ଇଂଲଣ୍ଡ ବିପକ୍ଷରେ ଆଜିଠୁ ଆରମ୍ଭ ହେବ ଟି-୨୦ ସିରିଜ: ଦେଖନ୍ତୁ ପ୍ଲେଇଙ୍ଗ ୧୧
ନୂଆଦିଲ୍ଲୀ: ଆଜିଠୁ ଇଂଲଣ୍ଡ ବିପକ୍ଷରେ ଭାରତର ଟି-୨୦ ସିରିଜ ଆରମ୍ଭ ହେବାକୁ ଯାଉଛି । କୋଭିଡ ଆକ୍ରାନ୍ତ ପରେ ସୁସ୍ଥ ହୋଇ ଟିମକୁ କମବ୍ୟାକ କରିବାକୁ ଯାଉଛନ୍ତି ଅଧିନାୟକ ରୋହିତ ଶର୍ମା । ସେ ଦଳରେ ଉପସ୍ତିତ ରହିବା ଅର୍ଥ ନେତୃତ୍ୱ ନେବା ସହ ପାଳି ମଧ୍ୟ ଆରମ୍ଭ କରିବେ ରୋହିତ । ତେବେ ଏଠି ପ୍ରଶ୍ନ ଉଠୁଛି ତାଙ୍କ ସହ ଓପନିଙ୍ଗ କରିବ କିଏ? ଋତୁରାଜ ଗାଏକ୍ୱାଡ ଏବଂ ଇଶାନ କିଶାନଙ୍କ ଭଳି ଦମଦାର ଓପନରଙ୍କୁ ଟିମ ଇଣ୍ଡିଆ ଇଂଲଣ୍ଡ ସିରିଜରେ ଚୟନ କରିଛି । ତେବେ ଆସନ୍ତୁ ଦେଖିବା ଆଜି ମ୍ୟାଚରେ କ’ଣ ରହିପାରେ ଟିମ ଇଣ୍ଡିଆର ପ୍ଲେଇଙ୍ଗ ଇଲେଭେନ ।
ଅନେକ ଯୁବ ଖେଳାଳି ଦଳ ପାଇଁ ଦମଦାର ପ୍ରଦର୍ଶନ ଦେଇ ଏହି ସିରିଜ ପାଇଁ ସ୍ତାନ ପାଇଛନ୍ତି । ତେଣୁ ଆଜି କେଉଁମାନଙ୍କୁ ଦଳରେ ସ୍ଥାନ ଦେବେ ସେଥିପାଇଁ ରୋହିତଙ୍କୁ ଖୁବ ଚିନ୍ତା କରିବାକୁ ପଡିପାରେ । ଇଶାନ କିଶାନ ଗତ କିଛି ମ୍ୟାଚରେ ଜବରଦସ୍ତ ପ୍ରଦର୍ଶନ କରି ଏହି ସ୍ଥାନ ପାଇଁ ନିଜକୁ ପ୍ରମାଣିତ କରି ସାରିଛନ୍ତି । ସେହିପରି ଚେନ୍ନାଇ ସୁପର କିଙ୍ଗସର ଷ୍ଟାର ଓପନର ଋତୁରାଜ ଗାଏକ୍ୱାଡ ମଧ୍ୟ ଜଣେ ସୁନ୍ଦର ବିକଳ୍ପ ଭାବରେ ରୋହିତଙ୍କ ନିକଟରେ ରହିଛନ୍ତି । ଅଳ୍ପ ସୁଯୋଗ ପାଇଥିବା ଏପର୍ଯ୍ୟନ୍ତ ଭାରତ ପାଇଁ ସେତେ ଭଲ ପ୍ରଦର୍ଶନ କରି ପାରି ନାହାନ୍ତି ।
