ଟ୍ରେନ ଦୁର୍ଘଟଣାକୁ ନେଇ ଏବେବି ଲୋକଙ୍କ ମନରେ ଛନକା: ଜାଣନ୍ତୁ କଣ କହିଲେ କରମଣ୍ଡଳ ଲୋକୋ ପାଇଲଟ ?

ବାହାନଗା : ବାଲେଶ୍ୱର: ବାଲେଶ୍ୱର ବାହାନଗା ରେଳ ଦୁର୍ଘଟଣା ସାରା ଦେଶକୁ ଦୋହଲାଇ ଦେଇଛି । ଏଥିରେ ୨୭୫ ଜଣଙ୍କର ମୃତ୍ୟୁ ସମଗ୍ର ଦେଶକୁ ଚକିତ କରିଛି। ଦୁର୍ଘଟଣା ପରେ ଦୁର୍ଘଟଣାର କାରଣ ଅନୁସନ୍ଧାନ କରାଯାଉଛି। ରେଳ ଅପରେସନ୍ସ ଏବଂ ବାଣିଜ୍ୟ ବିକାଶ ବୋର୍ଡ ସଦସ୍ୟ ଜୟା ବର୍ମା ସିହ୍ନା ରବିବାର କହିଛନ୍ତି ଦୁର୍ଘଟଣା ପରେ କରମଣ୍ଡଳ ଏକ୍ସପ୍ରେସର ଲୋକୋ ପାଇଲଟ କିଛି ସମୟ ପାଇଁ ସଚେତନ ଥିଲେ ଏବଂ ତାଙ୍କୁ ଗ୍ରୀନ ସଙ୍କେତ ମିଳିଥିବା କହିଥିଲେ। ଜୟା ବର୍ମା କହିଛନ୍ତି ସେ ଲୋକୋ ପାଇଲଟଙ୍କ ସହ ମଧ୍ୟ କଥା ହୋଇଛନ୍ତି ଏବଂ ଲୋକୋ ପାଇଲଟ ତାଙ୍କୁ ଗ୍ରୀନ ସଙ୍କେତ ପାଇବା ବିଷୟରେ ମଧ୍ୟ କହିଛନ୍ତି। ତେବେ ପରେ ଲୋକୋ ପାଇଲଟଙ୍କ ଅବସ୍ଥା ବିଗିଡି ଯାଇ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।

ଏହି ଦୁର୍ଘଟଣାର ଶିକାର ହୋଇଥିବା କରମଣ୍ଡଳ ଏକ୍ସପ୍ରେସର ଲୋକୋ ପାଇଲଟ ହେଉଛନ୍ତି ଜିଏନ ମହାନ୍ତି ଏବଂ ଆସିଷ୍ଟାଣ୍ଟ ଲୋକୋ ପାଇଲଟ ହାଜାରୀ ବେହେରା। ଉଭୟ ଗୁରୁତର ଆହତ ହୋଇଛନ୍ତି ଏବଂ ଉଭୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ, କରମଣ୍ଡଳ ଏକ୍ସପ୍ରେସ ଦ୍ୱାରା ଧକ୍କା ହୋଇଥିବା ମାଲବାହୀ ଟ୍ରେନର ଗାର୍ଡଙ୍କର ଜୀବନ ସୌଭାଗ୍ୟ ବଶତଃ ବଞ୍ଚିଯାଇଛି। ବାସ୍ତବରେ, ଲୁପ ଲାଇନରେ ଠିଆ ହୋଇଥିବା ମାଲବାସୀ ଟ୍ରେନ ପଛରୁ କରମଣ୍ଡଳ ଏକ୍ସପ୍ରେସ ଧକ୍କା ହୋଇଥିଲା। ସାଧାରଣତଃ ଗାର୍ଡ ମାଲବାହୀ ଟ୍ରେନର ଶେଷ ବିଭାଗରେ ଉପସ୍ଥିତ ଥାନ୍ତି। କିନ୍ତୁ ଏହି ଟ୍ରେନ ଲୁପ ଲାଇନରେ ଥିବାରୁ ଡ୍ରାଇଭର କିମ୍ବା ଗାର୍ଡ ଟ୍ରେନରେ ଉପସ୍ଥିତ ନ ଥିଲେ। ଏହି କାରଣରୁ, ଯେତେବେଳେ କରମଣ୍ଡଳ ଏକ୍ସପ୍ରେସ ଧକ୍କା ହୋଇଥିଲେ ମଧ୍ୟ ମାଲବାହୀ ଟ୍ରେନର ଲୋକୋ ପାଇଲଟ ଏବଂ ଗାର୍ଡଙ୍କ ଜୀବନ ରକ୍ଷା ପାଇଥିଲା ।

ପ୍ରାଥମିକ ଅନୁସନ୍ଧାନରେ ଏହା ଜଣାପଡୁଛି ଏହା କରମଣ୍ଡଳ ଏକ୍ସପ୍ରେସର ଲୋକୋ ପାଇଲଟଙ୍କ ଦୋଷ ନୁହେଁ, କିନ୍ତୁ ସିଗନାଲରେ ତ୍ରୁଟି ଯୋଗୁ ଦୁର୍ଘଟଣା ଘଟିଛି। ଏକ ଭୁଲ ସିଗନାଲ ଯୋଗୁ କରମଣ୍ଡଳ ଏକ୍ସପ୍ରେସ ଲୁପ ଲାଇନକୁ ଯାଇ ସେଠାରେ ଠିଆ ହୋଇଥିବା ମାଲବାହୀ ଟ୍ରେନ ସହିତ ଧକ୍କା ହୋଇଥିଲା। ଧକ୍କା ହେବା ପରେ କରମଣ୍ଡଳ ଏକ୍ସପ୍ରେସର କିଛି ବଗି ଲାଇନଚ୍ୟୁତ ହୋଇ ଡାଉନ ଲାଇନ ଦେଇ ଯାଉଥିବା ବେଙ୍ଗାଲୁରୁ ଏକ୍ସପ୍ରେସ ସହିତ ଧକ୍କା ହୋଇଥିଲା।