ଘାଟିରୁ ଖସିଲା ସେନା ଗାଡ଼ି, ଜାମ୍ମୁ-କାଶ୍ମୀରରେ ୩ ଯବାନ ସହିଦ

ଶ୍ରୀନଗର: ଜାମ୍ମୁ-କାଶ୍ମୀରରେ ଆଜି ପୁଣି ଏକ ଅଘଟଣ ଦେଖିବାକୁ ମିଳିଛି । ଦୁର୍ଘଟଣା ଯୋଗୁଁ ୩ଜଣ ଯବାନଙ୍କ ମୃତ୍ୟୁ ଘଟିଛି । ଯବାନଙ୍କ ମୃତ ଦେହକୁ ସୁରକ୍ଷାବଳ ଉଦ୍ଧାର କରିଛି । ପ୍ରବଳ ଥଣ୍ଡା ସହିତ ବରଫ ବର୍ଷା ଯୋଗୁଁ ପେଟ୍ରୋଲିଂ କରିବାରେ ଅସୁବିଧା ପରିଲକ୍ଷିତ ହେଉଛି ।

ସୂଚନା ଅନୁଯାୟୀ, କୁପୱାଡ଼ା ଜିଲ୍ଲା ମଚ୍ଛଲ ସେକ୍ଟରରେ ସୁରକ୍ଷାବଳ ପେଟ୍ରୋଲିଂ କରିବା ସମୟରେ ଏହି ଭୟଙ୍କର ଦୁର୍ଘଟଣା ଘଟିଛି । ଫଳରେ ଏଥିରେ ବସିଥିବା ୩ଯବାନଙ୍କ ମୃତ୍ୟୁ ଘଟିଛି । ଫରୱାର୍ଡ଼ ଏରିଆରେ ବରଫ ବର୍ଷା ଯୋଗୁଁ ସେନା ଗାଡ଼ି ସ୍ଲିପ କରି ଘାଟିରୁ ଧସିଯାଇଛି । ତେବେ ସହିଦ ଯବାନଙ୍କ ମଧ୍ୟରେ ଜଣେ ଜେସିଓ, ଦୁଇଜଣ ଓଆରର ଯବାନ ଅନ୍ତର୍ଭୁକ୍ତ ରହିଛନ୍ତି । ନିୟମିତ ଅପରେସନ୍ ପାଇଁ ଯାଉଥିବା ବେଳେ ଏପରି ଦୁର୍ଘଟଣା ଘଟିଛି ।

ଏହା ପୂର୍ବରୁ ଗତ ନଭେମ୍ବର ମାସରେ କୁପୱାଡ଼ାରେ ଗ୍ଲେସିୟର ଫାଟିବାରୁ ୩ଜଣ ଯବାନ ସହିଦ ହୋଇଥିଲେ । ସେଠାରେ ପେଟ୍ରୋଲିଂ ଗାଡ଼ି ଉପରେ ହଠାତ ବରଫ ପାହାଡ଼ ଖସିଯାଇଥିବାରୁ ଦୁର୍ଘଟଣା ଘଟିଥିଲା । ବର୍ତ୍ତମାନ ଅନ୍ୟ ୩ଜଣ ଯବାନ ସହିଦ ହୋଇଛନ୍ତି । ତେବେ ଆନ୍ୟନ୍ୟ ଆହତ ଯବାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି ।