ପହଲଗାମରେ ଆତଙ୍କୀ ଆକ୍ରମଣ ପରେ…କାଶ୍ମୀର ଯିବାକୁ ଲାଗୁଛି ଭୟ, ବାତିଲ ହେଉଛି ଟିକେଟ୍‌

ନୂଆଦିଲ୍ଲୀ: କାଶ୍ମୀର ଘାଟିରେ ପର୍ଯ୍ୟଟକଙ୍କ ଉପରେ ହୋଇଥିବା ଆତଙ୍କୀ ଆକ୍ରମଣ ପରେ ଅନେକ ପର୍ଯ୍ୟଟକଙ୍କ ମୃତ୍ୟୁ ହୋଇଛି। କିନ୍ତୁ ଏହାର ସବୁଠାରୁ ବଡ଼ ଆର୍ôଥକ କ୍ଷତି ସ୍ଥାନୀୟ ଲୋକମାନେ ବହନ କରିବେ।

ଆତଙ୍କୀ ଆକ୍ରମଣର ଭୟ ପର୍ଯ୍ୟଟକଙ୍କୁ ଏପରି ଘାରିଛି ଆଗାମୀ ୪ରୁ ୫ ମାସ ପର୍ଯ୍ୟନ୍ତ ବୁକିଂ ବାତିଲ କରୁଛନ୍ତି ପର୍ଯ୍ୟଟକ। ଏହାର ସିଧା ପ୍ରଭାବ କାଶ୍ମୀର ଲୋକ ଏବଂ ସେଠାକାର ଅର୍ଥ ବ୍ୟବସ୍ଥା ଉପରେ ପଡ଼ିବ। କ୍ଷତିର ଏହି ଆକଳନ ବହୁତ ଅଧିକ ହୋଇପାରେ।

ମୋଦୀ ସରକାର ଧାରା ୩୭୦ ହଟାଇବା ପରେ କାଶ୍ମୀର ଘାଟିରେ ସ୍ଥିତିରେ ପରିବର୍ତ୍ତନ ଆସିଥିଲା। ଜମ୍ମୁ କଶ୍ମୀରର ମୁଖ୍ୟମନ୍ତ୍ରୀ ଅମର ଅବଦ୍ଦୁଲା ଏହି ସୂଚନା ଦେଇଥିଲେ। ୨୦୨୪ରେ ଜମ୍ମୁକାଶ୍ମୀରକୁ ବୁଲିବାକୁ ୨ କୋଟି ୩୫ ଲକ୍ଷ ପର୍ଯ୍ୟଟକ ଆସିଥିଲେ।

ସେହିପରି ୨୦୨୩ରେ ୨କୋଟି ୧୧ ଲକ୍ଷ, ୨୦୨୨ରେ ୧ କୋଟି ୮୯ ଲକ୍ଷ ପର୍ଯ୍ୟଟକ କାଶ୍ମୀର ବୁଲିବାକୁ ଆସିଥିଲେ।

ଏହି ଆତଙ୍କବାଦୀ ଆକ୍ରମଣ ପରେ କାଶ୍ମୀରକୁ ଆସୁଥିବା ପର୍ଯ୍ୟଟକଙ୍କ ରେକର୍ଡ ଭାଙ୍ଗିବା ସଂଖ୍ୟା ହ୍ରାସ ପାଇପାରେ କାରଣ ବହୁ ସଂଖ୍ୟକ ପର୍ଯ୍ୟଟକ ସେମାନଙ୍କର ବୁକିଂ ବାତିଲ କରିବା ଆରମ୍ଭ କରିଦେଇଛନ୍ତି।

ଚାଲୋ ଘୁମନେ ଟୁର୍ସ ଆଣ୍ଡ ଟ୍ରାଭେଲର ଅପରେସନ୍ସ ମୁଖ୍ୟ କୀର୍ତ୍ତି ଅଗ୍ରୱାଲ କୁହନ୍ତି ଯେ ପହଲଗାମ ଆକ୍ରମଣ ପରେ, ମୋତେ ଆଗାମୀ ୪-୫ ମାସ ପାଇଁ ସମସ୍ତ ବୁକିଂ ବାତିଲ କରିବା ପାଇଁ ଫୋନ୍ ଆସୁଛି।

ଏହି ଆକ୍ରମଣ ସ୍ଥାନୀୟ ବ୍ୟବସାୟ ଏବଂ ପର୍ଯ୍ୟଟନର ବିପୁଳ କ୍ଷତି କରିବ। ଅନ୍ୟ ଏକ ଟ୍ରାଭେଲ ଏଜେନ୍ସି ଲେ ଟ୍ରାଭେଲୱାର୍ଲ୍ଡର ଏମଡି ସଞ୍ଜୟ ଡାଙ୍ଗ କହିଛନ୍ତି ଯେ ଆମର ଜଣେ ଗ୍ରାହକ ତାଙ୍କ ପରିବାର ସହିତ ଏକ ଯାତ୍ରା ପାଇଁ ୧୪ଟି ରୁମ୍ ବୁକ୍ କରିଥିଲେ, କିନ୍ତୁ ଆକ୍ରମଣ ପରେ ଏହାକୁ ବାତିଲ କରିଦିଆଗଲା। ସେ କହିଛନ୍ତି ଯେ ହୋଟେଲ ଏବଂ ବିମାନ ବୁକିଂ ମଧ୍ୟ ଦ୍ରୁତ ଗତିରେ ବାତିଲ ହେଉଛି।