କ୍ରିକେଟରୁ ଅବସର ଘୋଷଣା କଲେ ଏହି ଖେଳାଳି: ବିଦାୟ ନେବେ ଗୁଜୁରାଟ ଟାଇଟନ୍ସର ଷ୍ଟାର କ୍ରିକେଟର

ନୂଆଦିଲ୍ଲୀ: ଆଇପିଏଲ-୨୦୨୪ ମାର୍ଚ୍ଚ ୨୨ ତାରିଖରେ ଆରମ୍ଭ ହେବାକୁ ଯାଉଛି । କିନ୍ତୁ ଏହାପୂର୍ବରୁ ଗୁଜୁରାଟ ଟାଇଟନ୍ସର ଷ୍ଟାର ଖେଳାଳି ଏବେ ଅବସର ଘୋଷଣା କରିଛନ୍ତି । ତେବେ ତାଙ୍କର ଏହି ସନ୍ନ୍ୟାସ ଘୋଷଣା ଆଇପିଏଲ ପାଇଁ ନୁହେଁ । ଅଷ୍ଟ୍ରେଲିଆ କ୍ରିକେଟର ମାଥ୍ୟୁ ୱେଡ ଶେଫିଲ୍ଡ ଶିଲ୍ଡ ଫାଇନାଲ ପରେ ପ୍ରଥମ ଶ୍ରେଣୀ କ୍ରିକେଟରୁ ବିଦାୟ ନେବା ପାଇଁ ଘୋଷଣା କରିଛନ୍ତି । ପର୍ଥରେ ଖେଳାଯିବାକୁ ଥିବା ପଶ୍ଚିମୀ ଅଷ୍ଟ୍ରେଲିଆ ବିପକ୍ଷ ତସ୍ମାନିୟାର ପ୍ରତିନିଧିତ୍ୱ କରି ନିଜର ୧୬୬ତମ ଫାଷ୍ଟ କ୍ଲାସ ମ୍ୟାଚ ଖେଳିବେ ମାଥ୍ୟୁ ୱେଡ । ଏହି ମ୍ୟାଚ ପରେ ସେ କ୍ରିକେଟର ଏହି ଫର୍ମାଟରୁ ବିଦାୟ ନେବେ ବୋଲି ଘୋଷଣା କରିଛନ୍ତି ।

ତେବେ ଫାଷ୍ଟ କ୍ଲାସ କ୍ରିକେଟରୁ ବିଦାୟ ନେବା ପରେ ମଧ୍ୟ ସୀମିତ ଓଭର କ୍ରିକେଟ ଖେଳିବା ଜାରି ରଖିବେ । ଏହାସହିତ ଜୁନରେ ହେବାକୁ ଥିବା ଟି-୨୦ ବିଶ୍ୱକପରେ ଅଷ୍ଟେଲିଆ ଦଳରେ ମଧ୍ୟ ତାଙ୍କୁ ସାମିଲ କାଯାଇପାରେ । କ୍ରିକେଟର ଏହି ଯାତ୍ରା ସମୟରେ ପରିବାରର ସମର୍ଥନ ଏବଂ ବଳିଦାନକୁ ସ୍ୱୀକାର କରିବା ସହ ମାଥ୍ୟୁ ୱେଡନିଜ ପ୍ରିୟଜନଙ୍କୁ କୃତଜ୍ଞତା ଜ୍ଞାପନ କରିଛନ୍ତି । ଏହାସହିତ ସେ ନିଜ ଦଳ ପାଇଁ ପ୍ୟାଗି ଗ୍ରୀନ୍ କ୍ୟାପ ପିନ୍ଧିବା ସମୟକୁ ସେ ମନେ ପକାଇଛନ୍ତି । ୨୦୧୨ରେ ଡେବ୍ୟୁ କରିଥିବା ୱେଡ ୨୦୨୧ ସୁଦ୍ଧା ମୋଟ ୩୬ଟି ଟେଷ୍ଟ ମ୍ୟାଚ ଖେଳିଛନ୍ତି ।

ମାଥ୍ୟୁ ୱେଡ କହିଛନ୍ତି, ‘ସର୍ବପ୍ରଥମେ ମୁଁ ମୋର ପରିବାର, ମୋ ପତ୍ନୀ ଏବଂ ପିଲାମାନଙ୍କୁ ମୋର କ୍ୟାରିଅର ସମୟରେ ଯେଉଁ ବଳିଦାନ ଦେଇଛି ସେଥିପାଇଁ ମୁଁ ଧନ୍ୟବାଦ ଜଣାଉଛି । କାରଣ ମୁଁ ଅଷ୍ଟ୍ରେଲିଆ ଏବଂ ବିଶ୍ୱକୁ ଏକ ରେଡ୍ ବଲ୍ କ୍ରିକେଟର ଭାବେ ପ୍ରତିନିଧିତ୍ୱ କରିଛି। ମାଥ୍ୟୁ ୱେଡ କହିଛନ୍ତି, ‘ଲମ୍ବା ଫର୍ମାଟ ଖେଳ ଦ୍ୱାରା ଦିଆଯାଇଥିବା ଚ୍ୟାଲେଞ୍ଜଗୁଡ଼ିକୁ ମୁଁ ପୁରା ଉପଭୋଗ କରିଛି । ଯଦିଓ ସୀମିତ ଓଭର କ୍ରିକେଟ୍ ଖେଳିବା ଜାରି ରଖିବି, ମୋ ଦେଶ ପାଇଁ ଖେଳିବାବେଳେ ବ୍ୟାଗି ସବୁଜ ପିନ୍ଧିବା ମୋ କ୍ୟାରିୟରର ମୁଖ୍ୟ ଆକର୍ଷଣ ହୋଇଛି । ୱେଡ୍ ପ୍ରଥମ ଶ୍ରେଣୀ କ୍ରିକେଟ୍ ରେ ହାରାହାରି ୪୦.୮୧ ରେ ୧୬୫ ମ୍ୟାଚ୍ ରେ ୯୧୮୩ ରନ୍ ସଂଗ୍ରହ କରିଛି ।