ଇରାନରୁ ଛାତ୍ରଙ୍କୁ ଆଣି ଆଜି ରାତିରେ ଭାରତରେ ପହଞ୍ଚିବ ଦୁଇ ବିମାନ

ନୂଆଦିଲ୍ଲୀ/ତେହେରାନ,୨୦ା୬: ଇରାନ-ଇସ୍ରାଏଲ ମଧ୍ୟରେ ବଢ଼ୁଥିବା ଉତ୍ତେଜନାରେ ଭାରତ ସରକାର ଏହାର ନାଗରିକଙ୍କ ସୁରକ୍ଷାକୁ ପ୍ରାଥମିକତା ଦେଇ ଏକ ସ୍ୱତନ୍ତ୍ର ଅଭିଯାନ ‘ଅପରେସନ ସିନ୍ଧୁ’ ଆରମ୍ଭ କରିଛନ୍ତି। ଏହି ଅଭିଯାନ ବିଶେଷ ଭାବରେ ଇରାନରେ ଫସି ରହିଥିବା ଭାରତୀୟ ନାଗରିକଙ୍କ ନିରାପଦ ଏବଂ ଶୀଘ୍ର ପ୍ରତ୍ୟାବର୍ତ୍ତନ ସୁନିଶ୍ଚିତ କରିବା ପାଇଁ ଆରମ୍ଭ କରାଯାଇଛି। ଦୁଇ ଦେଶ ମଧ୍ୟରେ ଯୁଦ୍ଧ ଆରମ୍ଭ ହେବା ଯୋଗୁ ଶହଶହ ଭାରତୀୟ ଛାତ୍ର ଇରାନରେ ଫସି ରହିଛନ୍ତି। ଛାତ୍ରଙ୍କ ପରିବାର ସେମାନଙ୍କ ପ୍ରତ୍ୟାବର୍ତ୍ତନ ପାଇଁ ସରକାରଙ୍କ ନିକଟରେ ନିବେଦନ କରିଥିଲେ, ଯାହା ପରେ ସେମାନଙ୍କୁ ଫେରାଇ ଆଣିବା ପାଇଁ ଏହି ଅଭିଯାନ ଆରମ୍ଭ କରାଯାଇଥିଲା।

ସୂତ୍ର ଅନୁସାରେ, ଆଜି ରାତିରେ ଦୁଇଟି ବିମାନ ଭାରତରେ ପହଞ୍ଚିବ। ପ୍ରଥମ ବିମାନ ମଶହାଦ (ଇରାନ) ରୁ ବାହାରିଛି ଏବଂ ରାତି ପ୍ରାୟ ୧୧:୩୦ ରେ ଦିଲ୍ଲୀରେ ଅବତରଣ କରିବ ବୋଲି ଆଶା କରାଯାଉଛି। ଦ୍ୱିତୀୟ ବିମାନ ଆଶଗାବାତ (ତୁର୍କମେନିସ୍ତାନ) ରୁ ଆସୁଛି, ଯାହା ପ୍ରାୟ ଭୋର ୩ ଟାରେ ଦିଲ୍ଲୀରେ ପହଞ୍ଚିବ। ଏହି ଅଭିଯାନ ବୈଦେଶିକ ମନ୍ତ୍ରଣାଳୟ, ଭାରତୀୟ ଦୂତାବାସ ଏବଂ ସମ୍ପୃକ୍ତ ସଂସ୍ଥାଗୁଡ଼ିକର ମିଳିତ ସମନ୍ୱୟରେ କରାଯାଉଛି। ଭାରତ ସରକାରଙ୍କ ଲକ୍ଷ୍ୟ ହେଉଛି ଇରାନ ସମେତ ପଶ୍ଚିମ ଏସିଆର ସଂଘର୍ଷପୂର୍ଣ୍ଣ ଅଞ୍ଚଳରେ ରହୁଥିବା ସମସ୍ତ ଭାରତୀୟ ନାଗରିକଙ୍କ ସୁରକ୍ଷିତ ପ୍ରତ୍ୟାବର୍ତ୍ତନକୁ ଶୀଘ୍ର ସୁନିଶ୍ଚିତ କରିବା।