ଏହି ସରକାରୀ ଯୋଜନାରେ ନିବେଶ କରିବାର ସୁବର୍ଣ୍ଣ ସୁଯୋଗ: ୧୧୫ ମାସରେ ଡବଲ ହୋଇଯିବ ଆପଣଙ୍କ ଟଙ୍କା
ନୂଆଦିଲ୍ଲୀ: ଛୋଟ ସଞ୍ଚୟ ଯୋଜନା ଅଧୀନରେ ଆସୁଥିବା କିଷାନ ବିକାଶ ପତ୍ର (KVP) ରେ ନିବେଶର ଏକ ବିକଳ୍ପ ମିଳିବାକୁ ଯାଉଛି । ୨୦୨୩-୨୪ ଆର୍ଥିକ ବର୍ଷର ପ୍ରଥମ ତ୍ରୈମାସିକ ପାଇଁ ସରକାର କିସାନ ବିକାଶ ପତ୍ରର (KVP) ସୁଧ ହାର ଘୋଷଣା କରିଛନ୍ତି। ଅର୍ଥ ମନ୍ତ୍ରଣାଳୟର ସରକାରୀ ବିଜ୍ଞପ୍ତି ଅନୁଯାୟୀ ନୂଆ ହାର ୭.୫% ହେବ ଏବଂ ଆକାଉଣ୍ଟ ବର୍ତ୍ତମାନ ୧୧୫ ମାସରେ ପରିପକ୍ବତା ହେବ।
ଏହାର ଅର୍ଥ ହେଉଛି KVP ଯୋଜନା ଅଧୀନରେ ଜମା ହୋଇଥିବା ଟଙ୍କା ବର୍ତ୍ତମାନ ୧୧୫ ମାସରେ ନିଜକୁ ଦ୍ୱିଗୁଣିତ କରିବ। କିସାନ ବିକାଶ ପତ୍ର (KVP) ପୂର୍ବ ହାର ୭.୨% ଥିଲା। କେଭିପି ସହିତ ସରକାର ସିନିୟର ସିଟିଜେନ୍ ସେଭିଂ ସ୍କିମ୍ (SCSS), ସୁକନ୍ୟା ସମୃଦ୍ଧି ଯୋଜନା ଡାକଘର FD, ଡାକଘର ମାସିକ ଆୟ ଯୋଜନା ଏବଂ ଡାକଘର ସ୍ଥିର ଜମା ପରି ସୁଧ ହାରରେ ସଂଶୋଧନ କରିଛନ୍ତି। ପବ୍ଲିକ୍ ପ୍ରୋଭିଡେଣ୍ଟ୍ ପାଣ୍ଠି (PPF) ର ସୁଧ ହାରରେ କୌଣସି ପରିବର୍ତ୍ତନ ହୋଇନାହିଁ।
ସରକାର ତ୍ରୈମାସିକରେ ବିଭିନ୍ନ କ୍ଷୁଦ୍ର ସଞ୍ଚୟ ଯୋଜନା ପାଇଁ ସୁଧ ହାରକୁ ସଂଶୋଧନ କରନ୍ତି। ସୁଧ ହାରର ପରବର୍ତ୍ତୀ ସଂଶୋଧନ ଆସନ୍ତା ଜୁନ୍ ୩୦ ସୁଦ୍ଧା ହେବ। ଯେଉଁଠାରେ, KVP ଖାତା ସଂଖ୍ୟା ଉପରେ କୌଣସି ସୀମା ନାହିଁ। ସେହିପରି ଡାକଘର ଯୋଜନା ଅଧୀନରେ ଆପଣ ଯେକୌଣସି ସଂଖ୍ୟକ KVP ଖାତା ଖୋଲିପାରିବେ। ଏହି ସ୍କିମ୍ ଅଧୀନରେ ଆପଣ ସର୍ବନିମ୍ନ ୧୦୦୦ ଟଙ୍କା ଜମା କରିପାରିବେ। ବିନିଯୋଗର କୌଣସି ଉପର ସୀମା ନାହିଁ।
ଜମା ତାରିଖରୁ ଦୁଇ ବର୍ଷ ଛଅ ମାସ ପରେ କେଭିପି ଆକାଉଣ୍ଟ ବନ୍ଦ ହୋଇପାରିବ। ୧୦ ବର୍ଷରୁ ଅଧିକ ପିଲାମାନେ ନିଜ ନାମରେ KVP ଖାତା ଖୋଲିପାରିବେ। ପ୍ରକାଶ ଥାଉକି ନିକଟରେ ଏହି ଯୋଜନାରେ ନିବେଶ କରୁଥିବା ଲୋକଙ୍କ ପାଇଁ ସରକାର ନିୟମରେ ପରିବର୍ତ୍ତନ କରିଛନ୍ତି। ସରକାରଙ୍କ ଦ୍ୱାରା ପରିଚାଳିତ ଏହି ସମସ୍ତ ଯୋଜନାରେ ନିବେଶକମାନଙ୍କ ପାଇଁ ପାନ୍ ଏବଂ ଆଧାର କାର୍ଡ଼ ଲିଙ୍କ କରାଯାଇଛି।
