ଦୁଇ ଡୋଜ ଟିକା ମଧ୍ୟରେ ବ୍ୟବଧାନ ବୃଦ୍ଧି ସଂକ୍ରମଣ ଆଶଙ୍କା ବଢ଼ାଇଥାଏ: ଡାକ୍ତର ଫାଉଚି
ନୂଆଦିଲ୍ଲୀ: କରୋନା ଭୁତାଣୁ ସଂକ୍ରମଣକୁ ଦୃଷ୍ଟିରେ ରଖି ଟିକାକରଣକୁ ତ୍ୱରାନ୍ୱିତ କରାଯାଇଥିବା ବେଳେ ଦୁଇଟି ଟିକା ମଧ୍ୟରେ ଥିବା ସମୟ ବ୍ୟବଧାନକୁ ନେଇ ଅନେକ ଦ୍ଵନ୍ଦ ଉପୁଜିଛି । ହେଲେ ଏହା ମଧ୍ୟରେ ଆମେରିକାର ଜଣେ ଡାକ୍ତର ଏହାକୁ ନେଇ ଭିନ୍ନ ମତ ପ୍ରକାଶ କରିଛନ୍ତି । ତେବେ ଶୁକ୍ରବାର ଆମେରିକୀୟ ରାଷ୍ଟ୍ରପତିଙ୍କ ଡାକ୍ତରୀ ପରାମର୍ଶଦାତା ଡାକ୍ତର ଆନ୍ଥୋନି ଫାଉଚି ଗଣମାଧ୍ୟମକୁ କହିଛନ୍ତି ଯେ, ଦୁଇ ଡୋଜ୍ ଟିକା ମଧ୍ୟରେ ବ୍ୟବଧାନ ବୃଦ୍ଧି କରୋନା ଭାଇରସ୍ ଦ୍ୱାରା ସଂକ୍ରମିତ ହେବା ଆଶଙ୍କା ସୃଷ୍ଟି କରିଥାଏ ।
ଦୁଇ ଡୋଜ୍ ‘ଏମ୍ଆର୍ଏନ୍ଏ’ ଟିକା ‘ଫାଇଜର୍’ ମଧ୍ୟରେ ଉଚିତ ବ୍ୟବଧାନ ହେଉଛି ୩ ସପ୍ତାହ ଏବଂ ‘ମଡର୍ଣ୍ଣା’ ମଧ୍ୟରେ ବ୍ୟବଧାନ ହେଉଛି ୪ ସପ୍ତାହ । ଏହି ବ୍ୟବଧାନ ବା ଅନ୍ତର ବୃଦ୍ଧି କରାଗଲେ ଜଣେ ‘କୋଭିଡ୍ ଭେରିଆଣ୍ଟ୍’ ଦ୍ବାରା ସଂକ୍ରମିତ ହେବାର ଆଶଙ୍କା ଉପୁଜି ପାରେ । ଇଂଲଣ୍ଡ୍ରେ ଦୁଇ ଡୋଜ୍ ଟିକା ମଧ୍ୟରେ ବ୍ୟବଧାନ ବୃଦ୍ଧିକୁ ଆଖି ଆଗରେ ରଖି ସେ ଏପରି କହିଛନ୍ତି । ଏ କ୍ଷେତ୍ରରେ ଜଣେ ‘ଭେରିଆଣ୍ଟ୍’ ଦ୍ବାରା ଆକ୍ରାନ୍ତ ହୋଇପାରେ । ତେଣୁ ନିର୍ଦ୍ଧାରିତ ବ୍ୟବଧାନ ଅନୁସାରେ ଟିକା ନିଅନ୍ତୁ ।
ସୂଚନାଯୋଗ୍ୟ, ଗତ ମାସରେ ଭାରତ ସରକାର ୬ ରୁ ୮ ସପ୍ତାହ ଥିବା ‘କୋଭିସିଲ୍ଡ୍’ ଟିକା ଡୋଜ୍ ମଧ୍ୟସ୍ଥ ବ୍ୟବଧାନକୁ ୧୨ ରୁ ୧୬ ସପ୍ତାହକୁ ବୃଦ୍ଧି କରିଥିଲେ । ଏହାଦ୍ବାରା ଟିକାର ଫଳପ୍ରଦତା ବୃଦ୍ଧି ପାଇବ ବୋଲି କୁହାଯାଇଥିଲା । କିନ୍ତୁ, ଟିକା ଅଭାବ ଯୋଗୁଁ ଏଭଳି ନିଷ୍ପତ୍ତି ଗ୍ରହଣ କରାଯାଇଥିବା ଅଭିଯୋଗ ହୋଇଥିଲା । ସେ ସମୟରେ ଡାକ୍ତର ଫାଉଚି କହିଥିଲେ, ଟିକାର ଦୁଇଟି ଡୋଜ୍ ମଧ୍ୟରେ ବ୍ୟବଧାନ ବୃଦ୍ଧି ଯୁକ୍ତିଯୁକ୍ତ ।
କିନ୍ତୁ, ଶୁକ୍ରବାର ଦିନ ସେ ଗୁରୁତ୍ବାରୋପ କରି କହିଛନ୍ତି ଯେ, ଭୂତାଣୁ ସଂକ୍ରମଣ ବେଗକୁ ଅତିକ୍ରମ କରିବା ଲାଗି ଯେତେ ଶୀଘ୍ର ସମ୍ଭବ ଲୋକମାନଙ୍କୁ ଟିକା ଦିଆଯିବା ଉଚିତ। ବିଶେଷକରି ଅଧିକ ସଂକ୍ରମଣଶୀଳ ‘ଡେଲ୍ଟା ଭେରିଆଣ୍ଟ୍’ ପାଇଁ ଏହା ଜରୁରୀ।
