ପୁରୁଷମାନେ ମହିଳାଙ୍କ ଅପେକ୍ଷା କାହିଁକି ଅଧିକ ଡେଙ୍ଗା ? ନୂତନ ଅଧ୍ୟୟନରୁ ମିଳିଲା ଜେନେଟିକ୍ ପ୍ରମାଣ
ନୂଆଦିଲ୍ଲୀ: ପୁରୁଷମାନେ ମହିଳାଙ୍କ ତୁଳନାରେ ହାରାହାରି ୫ ଇଞ୍ଚ ଉଚ୍ଚ ହେବାର ରହସ୍ୟ ଉପରେ ଏକ ନୂତନ ଅଧ୍ୟୟନ ଆଲୋକପାତ କରିଛି। ପ୍ରୋସିଡିଂସ ଅଫ ଦି ନ୍ୟାସନାଲ ଏକାଡେମୀ ଅଫ ସାଇନ୍ସେସ୍ରେ ପ୍ରକାଶିତ ଏକ ଗବେଷଣା ଅନୁଯାୟୀ, ‘SHOX’ (ଶର୍ଟ ଷ୍ଟାଚର ହୋମିଓବକ୍ସ) ନାମକ ଏକ ଜିନ୍ ଉଚ୍ଚତା ନିର୍ଦ୍ଧାରଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ।
ଏହି ଅଧ୍ୟୟନ ପାଇଁ ଗବେଷକମାନେ ପ୍ରାୟ ୯.୩ ଲକ୍ଷ ଲୋକଙ୍କ ଜେନେଟିକ୍ ତଥ୍ୟ ବିଶ୍ଳେଷଣ କରିଥିଲେ। ଅଧ୍ୟୟନରୁ ଜଣାପଡ଼ିଛି ଯେ SHOX ଜିନ୍ ଏକ୍ସ (X) ଓ ୱାଇ (Y) କ୍ରୋମୋଜୋମରେ ଉପସ୍ଥିତ। ମହିଳାଙ୍କର ଦୁଇଟି ଏକ୍ସ କ୍ରୋମୋଜୋମ ଥିବାବେଳେ ପୁରୁଷମାନଙ୍କର ଗୋଟିଏ ଏକ୍ସ ଓ ଗୋଟିଏ ୱାଇ କ୍ରୋମୋଜୋମ ରହିଛି। ମହିଳାଙ୍କ ଏକ୍ସ କ୍ରୋମୋଜୋମ ମଧ୍ୟରୁ ଗୋଟିଏର ଅଧିକାଂଶ ଜିନ୍ ନିଷ୍କ୍ରିୟ ହୋଇଯାଏ, କିନ୍ତୁ SHOX ଜିନ୍ ସକ୍ରିୟ ଅଞ୍ଚଳରେ ରହି ଆଂଶିକ ଭାବେ କାର୍ଯ୍ୟ କରେ। ଅନ୍ୟପକ୍ଷରେ, ପୁରୁଷମାନଙ୍କ ଏକ୍ସ ଓ ୱାଇ କ୍ରୋମୋଜୋମରେ ଥିବା SHOX ଜିନ୍ ସମ୍ପୂର୍ଣ୍ଣ ସକ୍ରିୟ ରହି ଉଚ୍ଚତା ବୃଦ୍ଧିରେ ଅଧିକ ପ୍ରଭାବ ବିସ୍ତାର କରେ।
ପେନସିଲଭାନିଆର ଗେସିଙ୍ଗର କଲେଜ ଅଫ ହେଲଥ ସାଇନ୍ସେସ୍ର ଗବେଷକ ମାଥ୍ୟୁ ଓଏଟଜେନସ୍ କହିଛନ୍ତି, “SHOX ଜିନ୍ କ୍ରୋମୋଜୋମର ଶେଷ ଭାଗରେ ଅବସ୍ଥିତ, ଯାହା ପୁରୁଷମାନଙ୍କ ଉଚ୍ଚତା ବୃଦ୍ଧିରେ ଗୁରୁତ୍ୱପୂର୍ଣ୍ଣ।” ଏହି ଜେନେଟିକ୍ ପାର୍ଥକ୍ୟ ପୁରୁଷ ଓ ମହିଳାଙ୍କ ମଧ୍ୟରେ ଉଚ୍ଚତା ପାର୍ଥକ୍ୟର ପ୍ରାୟ ୨୫% ବିଶ୍ଳେଷଣ କରେ। ବାକି ପାର୍ଥକ୍ୟ ଅନ୍ୟ ଜିନ୍ ଏବଂ ଟେଷ୍ଟୋଷ୍ଟେରୋନ୍ ପରି ପୁରୁଷ ହରମୋନ ଦ୍ୱାରା ପ୍ରଭାବିତ ହୁଏ।
ଗବେଷକମାନେ ଯୁକ୍ତରାଷ୍ଟ୍ର ଓ ଯୁକ୍ତରାଜ୍ୟର ବା୯ୋବ୍ୟାଙ୍କରୁ ୧,୨୨୫ ଜଣଙ୍କ ଅସ୍ୱାଭାବିକ କ୍ରୋମୋଜୋମ ସଂଯୋଜନ ତଥ୍ୟ ବିଶ୍ଳେଷଣ କରି ଜାଣିଛନ୍ତି ଯେ ଅତିରିକ୍ତ ୱାଇ କ୍ରୋମୋଜୋମ ଥିବା ବ୍ୟକ୍ତିମାନେ ଅତିରିକ୍ତ ଏକ୍ସ କ୍ରୋମୋଜୋମ ଥିବା ବ୍ୟକ୍ତିଙ୍କ ତୁଳନାରେ ଅଧିକ ଉଚ୍ଚ।
ନ୍ୟୁୟର୍କର ମାଉଣ୍ଟ ସିନାଇ ସ୍କୂଲ ଅଫ ମେଡିସିନ୍ର ଜେନେଟିକ୍ସ ବିଶେଷଜ୍ଞ ଏରିକ୍ ଶାଡ଼ଟ୍ ଏହି ଅଧ୍ୟୟନକୁ “ଚମତ୍କାର” ବୋଲି ଅଭିହିତ କରିଛନ୍ତି। ସେ କହିଛନ୍ତି, “ଏହା ଜେନେଟିକ୍ ତଥ୍ୟର ବିଶାଳ ବ୍ୟବହାର କରି ଉଚ୍ଚତା ପାର୍ଥକ୍ୟର ରହସ୍ୟ ଉନ୍ମୋଚନ କରିଛି।” ଏହି ଗବେଷଣା ମାନବ ଉଚ୍ଚତା ଏବଂ ଲିଙ୍ଗ-ଆଧାରିତ ପାର୍ଥକ୍ୟ ବୁଝିବାରେ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ ହେବ ଏବଂ ଭବିଷ୍ୟତ ଜେନେଟିକ୍ ଅନୁସନ୍ଧାନ ପାଇଁ ନୂଆ ଦିଗ ପ୍ରଦାନ କରିବ।