Warmest Month of The World: ସର୍ବାଧିକ ତାପମାତ୍ରାରେ ରେକର୍ଡ ରଚିଲା ‘ମାର୍ଚ୍ଚ ୨୦୨୪’
ନୂଆଦିଲ୍ଲୀ: ୟୁରୋପୀୟ ସଂଘର ଜଳବାୟୁ ଏଜେନ୍ସି ବର୍ତ୍ତମାନ ଏକ ବଡ଼ ରେକର୍ଡ ଉପରୁ ପରଦା ଉଠାଇଛି । ଅଲ-ନିନୋ ସ୍ଥିତି ଏବଂ ମନୃଷ୍ୟକୃତ ଜଳବାୟୁ ପରିବର୍ତ୍ତନର ସଂଯୁକ୍ତ ପ୍ରଭାବ ଯୋଗୁଁ ମାର୍ଚ୍ଚ ମାସରେ ସର୍ବାଧିକ ତାପମାତ୍ରା ରେକର୍ଡ କରାଯାଇଛି । ଦୁନିଆରେ ଏହି ମାସରେ ସବୁଠାରୁ ଅଧିକ ଗରମ ଅନୁଭୂତ ହୋଇଛି । ତେବେ ଗତବର୍ଷ ଜୁନ୍ ମାସ ପରେ ଲଗାତାର ଦଶମ ମାସ ଭାବରେ ମାର୍ଚ୍ଚ ମାସରେ ତାପମାତ୍ରା ନୂଆ ରେକର୍ଡ ସୃଷ୍ଟି କରିଛି । ଗତ ୧୨ ମାସ(ଏପ୍ରିଲ ୨୦୨୩- ମାର୍ଚ୍ଚ ୨୦୨୪)ରେ ବିଶ୍ୱର ହାରାହାରି ସର୍ବାଧିକ ତାପମାତ୍ରା ରେକର୍ଡ କରାଯାଇଛି । ଏହା ୧୯୯୧-୨୦୨୦ର ହାରାହାରି ତାପମାତ୍ରା ଅପେକ୍ଷା ୦.୭୦ ଡିଗ୍ରୀ ସେଲସିୟସ ଅଧିକ ରହିଛି ।
କପରନିକସ କ୍ଲାଇମେଟ ଚେଞ୍ଜ ସର୍ଭିସ(C3S) ତରଫରୁ କୁହାଯାଇଛି ଯେ, ୧୮୫୦-୧୯୦୦ର ମାର୍ଚ୍ଚ ମାସରେ ହାରାହାରି ତାପମାତ୍ରା ୧୪.୧୪ଡିଗ୍ରୀ ସେଲସିୟସ ରହିଥିଲା । ସେହିପରି ୧୯୯୧-୨୦୨୦ ମସିହା ମାର୍ଚ୍ଚ ମାସରେ ହାରାହାରି ତାପମାତ୍ରାରେ ୦.୭୩ ଡିଗ୍ରୀ ବୃଦ୍ଧି ରେକର୍ଡ କରାଯାଇଛି । ତେବେ ୨୦୧୬ ମାର୍ଚ୍ଚ ମାସରେ ୦.୧୦ ଡିଗ୍ରୀ ସେଲସିୟସ ବୃଦ୍ଧି ହୋଇଛି । ଗତ ଜାନୁୟାରୀରେ ପ୍ରଥମ ଥର ସମଗ୍ର ବର୍ଷ ପାଇଁ ବିଶ୍ୱରେ ତାପମାତ୍ରା ୧.୫ ଡିଗ୍ରୀ ସେଲସିୟସ ସୀମା ଅତିକ୍ରମ କରିଥିଲା । ତେବେ ଗ୍ଲୋବାଲ ୱାର୍ମିଙ୍ଗ ଯୋଗୁଁ ପୂର୍ବରୁ ମଧ୍ୟ ଏପରି ସୀମା ଅତିକ୍ରମ ହେଉଥିବା ପ୍ୟାରିସ ଚୁକ୍ତିରେ କୁହାଯାଇଛି ।
ଜଳବାୟୁ ପରିବର୍ତ୍ତନ ବୈଜ୍ଞାନିକଙ୍କ ଅନୁସାରେ, ଜଳବାୟୁ ପରିବର୍ତ୍ତନର ସବୁଠାରୁ ଖରାପ ପ୍ରଭାବରୁ ରକ୍ଷା ପାଇବା ପାଇଁ ସମସ୍ତ ଦେଶକୁ ଏକଜୁଟ ହେବାକୁ ପଡ଼ିବ । ବିଶ୍ୱରେ ହାରାହାରି ତାପମାତ୍ରା ବୃଦ୍ଧି ପ୍ରକ୍ରିୟାକୁ ପୂର୍ବ-ଉଦ୍ୟୋଗିକ କାଳରୁ ୧.୫ ଡିଗ୍ରୀ ସେଲସିୟସ ମଧ୍ୟରେ ସୀମିତ ରଖିବା ଆବଶ୍ୟକ ରହିଛି । ବାୟୁମଣ୍ଡଳରେ ଗ୍ରୀନ୍ ହାଉସ ଗ୍ୟାସରେ ବିଶେଷ କରି କାର୍ବନ ଡାଇ-ଅକ୍ସାଇଡ ଏବଂ ମିଥେନ୍ ବୃଦ୍ଧି ବିଶ୍ୱରେ ତାପମାତ୍ରା ବଢିବାର ମୁଖ୍ୟ କାରଣ ପାଲଟିଛି । ସେହିପରି ମାର୍ଚ୍ଚ ମାସରେ ପବନର ତାପମାତ୍ରା ଏବଂ ସମୁଦ୍ର ପତନର ତାପମାତ୍ରା ଉଭୟରେ ଜଳବାୟୁ ରେକର୍ଡରେ ଲଗାତାର ହ୍ରାସ ପରିଲକ୍ଷିତ ହୋଇଛି । ଚଳିତବର୍ଷ ଦଶମ ଥର ପାଇଁ ତାପମାତ୍ରା ଏହି ରେକର୍ଡ ଭାଙ୍ଗିଛି ।
