ଏବେ ଜୁନିୟର ଟିମ ପ୍ରସ୍ତୁତ କରିବେ ଟିମ ଇଣ୍ଡିଆର ଏହି ସୁପରଷ୍ଟାର ଖେଳାଳି: ମାଆଙ୍କ ହାତରେ କଲେ ଶୁଭାରମ୍ଭ
ନୂଆଦିଲ୍ଲୀ: ଏବେ ଜୁନିୟର ଖେଳାଳିମାନଙ୍କୁ ପ୍ରସ୍ତୁତ କରିବେ ଇଣ୍ଡିଆନ କ୍ରିକେଟ ଟିମର ଷ୍ଟାର ଖେଳାଳି ହନୁମା ବିହାରୀ । ସେଣ୍ଟ ଜନ୍ସ ସ୍ପୋର୍ଟସ ଫାଉଣ୍ଡେସନକୁ ୨ ଲକ୍ଷ ଟଙ୍କାର ଦାନ କରିଛନ୍ତି ଟିମ ଇଣ୍ଡିଆର ଏହି ଷ୍ଟାର ଖେଳାଳି । କେବଳ ସେତିକି ନୁହେଁ ୨୦ ଜଣ ଖେଳାଳିଙ୍କୁ ସ୍ପନସର କରିବେ ବୋଲି ମଧ୍ୟ ସୂଚନା ଦେଇଛନ୍ତି । ହନୁମା ବିହାରୀଙ୍କ ଏହି ନିଷ୍ପତ୍ତି ପରେ ଏବେ ସମସ୍ତେ ତାଙ୍କୁ ପ୍ରଶଂସା କରୁଛନ୍ତି ।
ଭାରତୀୟ କ୍ରିକେଟ ଟିମର ପୂର୍ବତନ କୋଚ ରବି ଶାସ୍ତ୍ରୀ ଏବଂ ସହଯୋଗୀ ଷ୍ଟାଫ ଭରତ ଅରୁଣ ଏବଂ ଆର ଶ୍ରୀଧରଙ୍କ ସହିତ ମିଶି ସେଣ୍ଟ ଜନ୍ସ ଫାଉଣ୍ଡେସନର ଶୁଭାରମ୍ଭ କରିଛନ୍ତି । ଏହି ଅବସରରେ କ୍ରିକେଟର ହନୁମା ବିହାରୀ ଫାଉଣ୍ଡେସନକୁ ୨ ଲକ୍ଷ ଟଙ୍କା ଅନୁଦାନ ରାଶି ପ୍ରଦାନ କରିଛନ୍ତି । ମାଆଙ୍କ ହାତରେ ଏହି ଚେକ ସେ ଫାଉଣ୍ଡେସନକୁ ହସ୍ତାନ୍ତର କରିଛନ୍ତି । ଏହା ବ୍ୟତୀତ ୨୦ ଜଣ ଜୁନିୟର ଖେଳାଳିଙ୍କୁ ସେ ସ୍ପନସର କରିବେ ବୋଲି ମଧ୍ୟ ଘୋଷଣା କରିଛନ୍ତି । ଏହା ପୂର୍ବରୁ କରୋନା ସମୟରେ ଅନେକ ଲୋକଙ୍କୁ ସାହାଯ୍ୟ କରି ପ୍ରଶଂସାର ପାତ୍ର ହୋଇଥିଲେ ହନୁମା ବିହାରୀ ।
ଭାରତ ପାଇଁ ଖେଳାଳି ଖୋଜି ବାହାର କରିବା ଏବଂ ସେମାନଙ୍କୁ ପ୍ରସ୍ତୁତ କରିବା ହେଉଛି ଏହି ଫାଉଣ୍ଡେସନର ଉଦ୍ଦେଶ୍ୟ ବୋଲି କହିଛନ୍ତି ପୂର୍ବତନ କୋଚ ରବି ଶାସ୍ତ୍ରୀ । ଏଠାକୁ ଆସୁଥିବା ଖେଳାଳିମାନଙ୍କୁ କୋଚିଙ୍ଗ ବ୍ୟତୀତ କାମ, ନେତିକତା ଏବଂ ଅନୁଶାସନ ଉପରେ ଧ୍ୟାନ ଦେବା ସହ ସେମାନଙ୍କୁ ଜଣେ ଚମ୍ପିଆନ ବନିବାର ଗୁଣ ଉପରେ ବିକଶିତ କରାଯିବ ।
