯୁକ୍ତଙ୍କୁ ତିନି ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ।

ପୋଲିସ ଏହି ଘଟଣାର ତଦନ୍ତ କରୁଛି, ଏବଂ ଅଭିଯୁକ୍ତମାନଙ୍କୁ ଖୁବ୍ ଶୀଘ୍ର ଚିହ୍ନଟ କରାଯିବ ବୋଲି ଆଶା କରାଯାଉଛି। ଭୋଜପୁର ଇନ୍ସପେକ୍ଟର ଇନଚାର୍ଜ ଶରଦ ମଲିକ କହିଛନ୍ତି ଯେ ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯାଉଛି। ଭିଡିଓର ସତ୍ୟାସତ୍ୟ ବାହାର କରିବା ପାଇଁ ପୋଲିସ ସମସ୍ତ ଦିଗକୁ ଯାଞ୍ଚ କରୁଛି।

ପୋଲିସ ମହିଳା ପ୍ରିୟାକୁ ଧରିବା ପାଇଁ ଗାଁରେ ଖୋଜାଖୋଜି କରିଥିଲା, କିନ୍ତୁ ତାଙ୍କର କୌଣସି ସନ୍ଧାନ ମିଳିନଥିଲା। ଏହି ଘଟଣା ପୁଣି ଥରେ ବନ୍ୟପ୍ରାଣୀ ସଂରକ୍ଷଣର ଗୁରୁତ୍ୱକୁ ସ୍ପଷ୍ଟ କରିଛି ଏବଂ ଏବେ ପୋଲିସ ଏବଂ ବନ ବିଭାଗ ମିଳିତ ଭାବରେ ଦୋଷୀମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରସ୍ତୁତ ହେଉଛନ୍ତି।