SpaceX: ମସ୍କଙ୍କ କମ୍ପାନୀକୁ ଝଟକା: ପୃଥିବୀ ଉପରେ ପଡ଼ିବାକୁ ଯାଉଛି ୨୦ ସାଟେଲାଇଟ୍, ରକେଟ୍ ଭୁଲ କକ୍ଷପଥରେ ଯିବା କାରଣରୁ ଘଟିଛି ଏପରି
ବର୍ତ୍ତମାନ ସ୍ପେସ୍ କ୍ଷେତ୍ରରେ ବିସ୍ତାର ପାଇଁ ଘରୋଇ କମ୍ପାନୀଗୁଡିକ ମଧ୍ୟରେ ପ୍ରତିଯୋଗିତା ଚାଲିଛି । ଏହି କାରଣରୁ ମହାକାଶରେ ରକେଟ୍ ସଂଖ୍ୟା ବୃଦ୍ଧି ପାଇଛି । ଏହାରି ମଧ୍ୟରେ ଘରୋଇ କମ୍ପାନୀ ସ୍ପେସ୍ ଏକ୍ସ କୁ ଏକ ବଡ଼ ଧରଣର ଝଟକା ଲାଗିଛି । ମସ୍କଙ୍କ କମ୍ପାନୀ ସୂଚନା ଦେଇଛି ଯେ ଗୁରୁବାର ଦିନ ଆମେରିକାର କାଲିଫର୍ନିଆରୁ ଫାଲକନ୍ -୯ ରକେଟରୁ ଉତକ୍ଷେପଣ ହୋଇଥିବା ୨୦ ଟି ଉପଗ୍ରହ ପୃଥିବୀ ଉପରେ ପଡ଼ିବାକୁ ଯାଉଛି ।
କମ୍ପାନୀ କହିଛି ଯେ, ବାସ୍ତବରେ ରକେଟ୍ ଉତକ୍ଷେପଣ ସମୟରେ ଏକ ବୈଷୟିକ ସମସ୍ୟା ଦେଖାଦେଇଥିଲା । ସେହି ସମୟ ମଧ୍ୟରେ ରକେଟର ଦ୍ୱିତୀୟ ପର୍ଯ୍ୟାୟର ଇଞ୍ଜିନ୍ ସଠିକ୍ ଭାବରେ କାମ କଲା ନାହିଁ । ଫଳରେ ଇଞ୍ଜିନରୁ ତରଳ ଅମ୍ଳଜାନ ଲିକ୍ ହେବା ଦେଖାଗଲା । ଏହି କାରଣରୁ ରକେଟଗୁଡିକ ପୃଥିବୀର ଅତି ନିମ୍ନ କକ୍ଷପଥରେ ସ୍ଥାପିତ ହୋଇଗଲା । କମ୍ପାନୀ ଏହା ମଧ୍ୟ ଜଣାଇଛି ଯେ ସେମାନଙ୍କ ଟିମ୍ ଦ୍ୱାରା ରକେଟକୁ କକ୍ଷପଥରେ ସର୍ବନିମ୍ନ ସ୍ଥାନରୁ ଉଠାଇବାକୁ ଚେଷ୍ଟା କରାଯାଇଥିଲା, କିନ୍ତୁ ସେମାନେ ଏପରି ସ୍ଥିତିରେ ପହଞ୍ଚିଥିଲେ ଯେଉଁଠାରେ ସେମାନଙ୍କୁ ଉଠାଇବା ଆଉ ସମ୍ଭବ ନୁହେଁ । ସ୍ପେସ୍ ଏକ୍ସ କହିଛି ଯେ, ଏହାର ଟିମ୍ ୧୦ ଟି ଉପଗ୍ରହ ସହିତ ଯୋଗାଯୋଗ କରିଛି ଏବଂ ସେମାନଙ୍କ ଆୟନ ଥ୍ରଷ୍ଟର ବ୍ୟବହାର କରି କକ୍ଷପଥ ବଢ଼ାଇବାକୁ ଚେଷ୍ଟା କରିଛି । କିନ୍ତୁ ସେଗୁଡ଼ିକ ପୃଥିବୀଠାରୁ ମାତ୍ର ୧୩୫ କିଲୋମିଟର ଦୂରରେ ରହିଛି ।
ତଥାପି, ସ୍ପେସ୍ ଏକ୍ସ ଏହା ମଧ୍ୟ ନିଶ୍ଚିତ କରିଛି ଯେ ପୃଥିବୀର ବାୟୁମଣ୍ଡଳରେ ଉପଗ୍ରହଗୁଡିକର ପୁନଃ ପ୍ରବେଶ କରିବା ଦ୍ୱାରା କକ୍ଷପଥରେ କିମ୍ବା ଉପଗ୍ରହରେ ଅନ୍ୟ ଉପଗ୍ରହ ପାଇଁ କୌଣସି ବିପଦ ସୃଷ୍ଟି ହେବନାହିଁ ।
ସ୍ପେସ୍ ଏକ୍ସ ଦ୍ୱାରା ପ୍ରସ୍ତୁତ ପୋଷ୍ଟକୁ ଏଲୋନ୍ ମସ୍କ ମଧ୍ୟ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି ଯେ ୱର୍ପ ୯ ସହିତ ଆୟନ ଥ୍ରଷ୍ଟର ଚଳାଇବା ପାଇଁ ଆମେ ଉପଗ୍ରହ ସଫ୍ଟୱେୟାର ଅପଡେଟ୍ କରୁଛୁ । ବୋଧହୁଏ ଏହା କାମ କରିବ ନାହିଁ, କିନ୍ତୁ ଆମେ ଚେଷ୍ଟା କରୁଛୁ ।