ତେବେ ଏହି ଦୁଇ ନିୟମିତ ଓପନରଙ୍କ ବ୍ୟତୀତ ସଞ୍ଜୁ ସାମସନ ମଧ୍ୟ ଜଣେ ବିକଳ୍ପ ହୋଇ ପାରନ୍ତି । ଆୟରଲାଣ୍ଡ ବିପକ୍ଷ ଦ୍ୱିତୀୟ ମ୍ୟାଚରେ ସେ ଓପନିଂ କରିଥିଲେ । ତେବେ ଏହି ମ୍ୟାଚରେ ୪୨ ବଲରୁ ବିସ୍ପୋରକ ୭୭ ରନର ପାଳି ଖେଳିଥିଲେ ସଞ୍ଜୁ । ତେବେ ସମସ୍ତଙ୍କ ନଜର ଏବେ ରହିଛି ଦୀପକ ହୁଡ୍ଡାଙ୍କ ଉପରେ । ଆୟରଲାଣ୍ଡ ବିପକ୍ଷରେ ପ୍ରଥମ ମ୍ୟାଚରେ ଓପନିଂ କରି ୪୭ ରନ କରିଥିବା ବେଳେ ଦ୍ୱିତୀୟ ମ୍ୟାଚରେ ୩ ନମ୍ବରରେ ଆସି ଏକ ଜବରଦସ୍ତ ଶତକ ହାସଲ କରିଥିଲେ ଦୀପକ । ତେବେ ତାଙ୍କୁ ମଧ୍ୟ ରୋହିତଙ୍କ ସହ ଓପନିଙ୍ଗ କରିବାର ସୁଯୋଗ ମିଳିପାରେ ବୋଲି ଆଶା କରାଯାଉଛି ।
ଏମାନଙ୍କ ବ୍ୟତୀତ ଏହି ସିରିଜରେ ଷ୍ଟାର ଦ୍ରୁତ ବୋଲର ଉମରାନ ମଲିକଙ୍କ ଖେଳିବା ଏକପ୍ରକାର ସୁନିଶ୍ଚିତ ହୋଇଛି । ସେ ଟିମ ମ୍ୟାନେଜମେଣ୍ଟ କରୁଥିବା ରଣନୀତିର ଜଣେ ଅଂଶ ହୋଇ ପାରନ୍ତି ବୋଲି କହିଛନ୍ତି ଅଧିନାୟକ ରୋହିତ ଶର୍ମା । ତେବେ ତାଙ୍କ ବ୍ୟତୀତ ଭୁବନେଶ୍ୱର କୁମାର, ଆବେଶ ଖାନଙ୍କ ଉପରେ ଦଳର ବୋଲିଂ ବିଭାଗ ନିର୍ଭର କରିବ ।
ଭାରତର ସମ୍ଭାବ୍ୟ ପ୍ଲେଇଂ ୧୧:
ରୋହିତ ଶର୍ମା(ଅଧିନାୟକ), ଇଶାନ କିଶାନ, ସୂର୍ଯ୍ୟକୁମାର ଯାଦବ, ସଞ୍ଜୁ ସାମସନ, ଦୀପକ ହୁଡ୍ଡା, ହାର୍ଦ୍ଦିକ ପାଣ୍ଡ୍ୟା, ଦିନେଶ କାର୍ତ୍ତିକ(ୱିକେଟ କିପର), ଭୁବନେଶ୍ୱର କୁମାର, ଆବେଶ ଖାନ, ଉମରାନ ମଲିକ, ୟୁଜବେନ୍ଦ୍ର ଚହଲ
ଇଂଲଣ୍ଡ ସମ୍ଭାବ୍ୟ ପ୍ଲେଇଂ ୧୧:
ଜୋସ ବଟଲର(ଅଧିନାୟକ/ୱିକେଟ କିପର), ଜାସନ ରୟ, ଡାଭିଡ ମଲାନ, ମୋଇନ ଅଲୀ, ଲିୟାମ ଲିଭିଙ୍ଗଷ୍ଟୋନ, ହେରି ବ୍ରୁକ, ସାମ କରନ, କ୍ରିସ ଜୋର୍ଡାନ, ଟାଇମଲ ମିଲ୍ସ, ରୀସ ଟୋପଲେ, ମ୍ୟାଟ ପାର୍କିନ୍ସନ