ପ୍ରତିବର୍ଷ Decemberରେ କାହିଁକି ମାରାତ୍ମକ ହେଉଛି କରୋନା? ପୁଣି ଡରାଇଲାଣି ନୂଆ ଭାରିଆଣ୍ଟ
ନୂଆଦିଲ୍ଲୀ: ପୁଣିଥରେ ଦେଶରେ ଭୟଙ୍କର ରୂପ ଧାରଣ କରିଛି କରୋନା ଭାଇରସ । ୨୦୧୯ ମସିହା ପ୍ରାରମ୍ଭିକ ସମୟରେ ସାରା ବିଶ୍ୱ କ୍ରୀସମାସ ପରେ ନୂଆବର୍ଷକୁ ସ୍ୱାଗତ କରିବା ପାଇଁ ଯୋଜନା କରୁଥିବା ବେଳେ ଦେଶରେ ପାଦ ଥାପିଥିଲା କରୋନା । ଚୀନରେ ପ୍ରଥମେ ଚିହ୍ନଟ ହୋଇଥିବା ଏକ ଅଜଣା ଭାଇରସ ହଠାତ୍ ସାରା ବିଶ୍ୱକୁ ବ୍ୟାପିଯାଇଥିଲା । ତେବେ ଆଜି ୪ ବର୍ଷ ପରେ କରୋନା ମହାମାରୀ ହ୍ରାସ ପାଇଛି ସତ, କିନ୍ତୁ ଏହି ଭୂତାଣୁ ଏବେ ବି ଆମ ଚାରିପାଖରେ ଘୁରି ବୁଲୁଛି । ଚଳିତବର୍ଷ ପୁଣିଥରେ କରୋନାର ନୂଆ ଭାରିଆଣ୍ଟ ଜେଏନ.୧କୁ ନେଇ ଏବେ ସାଧାରଣ ଲୋକଙ୍କ ସହ ସ୍ୱାସ୍ଥ୍ୟ ବିଭାଗ ମଧ୍ୟ ଚିନ୍ତାରେ ପଡ଼ିଯାଇଛି । ଜେଏନ.୧ ଭାରିଆଣ୍ଟ ପୂର୍ବାପେକ୍ଷା ବିପଦଜନକ ନୁହେଁ, କିନ୍ତୁ ଏଥିପ୍ରତି ସତର୍କ ରହିବା ପାଇଁ ପରାମର୍ଶ ଦେଇଛି ବିଶ୍ୱ ସ୍ୱାସ୍ଥ୍ୟ ସଂଗଠନ । ତେବେ ପ୍ରତିବର୍ଷ ଡିସେମ୍ବରରେ କାହିଁକି ମାରାତ୍ମକ ହେଉଛି କରୋନା?
କୋଭିଡ-୧୯ର ୩ଟି ବଡ଼ ମ୍ୟୁଟେସନ୍:
ଡିସେମ୍ବର ୨୦୨୦: ଆଲଫା (ବି.୧.୧.୭), ବିଟା (ବି.୧.୩୫୧), ଏବଂ ଗାମା (ପି.୧) । ସେହିପରି ଏଥିପାଇଁ ଲକଡାଉନ୍ କୋହଳ ହେବାର କିଛି ମାସ ପରେ ଡିସେମ୍ବର ୨୦୨୧ ରେ ନୂଆ ଭାରିଆଣ୍ଟ ଓମିକ୍ରନ୍ ସାରା ବିଶ୍ୱକୁ କଲବଲ କରିଥିଲା । ତେବେ ଡିସେମ୍ବର ୨୦୨୨ ରେ, କୌଣସି ନୂଆ ବା ଭୟଙ୍କର ଭାରିଆଣ୍ଟକୁ ଚିହ୍ନଟ କରାଯାଇ ନଥିବା ସମୟରେ ସାରା ବିଶ୍ୱ ଆଶ୍ୱସ୍ତି ଲାଭ କରିଥିଲା । କିନ୍ତୁ ପରେ ଓମିକ୍ରନର ସବଭାରିଆଣ୍ଟସ ବିଏ.୨ ଏବଂ ବିଏ.୫ ପୁଣିଥରେ କରୋନା ଭାଇରସର ଭୟକୁ ଦ୍ୱିଗୁଣିତ କରିଥିଲା ।
ତେବେ ଚଳିତବର୍ଷ ଡିସେମ୍ବରରେ ଓମିକ୍ରନର ଆଉ ଏକ ଭାରିଆଣ୍ଟ ଜେଏନ.୧ ଭାଇରସ ସଂକ୍ରମଣ ଧିରେ ଧିରେ ବୃଦ୍ଧି ପାଇବାରେ ଲାଗିଛି । ୪ ବର୍ଷରୁ କରୋନାର ବିଭିନ୍ନ ପର୍ୟ୍ୟାୟ ମଧ୍ୟରେ ଗୋଟିଏ ଜିନିଷ ସମାନତା ରହିଛି । ତାହା ହେଉଛି ଡିସେମ୍ବର ମାସ । ପ୍ରତ୍ୟେକ ବର୍ଷର ଡିସେମ୍ବର ମାସରେ ହିଁ କରୋନାର ଏକ ନୂଆ ଭାରିଆଣ୍ଟ ଏଣ୍ଟ୍ରି କରିବା ସହ ସଂକ୍ରମଣ ବୃଦ୍ଧି କରୁଛି ।
କାହିଁକି ଡିସେମ୍ବର?
ରିସର୍ଚ୍ଚରୁ ଜଣାଯାଇଛି ଯେ, କୋଭିଡ୍ -୧୯ ମାମଲାଗୁଡ଼ିକର ବୃଦ୍ଧି ପଛରେ ଥଣ୍ଡା ଏବଂ ଶୁଷ୍କ ଶୀତ ଏକ ତ୍ୱରାନ୍ୱିତ କାରକ ଭାବରେ ବିବେଚନା କରାଯାଉଛି । ତେବେ ମହାମାରୀର ପ୍ରଥମ ଲହର ସମୟରେ ପାଗ ପରିସ୍ଥିତି ଜୀବାଣୁ କିପରି ସହଜରେ ବିସ୍ତାର କରିଥିଲା ଡେଲଟା ଭାରିଆଣ୍ଟରୁ ସୃଷ୍ଟି ହୋଇଥିବା ଦ୍ୱିତୀୟ ଲହର ଉପରେ ରିସର୍ଚ୍ଚ କରିବା ପରେ ଜଣାପଡିଛି । ଶୀତଋତୁରେ ତାପମାତ୍ରା ହ୍ରାସ ପାଇବା ସହ ବାୟୁ ଶୁଷ୍କ ହୋଇଯିବାରୁ ଉତ୍ତର ଗୋଲାର୍ଦ୍ଧର ଦେଶଗୁଡ଼ିକରେ କୋଭିଡ୍ -୧୯ ବ୍ୟାପିବା ଆରମ୍ଭ ହୋଇଥିଲା । ଚାଇନାର ସିଚୁଆନ୍ ଇଣ୍ଟରନ୍ୟାସନାଲ୍ ଷ୍ଟଡିଜ୍ ୟୁନିଭରସିଟିର ଅଧ୍ୟୟନରୁ ଜଣାପଡିଛି ଯେ, ଥଣ୍ଡା ଅବସ୍ଥାରେ ରହୁଥିବା ବ୍ୟକ୍ତି ଅନ୍ୟମାନଙ୍କ ଅପେକ୍ଷା ଶୀଘ୍ର କରୋନା ଭାଇରସରେ ସଂକ୍ରମଣ ହେବାର ସମ୍ଭାବନା ରହିଛି।
