ଇଡିର ଖୁଲାସା, ଟ୍ୟାକ୍ସ ବଞ୍ଚାଇବାକୁ ବିଦେଶକୁ ଟଙ୍କା ପଠାଇଦେଇଛି ଭିଭୋ
ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗୁରୁବାର ଏକ ଆଶ୍ଚର୍ଯ୍ୟଜନକ ଖୁଲାସା କରିବା ସହ କହିଛି ଯେ ଚୀନ ସ୍ମାର୍ଟଫୋନ୍ କମ୍ପାନୀ ଭିଭୋ ଟ୍ୟାକ୍ସ ବଞ୍ଚାଇବା ପାଇଁ ୬୨,୪୭୬ କୋଟି ଟଙ୍କା ଚୀନକୁ ପଠାଇଦେଇଛି । ଇଡି କହିଛି ଯେ ଏଠାରେ ଟ୍ୟାକ୍ସ ଦେବାରୁ ବଞ୍ଚିବା ପାଇଁ ନିଜ କାରବାରର ପ୍ରାୟ ୫୦ ପ୍ରତିଶତ ଅର୍ଥାତ୍ ୬୨,୪୭୬ କୋଟି ଟଙ୍କା ବିଦେଶକୁ ପଠାଇଦେଇଛି କମ୍ପାନୀ । ଇଡି କହିଛି ଯେ ଟ୍ୟାକ୍ସ ବଞ୍ଚାଇବା ପାଇଁ ରାଜସ୍ୱର ଏକ ବଡ଼ ଅଂଶ ଚୀନ ସହ ବିଦେଶକୁ ପଠାଇଛି ।
ଇଡି କହିଛି ଯେ ଭିଭୋ ମୋବାଇଲ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଏବଂ ଏହାର ୨୩ ଅନୁବନ୍ଧିତ କମ୍ପାନୀ ବିରୋଧରେ ବୁଧବାର କରାଯାଇଥିବା ସର୍ଚ୍ଚ ଅପରେସନ୍ ପରେ କମ୍ପାନୀର ବ୍ୟାଙ୍କ ଖାତାରେ ଜମା ୪୬୫ କୋଟି ଟଙ୍କା ଜବତ ହୋଇଛି । ଏହା ବ୍ୟତୀତ ୭୩ ଲକ୍ଷ ଟଙ୍କା ନଗଦ ଏବଂ ଦୁଇ କିଲୋଗ୍ରାମ ସୁନା ମଧ୍ୟ ଜବତ ହୋଇଛି । ଇଡି କହିଛି ଯେ ଭିଭୋର ପୂର୍ବ ନିର୍ଦ୍ଦେଶକ ବିନ ଲାଉ ଭାରତରେ ଅନେକ କମ୍ପାନୀ ତିଆରି କରିବା ପରେ ୨୦୧୮ ରେ ଦେଶ ଛାଡ଼ିଥିଲେ । ଆଉ ଏବେ ଏହି କମ୍ପାନୀ ଗୁଡ଼ିକ ଉପରେ ଇଡି ନଜର ରଖିଛି ।
ପ୍ରବର୍ତ୍ତନ ନିର୍ଦ୍ଦେଶାଳୟ ଏହା ମଧ୍ୟ ଅଭିଯୋଗ କରିଛି ଯେ ଭିଭୋ ଇଣ୍ଡିଆ କର୍ମଚାରୀମାନେ ସର୍ଚ୍ଚ ଅପରେସନ୍ ସମୟରେ ସହଯୋଗ କରିନଥିଲେ ଏବଂ ଡିଜିଟାଲ୍ ଉପକରଣରୁ ଲୁଚାଇବାକୁ ଚେଷ୍ଟା କରୁଛନ୍ତି । ତଥାପି, ଏଜେନ୍ସିର ସର୍ଚ୍ଚ ଟିମ୍ ଏହି ଡିଜିଟାଲ୍ ସୂଚନା ପାଇବାରେ ସଫଳ ହୋଇଥିଲେ ।
ସୂଚନାଯୋଗ୍ୟ, ଜୁଲାଇ ୫ ତାରିଖରୁ ଇଡି ଭିଭୋ ଏବଂ ଏହାର ଅନୁବନ୍ଧିତ ୪୪ ଅଫିସ୍ ରେ ଚଢ଼ଉ ଜାରି ରଖିଥିଲା । ମନି ଲଣ୍ଡ୍ରିଂ ଆଇନର ଉଲ୍ଲଘଂନ ନେଇ ଉତ୍ତର ପ୍ରଦେଶ, ବିହାର, ମଧ୍ୟ ପ୍ରଦେଶ ସହିତ ଦକ୍ଷିଣ ଭାରତର ଅନେକ ରାଜ୍ୟରେ ଭିଭୋ ଅଫିସ ଉପରେ ଚଢଉ କରିଥିଲା ଇଡି।