ଶେଖ୍ ହାସିନା ବାଂଲାଦେଶ ଛାଡ଼ିବା ଦିନଟିକୁ ଏହିପରି ପାଳନ କରିବେ ୟୁନୁସ୍ ସରକାର
ଢାକା,୨୦ା୬: ୨୦୨୪ରେ ଏହି ଦିନରେ ଦେଶରେ ଜନ ଆନ୍ଦୋଳନ ଯୋଗୁ ତତ୍କାଳୀନ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କୁ ଇସ୍ତଫା ଦେଇ ବାଂଲାଦେଶ ଛାଡିବାକୁ ପଡିଥିଲା। ଏହି ଘଟଣାର ଗୋଟିଏ ବର୍ଷ ପରେ ଏବେ ୟୁନୁସ୍ ସରକାର ଏହି ଦିନକୁ ଏକ ଜାତୀୟ ପ୍ରତୀକ ଭାବରେ ପ୍ରତିଷ୍ଠା କରିବାକୁ ଯାଉଛି। ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ମହମ୍ମଦ ୟୁନୁସ୍ ସରକାର ଏହି ଦିନ ଏକ ସାଧାରଣ ଛୁଟି ଘୋଷଣା କରିଛନ୍ତି। ୟୁନୁସ୍ ଅଗଷ୍ଟ ୫କୁ ‘ଛାତ୍ର-ଜନ ଆନ୍ଦୋଳନ ଦିବସ’ ଭାବରେ ପାଳନ କରିବାକୁ ନିଷ୍ପତ୍ତି ନେଇଛନ୍ତି।
ଅନ୍ତରୀଣ ସରକାରଙ୍କ ସାଂସ୍କୃତିକ ପରାମର୍ଶଦାତା ଏବଂ ପ୍ରଖ୍ୟାତ ଚଳଚ୍ଚିତ୍ର ନିର୍ମାତା ମୁସ୍ତାଫା ସରୱାର ଫାରୁକି ଶୁକ୍ରବାର ଢାକାର ବୈଦେଶିକ ସେବା ଏକାଡେମୀରେ ଏହି ନିଷ୍ପତ୍ତି ଘୋଷଣା କରିଛନ୍ତି। ସେ କହିଛନ୍ତି, ୫ ଅଗଷ୍ଟ, ୨୦୨୪ରେ ଘଟିଥିବା ଐତିହାସିକ ପରିବର୍ତ୍ତନକୁ ପାଳନ କରିବା ପାଇଁ ୧ ଜୁଲାଇରୁ ୫ ଅଗଷ୍ଟ ପର୍ଯ୍ୟନ୍ତ ଏକ ଶୃଙ୍ଖଳା ବିଶେଷ କାର୍ଯ୍ୟକ୍ରମ ଆୟୋଜନ କରାଯିବ, ଯାହାର ମୁଖ୍ୟ ଲକ୍ଷ୍ୟ ୧୪ ଜୁଲାଇରୁ ଆରମ୍ଭ ହେଉଥିବା କାର୍ଯ୍ୟକ୍ରମଗୁଡ଼ିକ ହେବ।
ଫାରୁକି କହିଛନ୍ତି, ଏହି ଦିନଟି ଐତିହାସିକ ଜନ ଆନ୍ଦୋଳନ ପାଇଁ ଉତ୍ସର୍ଗୀକୃତ, ଯାହା ସମଗ୍ର ଦେଶକୁ ଏକତ୍ରିତ କରିଥିଲା ଏବଂ ଶେଖ୍ ହାସିନା ସରକାରଙ୍କ ବିରୁଦ୍ଧରେ ଗଣତାନ୍ତ୍ରିକ ପରିବର୍ତ୍ତନ ପାଇଁ ପଥ ପ୍ରଶସ୍ତ କରିଥିଲା। ୫ ଅଗଷ୍ଟ ଆଉ କେବଳ ଏକ ତାରିଖ ନୁହେଁ, ବରଂ ବାଂଲାଦେଶୀ ନାଗରିକଙ୍କ ସାମୂହିକ ଚେତନା ଏବଂ ଗଣତାନ୍ତ୍ରିକ ସଂଘର୍ଷର ପ୍ରତୀକ ପାଲଟିଛି।
୫ ଅଗଷ୍ଟ ୨୦୨୪ରେ, ବ୍ୟାପକ ପ୍ରତିବାଦ ଏବଂ ଗଣଆନ୍ଦୋଳନ ଯୋଗୁ ବାଂଲାଦେଶର ତତ୍କାଳୀନ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କୁ ପଦ ଛାଡି ଦେଶ ଛାଡିବାକୁ ବାଧ୍ୟ କରାଯାଇଥିଲା। ସେହି ସମୟରେ ଢାକା ସମେତ ଦେଶବ୍ୟାପୀ ହିଂସାତ୍ମକ ପ୍ରତିବାଦ କରାଯାଇଥିଲା, ଯେଉଁଥିରେ ହଜାର ହଜାର ଛାତ୍ର, ନାଗରିକ ଏବଂ ସାମାଜିକ କର୍ମୀ ରାସ୍ତାକୁ ଓହ୍ଲାଇଥିଲେ।
ହାସିନା ଦେଶ ଛାଡିବା ମାତ୍ରେ ରାଜଧାନୀରେ ତାଙ୍କ ସରକାରୀ ବାସଭବନ ଉପରେ ପ୍ରତିବାଦକାରୀ ଆକ୍ରମଣ କରିଥିଲେ। ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ବାସଭବନରେ ଭଙ୍ଗାରୁଜା କରାଯାଇଥିଲା ଏବଂ ଫର୍ଣ୍ଣିଚରଠାରୁ ଆରମ୍ଭ କରି ବ୍ୟକ୍ତିଗତ ଜିନିଷପତ୍ର ପର୍ଯ୍ୟନ୍ତ ସବୁକିଛି ଲୁଟ୍ କରାଯାଇଥିଲା।
ହାସିନା ସରକାରଙ୍କ ପତ୍ତନ ପରେ, ନୋବେଲ ପୁରସ୍କାର ବିଜେତା ଅର୍ଥନୀତିଜ୍ଞ ମହମ୍ମଦ ୟୁନୁସଙ୍କ ନେତୃତ୍ୱରେ ଏକ ମଧ୍ୟବର୍ତ୍ତୀକାଳୀନ ସରକାର ଗଠନ କରାଯାଇଥିଲା। ଏହି ସରକାର ଗତ ଗୋଟିଏ ବର୍ଷ ମଧ୍ୟରେ ଅନେକ ରାଜନୈତିକ ଏବଂ ପ୍ରଶାସନିକ ସଂସ୍କାର ଦିଗରେ ପଦକ୍ଷେପ ନେଇଛି।