ଓଡ଼ିଶା ଟ୍ରେନ୍ ଦୁର୍ଘଟଣା ଉପରେ ଗୌତମ ଅଦାନୀଙ୍କ ବଡ଼ ଘୋଷଣା: ମୃତକଙ୍କ ଛୁଆମାନଙ୍କର ଉଠାଇବେ ପାଠପଢ଼ା ଖର୍ଚ୍ଚ
ନୂଆଦିଲ୍ଲୀ: ବାଲେଶ୍ୱରରେ ହୋଇଥିବା ଭୟଙ୍କର ଟ୍ରେନ୍ ଦୁର୍ଘଟଣାରେ ନିଜ ପିତା-ମାତାଙ୍କୁ ହରାଇଥିବା ପିଲାମାନଙ୍କୁ ମାଗଣା ସ୍କୁଲ ଶିକ୍ଷା ଦେବାକୁ ନେଇ ବଡ଼ ଘୋଷଣା କରିଛନ୍ତି ଗୌତମ ଅଦାନୀ । ସେ ଟ୍ୱିଟ୍ କରି କହିଛନ୍ତି ଯେ, ଦୁର୍ଘଟଣାରେ ମା’, ବାପାଙ୍କୁ ହରାଇଥିବା ପିଲାମାନଙ୍କ ଶିକ୍ଷାର ଦାୟିତ୍ୱ ଅଦାନୀ ଗ୍ରୁପ୍ ଗ୍ରହଣ କରିବ ।
ତେବେ ଓଡ଼ିଶା ଟ୍ରେନ୍ ଦୁର୍ଘଟଣାରେ ପ୍ରାୟ ୨୭୫ ଜଣ ଯାତ୍ରୀ ପ୍ରାଣ ହରାଇଛନ୍ତି । ୯୦୦ରୁ ଅଧିକ ଆହତ ହୋଇଛନ୍ତି । ଏଥିରେ ଶିଶୁ, ବୃଦ୍ଧଙ୍କ ସମେତ ଅନେକ ଲୋକ ଅଛନ୍ତି । ଏହି ରେଳ ଦୁର୍ଘଟଣା ସମଗ୍ର ଦେଶକୁ ଥରାଇ ଦେଇଛି । ଏହାରି ଭିତରେ ଗୌତମ ଅଦାନୀଙ୍କର ଏହି ଘୋଷଣା ମୃତକଙ୍କ ପିଲାମାନଙ୍କ ପାଇଁ ସାମାନ୍ୟ ଆଶ୍ୱସ୍ତି ଆଣିଦେଇଛି ।
ଅରବପତି ବିଜନେସମ୍ୟାନ ଗୌତମ ଅଦାନୀ ରବିବାର ଟ୍ୱିଟ୍ କରି କହିଛନ୍ତି, ଓଡିଶାରେ ହୋଇଥିବା ଟ୍ରେନ୍ ଦୁର୍ଘଟଣାକୁ ନେଇ ସେ ଅତ୍ୟନ୍ତ ଦୁଃଖି ଅଛନ୍ତି । ଲୋକଙ୍କ ଦୁଃଖକୁ କିଛି ମାତ୍ରାରେ ଲାଘବ କରିବା ପାଇଁ ଅଦାନୀ ଗ୍ରୁପ୍ ଦୁର୍ଘଟଣାରେ ମା’, ବାପାଙ୍କୁ ହରାଇଥିବା ପିଲାମାନଙ୍କର ପାଠପଢ଼ା ଦାୟିତ୍ୱ ଗ୍ରହଣ କରିବ ବୋଲି ନିଷ୍ପତ୍ତି ନେଇଛି । ଅଦାନୀ ଆହୁରି କହିଛନ୍ତି କି, ପୀଡ଼ିତ ଓ ସେମାନଙ୍କ ପରିବାରକୁ ସାହସ ଦେବା ଏବଂ ପିଲାମାନଙ୍କ ଭବିଷ୍ୟତ କିପରି ଭଲ ହେବ, ତାହା ଆମ ସମସ୍ତଙ୍କର ଦାୟିତ୍ୱ ।
उड़ीसा की रेल दुर्घटना से हम सभी बेहद व्यथित हैं।
हमने फैसला लिया है कि जिन मासूमों ने इस हादसे में अपने अभिभावकों को खोया है उनकी स्कूली शिक्षा की जिम्मेदारी अडाणी समूह उठाएगा।
पीड़ितों एवं उनके परिजनों को संबल और बच्चों को बेहतर कल मिले यह हम सभी की संयुक्त जिम्मेदारी है।
— Gautam Adani (@gautam_adani) June 4, 2023
ସୂଚନା ମୁତାବକ, ବାଲେଶ୍ୱର ବାହାନଗା ରେଳ ଦୁର୍ଘଟଣା ପରେ ଶହ ଶହ ମୃତ ଦେହ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି । ଆଜି ସକାଳୁ ସକାଳୁ ଭୁବନେଶ୍ୱରର ବିଭିନ୍ନ ହସ୍ପିଟାଲକୁ ୧୬୦ ମୃତଦେହ ଅଣାଯାଇଛି । ବାଲେଶ୍ୱର, କଟକ, ଭୁବନେଶ୍ୱରର ଅନେକ ମେଡିକାଲରେ ମୃତ ଦେହକୁ ରଖାଯାଇଥିବାରୁ ମୃତ ଦେହକୁ ଚିହ୍ନଟ ପାଇଁ ସମସ୍ୟା ସୃଷ୍ଟି ହେଉଛି । ସମ୍ପର୍କୀୟମାନେ ତାଙ୍କ ଲୋକଙ୍କୁ ଖୋଜି ପାଉନାହାନ୍ତି । ଯାହାକୁ ଦୃଷ୍ଟିରେ ରଖି ବଡ ପଦକ୍ଷେପ ନେଇଛି ବିଏମସି ।
