ସିଏମ ଯୋଗୀଙ୍କ ବଡ଼ ଘୋଷଣା, ୧୦୦ ଦିନରେ ୧୦ ହଜାର ଚାକିରି ଦେବେ ୟୁପି ସରକାର
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗୁରୁବାର ଘୋଷଣା କରିଛନ୍ତି ଯେ ରାଜ୍ୟର ଯୁବକଙ୍କୁ ୧୦୦ ଦିନରେ ୧୦ ହଜାର ନିଯୁକ୍ତି ଦେବେ । ରାଜ୍ୟର ନିଯୁକ୍ତି କମିଶନ, ବୋର୍ଡ ଅଧ୍ୟକ୍ଷଙ୍କ ସହ ବୈଠକ ପରେ ଏହି ଘୋଷଣା କରିଛନ୍ତି ଯୋଗୀ । ସେ କହିଛନ୍ତି ରାଜ୍ୟ ସରକାର ଯୁବକଙ୍କୁ ସରକାରୀ ଚାକିରି ସହ ଯୋଡ଼ିବା ଏବଂ ତାଙ୍କୁ ରୋଜଗାର ଦେବା ପାଇଁ ପ୍ରତିବଦ୍ଧ । ଯୋଗୀ କହିଛନ୍ତି ଗତ ପାଞ୍ଚ ବର୍ଷରେ ସାଢ଼େ ଚାରି ଲକ୍ଷ ଯୁବକଙ୍କୁ ସରକାରୀ ଚାକିରି ଦିଆଯାଇଛି । ଦ୍ୱିତୀୟ ପାଳିରେ ୧୦୦ ଦିନରେ ୧୦୦୦୦ ହଜାର ଯୁବକଙ୍କୁ ନିଯୁକ୍ତି ପାଇଁ ନିର୍ଦ୍ଦେଶ ଦିଆସରିଛି । ସବୁ ବିଭାଗକୁ ନିର୍ଦ୍ଦେଶ ଦିଆସରିଛି ।
ମୁଖ୍ୟମନ୍ତ୍ରୀ କହିଛନ୍ତି ଯେ ନିଯୁକ୍ତି ପ୍ରକ୍ରିୟାରେ ସଂରକ୍ଷଣ ନିୟମକୁ ସଂପୂର୍ଣ୍ଣ ଭାବରେ ପାଳନ କରାଯିବ । ନିଯୁକ୍ତି ପ୍ରକ୍ରିୟା ସଂପୂର୍ଣ୍ଣ ଭାବେ ସ୍ୱଚ୍ଛ, ନିରପେକ୍ଷ ଏବଂ ଭ୍ରଷ୍ଟାଚାର ମୁକ୍ତ ହେବା ନେଇ ବିଶେଷ ଧ୍ୟାନ ଦିଆଯାଇଛି । ମୁଖ୍ୟମନ୍ତ୍ରୀ ଆହୁରି କହିଥିଲେ ସବୁ ଜିଲ୍ଲାରେ ମେଧାବୀ ଛାତ୍ରଛାତ୍ରୀଙ୍କୁ ସ୍ମାର୍ଟଫୋନ ଏବଂ ଲାପଟପ୍ ବଣ୍ଟନ କାର୍ଯ୍ୟ ମଧ୍ୟ ତ୍ୱରାନ୍ୱିତ କରାଯାଉଛି ।
ବୈଠକରେ ଉତ୍ତରପ୍ରଦେଶ ଲୋକସେବା ଆୟୋଗ, ଉତ୍ତରପ୍ରଦେଶ ଅଧିନସ୍ଥ ସେବା ଚୟନ ଆୟୋଗ, ପୋଲିସ ନିଯୁକ୍ତି ବୋର୍ଡ, ଉଚ୍ଚଶିକ୍ଷା ସେବା ଚୟନ ଆୟୋଗ ଏବଂ ମାଧ୍ୟମିକ ଶିକ୍ଷା ନିଯୁକ୍ତି ବୋର୍ଡ ଅଧ୍ୟକ୍ଷଙ୍କ ସହ ମୁଖ୍ୟ ସଚିବ, ଉପମୁଖ୍ୟ ସଚିବ ପ୍ରମୁଖ ଉପସ୍ଥିତ ରହିଥିଲେ ।
