(Video) ରେଲୱେ ଟ୍ରାକରେ ମହିଳା, ଛୁଆକୁ ନେଇ ଚାଲିଗଲା ଟ୍ରେନ… କେମିତି କୋଳକୁ ଫେରିଲା ସୁନା ଶଙ୍ଖାଳି

ଓଡ଼ିଶା ଭାସ୍କର: ସୋସିଆଲ ମିଡିଆରେ ଏବେ ଏକ ଭିଡିଓ ଖୁବ ଭାଇରାଲ ହେଉଛି । ନିଜ ପିଲା ପାଇଁ ବାହୁନି ବାହୁନି କାନ୍ଦୁଛି ମା’ର ମମତାମୟୀ ଆଖି । ସୁନା ଶଙ୍ଖାଳିକୁ ଫେରାଇ ଆଣିବାକୁ କାକୁତି ମିନତି ହେଉଛି ବେସାହାରା ମା’ ।

ପିଲାଟିକୁ ଟ୍ରେନ ନେଇ ଚାଲିଯାଉଛି, ଆଉ ଏପଟେ ନିଜ ଛୁଆକୁ ପାଇବା ପାଇଁ ଛାତି ଫଟାଇ କାନ୍ଦୁଛି କରୁଣାମୟୀ ମା’ର ମନ । କାନ୍ଦି କାନ୍ଦି ଫୁଲି ଯାଇଛି ତାଙ୍କ ଆଖି, ଆଉ ତା’ପରେ ଘଟିଯାଇଛି ବଡ଼ ଚମତ୍କାର ।

ଜାଣନ୍ତୁ ପୂରା ମାମଲା: ଛୁଆକୁ ଧରି ଟ୍ରେନରେ ଯାତ୍ରା କରୁଥିଲା ମାଆ । ହଠାତ ଛୁଆକୁ ଭୋକ ଲାଗିବାରୁ ଟ୍ରେନ ରହିବା କ୍ଷଣି ତା ଛୁଆ ପାଇଁ କ୍ଷୀର ଆଣିବାକୁ ଟ୍ରେନରୁ ଓହ୍ଲାଇଛି ମାଆ । ଛୁଆ ପାଇଁ କ୍ଷୀର ଧରି ଆସିବାବେଳକୁ ଟ୍ରେନଟି ଛାଡିଦେଇଛି ।

ମାଆଟି ବିଚରା ହୋଇ କଣ କରିବ କିଛି ବୁଝିପାରିନଥିଲା । ଏଣେତେଣେ ପାଗଳଙ୍କ ଭଳି ତା ଛୁଆ ପାଇଁ ବିକଳ ହୋଇ ବୁଲୁଥିବା ବେଳେ ଦେବଦୂତ ସାଜି ପହଁଚିଗଲେ ଜଣେ ଗାର୍ଡ । ମହିଳାଙ୍କୁ ପଚାରି ତାଙ୍କ ଅସୁବିଧା ସବୁ ଶୁଣିବା ପରେ ଗାର୍ଡ ତାଙ୍କୁ ସାହାଯ୍ୟ କରିଛନ୍ତି । ମା’ର ମମତା ଆଉ ଛୁଆକୁ ପୁଣିଥରେ ଏକାଠି କରାଇଛନ୍ତି ଗାର୍ଡ ।

ମମତା ଆଗରେ ହାରିଲା ଟ୍ରେନର ସ୍ପିଡ: ଗାର୍ଡ ଜରୁରୀକାଳୀନ ପରିସ୍ଥିତିରେ ଟ୍ରେନକୁ ଆଟକାଇବା ପରେ କୋହ ସମ୍ଭାଳି ପାରିନଥିଲା ମା’ । ଲୁହ ଝର ଝର ଆଖିରେ ଟିକିଏ ବି ସମୟ ବିଳମ୍ବ ନ କରି ଦୈାଡିଥିଲା ଟ୍ରେନରେ ଚଢି ତା ଛୁଆ ପାଖକୁ ।

ଏ ଦୃଶ୍ୟ ଯେତିକି ଭାବବିହ୍ୱଳ ଥିଲା ଜଣେ ମାଆର ତା ଛୁଆ ପ୍ରତି ଅପାର ସ୍ନେହ ଭରା ମମତାକୁ ଦର୍ଶାଉଥିଲା । ଯାହା ହେଲେ ବି ସେ ପରା ମାଆ ।..

ସୋସିଆଲ ମିଡିଆରେ ଭିଡିଓ ଭାଇରାଲ: ଏ ହୃଦୟସ୍ପର୍ଶୀ ଭିଡିଓଟି ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯିଏ ବି ଦେଖୁଛି ତା ଆଖିରେ ଲୁହ ଜକେଇ ଆସୁଛି ।

ଲୋମ ଟାଙ୍କୁରି ଯାଉଛି ମହିଳାଙ୍କ ବିବଶତା ଦେଖି । ମହିଳାଜଣକ କିଏ ସେ ପରିଚୟ ମିଳିପାରିନଥିବା ବେଳେ ମହିଳା ଜଣକ ଯେ ଜଣେ ମା ଏକଥା ସ୍ପଷ୍ଟ ହୋଇଯାଇଛି ।