ଆଜି ପୋଲିସ ସ୍ମାରକୀ ଦିବସ: କାହିଁକି ପାଳନ ହୁଏ ସ୍ୱତନ୍ତ୍ର କାର୍ଯ୍ୟକ୍ରମ? ଜାଣନ୍ତୁ ସେଦିନର କାହାଣୀ

ଓଡ଼ିଶା ଭାସ୍କର: ଆଜି ସାରା ଭାରତ ପଳନ କରୁଛି ୬୫ ତମ ପୋଲିସ ସ୍ମାରକୀ ଦିବସ । ପ୍ରତ୍ୟେକ ବର୍ଷ ଅକ୍ଟୋବର ୨୧ ତାରିଖକୁ ପୋଲିସ ସ୍ମୃତି ଦିବସ ବା ପୋଲିସ ସ୍ମାରକୀ ଦିବସ ଭାବରେ ପାଳନ କରାଯାଏ । ଏହାକୁ ପୋଲିସ ସହିଦ ଦିବସ ବୋଲି ମଧ୍ୟ କୁହାଯାଏ । ଆଜି ଏହି ଉତ୍ସବ ଉପଲକ୍ଷେ ବିଭିନ୍ନ ସ୍ଥାନରେ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହେଉଛି । ରାଜଧାନୀ ଦିଲ୍ଲୀରେ ଅନୁଷ୍ଠିତ ହେଉଥିବା ଏହି ସ୍ୱତନ୍ତ୍ର କାର୍ଯ୍ୟକ୍ରମରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସମ୍ବୋଧନ କରୁଛନ୍ତି । ୧୯୫୯ ମସିହା ଚୀନ ବିପକ୍ଷ ଲଢେଇରେ ସହିଦ ହୋଇଥିବା ବୀର ପୋଲିସ ଅଫିସରଙ୍କ ସମ୍ମାନାର୍ଥେ ଏହି ଦିବସ ପାଳନ କରାଯାଉଛି । ଏହି ଯୁଦ୍ଧରେ କେରିପୁବଲ ରଣ ବାଙ୍କୁର ସର୍ବୋଚ୍ଚ ବଳିଦାନ ଦେଇଥିଲେ । ଏହି ବଳିଦାନକୁ ଆଜି ପର୍ଯ୍ୟନ୍ତ ସାରା ଦେଶବାସୀ ନତମସ୍ତକ ହୋଇ ସମ୍ମାନ ଜଣାଉଛନ୍ତି ।

କାହିଁକି ପାଳନ ହୁଏ ପୋଲିସ ସ୍ମୃତି ଦିବସ?

୧୯୫୯ ମସିହା ଲଦ୍ଦାଖର ହଟ୍ ସ୍ପ୍ରିଙ୍ଗ ଉପରେ ଆକ୍ରମଣ କରିଥିଲା ଚୀନ ସେନା । ଦେଶର ସୁରକ୍ଷା ଦାୟିତ୍ୱରେ ନିୟୋଜିତ ହୋଇଥିବା ୨୦ ଜଣ ସୈନିକଙ୍କ ଉପରେ ଆକ୍ରମଣ କରିଥିଲା ଚୀନ୍ । ଏହି ଯୁଦ୍ଧରେ ଭାରତର ୧୦ ଜଣ ବୀର ପୋଲିସ ଅଫିସର ସହିଦ ହୋଇଥିଲେ ଏବଂ ୭ ଜଣଙ୍କୁ ଜେଲ ପଠାଇ ଦେଇଥିଲା ଶତ୍ରୁ ରାଷ୍ଟ୍ର । ସେହିଦିନରୁ ଦେଶର ସୁରକ୍ଷା ଦାୟିତ୍ୱରେ ପ୍ରାଣ ଆହୁତି ଦେଇଥିବା ପୋଲିସ କର୍ମୀମାନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଏହି ଦିବସକୁ ପାଳନ କରାଯାଏ ।

କ’ଣ ହୋଇଥିଲା ସେଦିନ?

