କନ୍ଦାଇଲା ଟମାଟୋ ଦର, ବର୍ଷାରେ ଆହୁରି ବଢିବ ମୂଲ୍ୟ

ନୂଆଦିଲ୍ଲୀ: ଚଳିତ ବର୍ଷର ପ୍ରଚଣ୍ଡ ଉତ୍ତାପ ପନିପରିବା ଏବଂ ଫଳ ଉତ୍ପାଦନ ଉପରେ ଖରାପ ପ୍ରଭାବ ପକାଇଛି। ଏହି କାରଣରୁ ଦେଶରେ ପିଆଜ, ଆଳୁ ଏବଂ ଟମାଟୋ ଭଳି ଅତ୍ୟାବଶ୍ୟକ ପନିପରିବାର ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଉଛି। ବଜାରରେ ଏହି ପନିପରିବା ଅଭାବ ହେତୁ ମୂଲ୍ୟ କ୍ରମାଗତ ଭାବେ ବୃଦ୍ଧି ପାଉଛି। ମୁମ୍ବାଇ ଏବଂ ଏହାର ଆଖପାଖ ଅଞ୍ଚଳରେ ଲୋକଙ୍କୁ କେଜି ପିଛା ପ୍ରାୟ ୧୦୦ ଟଙ୍କା ମୂଲ୍ୟରେ ଟମାଟୋ କିଣିବାକୁ ପଡୁଛି। ଅନଲାଇନ୍ ପ୍ଲାଟଫର୍ମରେ ମଧ୍ୟ ଟମାଟୋର ମୂଲ୍ୟ କିଲୋଗ୍ରାମ ପିଛା ୯୦ ରୁ ୯୫ ଟଙ୍କା ପର୍ଯ୍ୟନ୍ତ ଚାଲିଛି। ମହାରାଷ୍ଟ୍ର ବ୍ୟତୀତ ତାମିଲନାଡୁ, କର୍ଣ୍ଣାଟକ ଏବଂ ଆନ୍ଧ୍ରପ୍ରଦେଶରେ ଟମାଟୋ ମୂଲ୍ୟ କିଲୋଗ୍ରାମ ପିଛା ୮୦ ରୁ ୧୦୦ ଟଙ୍କା ମଧ୍ୟରେ ଚାଲିଛି।

ପ୍ରତିବର୍ଷ ମୋୖସୁମୀ ସମୟରେ ପନିପରିବା ଦର ବୃଦ୍ଧି ପାଇଥାଏ। ଫସଲ ଉପରେ ବର୍ଷାର ପ୍ରଭାବ ହେତୁ ପ୍ରତିବର୍ଷ ମୂଲ୍ୟ ବୃଦ୍ଧି ଆରମ୍ଭ ହୁଏ। କିନ୍ତୁ ଚଳିତ ବର୍ଷର ଅତ୍ୟଧିକ ଉତ୍ତାପ ପନିପରିବା ଉତ୍ପାଦନରେ ମଧ୍ୟ ବ୍ୟାପକ କ୍ଷତି ଘଟାଇଛି।ଏହି କାରଣରୁ ମୋୖସୁମୀ ଆସିବା ପୂର୍ବରୁ ମଧ୍ୟ ମୂଲ୍ୟ ବୃଦ୍ଧି ପାଇବାରେ ଲାଗିଛି। ବର୍ଷା ହେତୁ କେବଳ ଉତ୍ପାଦନ ପ୍ରଭାବିତ ହୁଏ ନାହିଁ ବରଂ ପ୍ୟାକେଜିଂ ଏବଂ ପରିବହନ ସମୟରେ ବିପୁଳ ପରିମାଣର ପନିପରିବା ନଷ୍ଟ ହୋଇଯାଏ।