ପିତାଙ୍କ ସହ ଝଗଡା ହେବାରୁ ସେଭିଂ ରେଜର୍ ଓ ବ୍ଲେଡ ଗିଳିଦେଲେ ଯୁବକ, ସର୍ଜରୀ କରି ଜୀବନ ବଞ୍ଚାଇଲେ ଡାକ୍ତର
ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଏକ ମାମଲା ସାମ୍ନାକୁ ଆସିଛି ଯାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ । ଜଣେ ୨୦ ବର୍ଷ ବୟସ୍କ ଯୁବକ ଏଠାରେ ଥିବା ସାର୍ ଗଙ୍ଗା ରାମ ହସ୍ପିଟାଲରେ ପହଞ୍ଚିଥିଲେ । ଯୁବକ ଜଣକ ତାଙ୍କ ପେଟରେ ଏକ ରେଜର ଥିବା ବିଷୟରେ କହିଥିଲେ । ପ୍ରଥମେ ଡାକ୍ତରମାନେ ଏହାକୁ ବିଶ୍ୱାସ କରିନଥିଲେ । କିନ୍ତୁ ତାଙ୍କ ପେଟର ଏକ୍ସ-ରେ କରିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ ।
ବ୍ଲେଡ୍ ଏବଂ ରେଜର୍ ହ୍ୟାଣ୍ଡଲ୍ ଯୁବକଙ୍କର ପେଟରେ ଦୁଇଟି ଅଂଶରେ ସ୍ପଷ୍ଟ ଦେଖାଯାଉଥିଲା । ହ୍ୟାଣ୍ଡେଲଟି ତାଙ୍କ ଅନ୍ତନଳୀରେ ଅଟକି ଯାଇଥିବାବେଳେ ବ୍ଲେଡ ତାଙ୍କ ପେଟରେ ଲାଗିଥିଲା । ତୁରନ୍ତ ଏହି ବିଷୟରେ ବରିଷ୍ଠ ଡାକ୍ତରମାନଙ୍କୁ ଅବଗତ କରାଯାଇଥିଲା ଏବଂ ଯୁବକଙ୍କ ପେଟରୁ ରେଜରକୁ ବାହାର କରିବାପାଇଁ ଡାକ୍ତରଙ୍କ ଏକ ଟିମ୍ ଗଠନ କରାଯାଇଥିଲା । ବହୁ ପରିଶ୍ରମ ପରେ ଡାକ୍ତରମାନେ ଯୁବକଙ୍କ ପେଟରୁ ବ୍ଲେଡ ଏବଂ ଏହାର ହ୍ୟାଣ୍ଡେଲ ବାହାର କରିଥିଲେ । ବର୍ତ୍ତମାନ ଅସ୍ତ୍ରୋପଚାର ପରେ ଯୁବକ ସମ୍ପୂର୍ଣ୍ଣ ସୁସ୍ଥ ଥିବା ସୂଚନା ରହିଛି ।
ଏହି ସମଗ୍ର ଘଟଣାର ଅନୁସନ୍ଧାନ ପରେ ଜଣାପଡିଛି ଯେ ଯୁବକଟିର ମାନସିକ ଅବସ୍ଥା ଭଲ ନୁହେଁ । ସେ ତାଙ୍କ ମାଆ ଏବଂ ବାପାଙ୍କ ସହ ରୁହନ୍ତି । ତାଙ୍କ ବାପା ମଧ୍ୟ ଅସୁସ୍ଥ ଏବଂ ସେ ମାନସିକ ସ୍ତରରେ ମଧ୍ୟ ଅସୁସ୍ଥ ଥିଲେ । କୁହାଯାଉଛି ଯେ ଯୁବକ ଜଣକ ତାଙ୍କ ବାପାଙ୍କ ସହ କୌଣସି ପ୍ରସଙ୍ଗରେ ଝଗଡା କରିଥିଲେ । ଏହା ପରେ ସେ ଆତ୍ମହତ୍ୟା କରିବା ଉଦ୍ଦେଶ୍ୟରେ ସେଭିଙ୍ଗ ରେଜରକୁ ଗିଳି ଦେଇଥିଲେ ।
ଏହିପରି ଡାକ୍ତରମାନେ ଅସ୍ତ୍ରୋପଚାର କରିଥିଲେ
ଡାକ୍ତରଙ୍କ କହିବାନୁସାରେ, ଏହା ଅତ୍ୟନ୍ତ ଜଟିଳ ମାମଲା ଥିଲା, ଯଦି ଅଧିକ ବିଳମ୍ବ ହୋଇଥାନ୍ତା ତେବେ ଅନ୍ତନଳୀରେ ଅଧିକ କ୍ଷତି ହୋଇଯାଇଥାନ୍ତା । ଯୁବକମାନଙ୍କୁ ମନୋବିଜ୍ଞାନୀମାନେ ପରାମର୍ଶ ଦେଉଛନ୍ତି ବର୍ତ୍ତମାନ ସେ ସମ୍ପୂର୍ଣ୍ଣ ଭଲ ଅଛନ୍ତି ଏବଂ ତାଙ୍କୁ ହାଲୁକା ଖାଦ୍ୟ ଦିଆଯାଉଛି ।