ଚିବ୍ଦତରେ ଚୀନ ସହ ଭାରତର ୨୫୦୦ ମିଲ ଲମ୍ବା ସୀମା ଲାଗି ରହିଛି । ୧୯୫୯ ଅକ୍ଟୋବର ୨୧ ତାରିଖରେ ଏହି ସୀମାର ସୁରକ୍ଷା ଦାୟିତ୍ୱ ଭାରତର ପୋଲିସକର୍ମୀଙ୍କ ଉପରେ ନ୍ୟସ୍ତ ଥିଲା । ଚୀନ୍ ଆକ୍ରମଣର ଗୋଟିଏ ଦିନ ପୂର୍ବରୁ(ଅକ୍ଟୋବର ୨୦) ଭାରତ ତୃତୀୟ ବାଟାଲିୟନର ଏକ କମ୍ପାନୀକୁ ଉତ୍ତର-ପୂର୍ବ ଲଦ୍ଦାଖର ହଟ୍ ସ୍ପ୍ରିଙ୍ଗ ଅଞ୍ଚଳରେ ନିୟୋଜିତ କରିଥିଲା । ଏହି କମ୍ପାନୀକୁ ୩ଟି ବିଭାଗରେ ଭାଗ କରି ସୀମର ସୁରକ୍ଷାର ଦାୟିତ୍ୱ ଦେଇଥିଲା ଭାରତ । ସେଦିନ ମଧ୍ୟ ସୀମାରେ ୩ଟି ଦଳ ପ୍ରହରା ଦେଉଥିବା ବେଳେ ୨ଟି ଗ୍ରୁପ୍ ଫେରିଆସିଥିଲେ, କିନ୍ତୁ ତୃତୀୟ ଟିମ୍ ୨୧ ତାରିଖ ସକାଳ ପର୍ଯ୍ୟନ୍ତ ଫେରି ନଥିଲା । ଏହାପରେ ଅକ୍ଟୋବର ୨୧ ତାରିଖରେ ତତ୍କାଳୀନ ଡିସିଆଇଓ କରମ ସିଂହଙ୍କ ନେତୃତ୍ୱରେ ଏହି ଟିମକୁ ଖୋଜିବା ପାଇଁ ବାହାରିଥିଲା ସେନା । ଏହି ଦଳରେ ପ୍ରାୟ ୨୦ ଜଣ ପୋଲିସ କର୍ମୀ ସାମିଲ ରହିଥିଲେ ।

ପୋଲିସ ପକ୍ଷରୁ ଏହି ସର୍ଚ୍ଚ ଅପରେସନ୍ ବେଳେ ଚୀନ୍ ସେନା ପଛପଟୁ ଆକ୍ରମଣ କରିଥିଲା । ତେବେ ନିଜ ସାଥୀମାନଙ୍କୁ ଖୋଜିବାକୁ ବାହାରିଥିବା ଭାରତୀୟ ସେନା ଏହି ଆକ୍ରମଣ ପାଇଁ ପ୍ରସ୍ତୁତ ନଥିଲେ । ଯଥେଷ୍ଟ ଅସ୍ତ୍ରଶସ୍ତ୍ର ନଥିବାରୁ ଭାରତର ୧୦ ଜଣ ବୀର ଯବାନ୍ ଏହି ଆକ୍ରମଣରେ ସହିଦ ହୋଇ ଯାଇଥିଲେ । ଏହାବ୍ୟତୀତ ଅଧିକାଂଶ ଯବାନ୍ ଆହତ ମଧ୍ୟ ହୋଇଥିଲେ ଏବଂ ୭ ଜଣ ଗୁରୁତର ଅବସ୍ଥାରେ ରହିଥିଲେ । ତେବେ ଚୀନ୍ ସେନା ଏହି ଗୁରୁତର ଆହତ ସୈନ୍ୟମାନଙ୍କୁ ବନଦୀ କରି ନେଇଥିଲା । ତେବେ ପରେ ଏହି ବନ୍ଦୀ ସୈନିକ ଚୀନ୍ କବଳରୁ ଖସି ଆସିଥିଲେ । ସେହି ଦିନଠାରୁ ଅକ୍ଟୋବର ୨୧ ତାରିଖକୁ ପୋଲିସ ସ୍ମୃତି ଦିବସ ଭାବରେ ପାଳନ କରିବାକୁ ଘୋଷଣା ହୋଇଥିଲା । ୧୯୬୦ ମସିହାରେ ଏହି ଉତ୍ସବ ପାଳନ ଆରମ୍ଭ ହୋଇଥିବା ବେଳେ ଆଜି ୬୫ ତମ ଦିବସ ପାଳନ କରୁଛି ସାରା ଭାରତ ।