ମୃତ୍ୟୁଦଣ୍ଡ ଉପରେ ସୁପ୍ରିମକୋର୍ଟଙ୍କ ଗୁରୁତ୍ୱପୂର୍ଣ୍ଣ ଟିପ୍ପଣୀ: କହିଲେ- ‘ଅଭିଯୁକ୍ତଙ୍କୁ ଦଣ୍ଡରୁ ମୁକ୍ତି ପାଇଁ ସମସ୍ତ ସୁଯୋଗ ମିଳିବା ଉଚିତ୍’
ନୂଆଦିଲ୍ଲୀ : ମୃତ୍ୟୁଦଣ୍ଡକୁ ନେଇ ବୁଧବାର ଦିନ ଏକ ଗୁରୁତ୍ୱପୂଣ୍ଁ ଟିପ୍ପଣୀ ଦେଇଛନ୍ତି ସୁପ୍ରିମକୋର୍ଟ । କହିଛନ୍ତି କି, ‘ମୃତ୍ୟୁଦଣ୍ଡ ଅପରିବର୍ତ୍ତନୀୟ, ଏଥିପାଇଁ ଅଭିଯୁକ୍ତଙ୍କୁ ଦଣ୍ଡରୁ ମୁକ୍ତି ପାଇଁ ସମସ୍ତ ସିୁଯୋଗ ମିଳିବା ଉଚିତ୍ ।’ ଜଣଙ୍କୁ ଥରେ ଫାଶୀ ଖୁଣ୍ଟରେ ଝୁଲାଇ ସାରିବା ପରେ ପୁଣିଥରେ ଜୀବନ ଦେବା ସମ୍ଭବ ନୁହେଁ । ଏଣୁ ମୃତ୍ୟୁ ଦଣ୍ଡରେ ଦଣ୍ଡିତ ହୋଇଥିବା ଅଭିଯୁକ୍ତକୁ ନିଜକୁ ନିର୍ଦ୍ଦୋଷ ସାବ୍ୟସ୍ତ କରିବା ପାଇଁ ସବୁ ସୁଯୋଗ ଦେବା ଉଚିତ । ଜଷ୍ଟିସ୍ ୟୁ.ୟୁ ଲଲିତଙ୍କ ନେତୃତ୍ୱରେ ଗଠିତ ଏକ ତିନିଜଣିଆ ଖଣ୍ଡପୀଠରେ ମାମଲାର ଶୁଣାଣିକୁ ସଂରକ୍ଷିତ ରଖାଯାଇଛି ।
ବେଞ୍ଚ କହିଛନ୍ତି ଯେ ଏଭଳି ମାମଲାରେ କୌଣସି ଶୁଣାଣି କରିବା ପୂର୍ବରୁ କୋର୍ଟ ରାୟକୁ ସ୍ଥଗିତ ରଖିପାରିବେ । ଜଷ୍ଟିସ ଏସଆର ଭଟ୍ଟ ଏବଂ ଜଷ୍ଟିସ ସୁଦର୍ଶନ ଧୁଲିଆ ମଧ୍ୟ ଏହି ବେଞ୍ଚର ସଦସ୍ୟ ଥିଲେ । ସର୍ବୋଚ୍ଚ ଅଦାଲତ କହିଛନ୍ତି ଯେ ଯଦି ନିୟମ ମୁତାବକ କୋର୍ଟଙ୍କୁ ଲାଗେ ଯେ ଦୋଷୀଙ୍କୁ ମୃତ୍ୟୁଦଣ୍ଡ ଦେବା ଜରୁରୀ ନୁହେଁ, ତେବେ ସେହି ଦିନ ହିଁ କୋର୍ଟ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିପାରିବେ । କୋର୍ଟଙ୍କ ନିକଟରେ ଏଥିପାଇଁ ସ୍ୱାଧୀନତା ରହିବା ଆବଶ୍ୟକ । ଅନ୍ୟପଟେ ଯଦି ଏହି ମାମଲାରେ ମୃତ୍ୟୁଦଣ୍ଡ ସମ୍ପର୍କରେ କିଛି ଅଧିକ ଆଲୋଚନା ଆବଶ୍ୟକତା ରହିଛି, ତେବେ ଏଥିପାଇଁ ମଧ୍ୟ ଚେଷ୍ଟା କରାଯିବା ଉଚିତ୍ ବୋଲି ବେଞ୍ଚ କହିଛନ୍ତି ।
ଏହା ପୂର୍ବରୁ ସୁପ୍ରିମକୋର୍ଟଙ୍କ ପକ୍ଷରୁ ଆଟର୍ଣ୍ଣି ଜେନେରାଲ କେ.କେ ଭେନୁଗୋପାଲ ଏବଂ ଜାତୀୟ ଆଇନ ସେବା ପ୍ରାଧିକରଣର ସଦସ୍ୟ ସଚିବଙ୍କୁ ନୋଟିସ ଜାରି କରାଯାଇଥିଲା । ଏଥିରେ କୁହାଯାଇଥିଲା ଯେ କେଉଁ ପରିସ୍ଥିତିରେ ଜଣେ ବିଚାରପତିଙ୍କୁ ଆଜୀବନ କାରାଦଣ୍ଡ ଏବଂ ମୃତ୍ୟୁଦଣ୍ଡ ମଧ୍ୟରେ ଚୟନ କରିବାକୁ ପଡ଼ିବ, ସେ ନେଇ ବିସ୍ତୃତ ଭାବେ ଜଣାନ୍ତୁ ।
ଏହା ପୂର୍ବରୁ ସର୍ବୋଚ୍ଚ ଅଦାଲତ କହିଥିଲେ ଯେ ଯେଉଁ ମାମଲାରେ ମୃତ୍ୟୁ ଦଣ୍ଡର ଆଶଙ୍କା କମ୍ ରହିଛି, ସେଠାରେ ଅପରାଧକୁ କମ୍ କରିବାକୁ ଯଥା ସମ୍ଭବ ପରିସ୍ଥିତି ଉପରେ ବିଚାର କରିବାର ଆବଶ୍ୟକତା ରହିଛି । କୋର୍ଟ କହିଛନ୍ତି ଯେ ମୃତ୍ୟୁ ଦଣ୍ଡ ଥିବା ଅପରାଧରେ ରାଜ୍ୟ ସରକାରଙ୍କୁ ତତ୍ପରତା ଦେଖାଇ ଅଭିଯୁକ୍ତର ମାନସିକତାକୁ ଜାଣିବା ଆବଶ୍ୟକ । ଯାହାକୁ ଏକ ପ୍ରମାଣ ଆକାରରେ କୋର୍ଟରେ ଉପସ୍ଥାପନ କରିହେବ । ଏହା ଦ୍ୱାରା କିଛିକାଂଶରେ ଅପରାଧକୁ କମାଯାଇପାରିବ ବୋଲି କହିଛନ୍ତି କୋର୍ଟ । କୋର୍ଟ କହିଛନ୍ତି ଯେ ମୃତ୍ୟୁଦଣ୍ଡରେ ଦଣ୍ଡିତ ଅପରାଧରେ ରାଜ୍ୟ ତୁରନ୍ତ ଅଭିଯୁକ୍ତଙ୍କ ମାନସିକ ମୂଲ୍ୟାଙ୍କନ କରିବା ଉଚିତ ଏବଂ ଏହାକୁ ଅଧିବେଶନ କୋର୍ଟରେ ପ୍ରମାଣ ଭାବରେ ଉପସ୍ଥାପନ କରିବା ଉଚିତ।
