ଆଦିପୁରୁଷ ଉପରେ ବଡ଼ କାର୍ଯ୍ୟାନୁଷ୍ଠାନ ନେଇପାରନ୍ତି ସରକାର, ଅନୁରାଗ ଠାକୁର କହିଲେ-ଧାର୍ମିକ ଭାବନାକୁ ଆଘାତ ପହଞ୍ଚାଇବାକୁ ଦିଆଯିବା ନାହିଁ

ନୂଆଦିଲ୍ଲୀ: ରିଲିଜ ପରଠୁ ବିବାଦରେ ରହିଛି ସୁପରଷ୍ଟାର ପ୍ରଭାସଙ୍କ ର୍ଚ୍ଚିତ ଫିଲ୍ମ ‘ଆଦିପୁରୁଷ’। ଓମ ରାଉତ ନିର୍ଦେଶନା ଦେଇଥିବା ଏହି ଫିଲ୍ମ ଟିଜର ରିଲିଜ ହେବା ପରଠୁ ହିଁ ବିବାଦ ଘେରକୁ ଆସିଥିଲା। ଏବେ ସିନେମାଘରକୁ ଆସିବା ପରେ ଫିଲ୍ମରେ ରାମାୟଣର ଚିତ୍ରଣ ଏବଂ ଏହାର ଡାଏଲଗକୁ ନେଇ ବିବାଦ ଦେଖାଦେଇଛି। କୁହାଯାଉଛି ଯେ ଏହି ଚଳଚ୍ଚିତ୍ରରେ ରାମାୟଣର ଚରିତ୍ରମାନଙ୍କୁ ଅସମ୍ମାନ କରାଯାଇଛି ଏବଂ ଧାର୍ମିକ ଭାବନାରେ ଆଘାତ ଲାଗିଛି। ଏଭଳି ପରିସ୍ଥିତିରେ ସରକାର ମଧ୍ୟ ଏହି ପ୍ରସଙ୍ଗରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ନେଇଛନ୍ତି।

‘ଆଦିପୁରୁଷ’ କୁ ନେଇ ଚାଲିଥିବା ବିବାଦ ମଧ୍ୟରେ ସୂଚନା ତଥା ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଛନ୍ତି ଯେ ଲୋକଙ୍କ ଧାର୍ମିକ ଭାବନାକୁ ଆଘାତ କରିବାର ଅଧିକାର କାହାକୁ ଦିଆଯାଇପାରିବ ନାହିଁ । ସେଣ୍ଟ୍ରାଲ୍ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନ୍ (ସିବିଏଫସି) କୁ ଏହା ଉପରେ ନିଷ୍ପତ୍ତି ନେବାକୁ ପଡିବ । ସେ ଏହା ମଧ୍ୟ କହିଛନ୍ତି ଯେ ନିର୍ମାତା ଫିଲ୍ମର ସଂଳାପ ପରିବର୍ତ୍ତନ କରିବାକୁ ପ୍ରସ୍ତୁତ ବୋଲି ମୁଁ ରିପୋର୍ଟ ପାଇଛି । ଅନୁରାଗ ଠାକୁର ଏହା ମଧ୍ୟ କହିଛନ୍ତି ଯେ ସେ ମଧ୍ୟ ଏହାର ଯତ୍ନ ନେବେ । ଧାର୍ମିକ ଭାବନା ଆଘାତ ପାଇବ ନାହିଁ, ଅନ୍ତତଃ ପକ୍ଷେ ତାଙ୍କ ଅଧୀନରେ ନୁହେଁ ।

ସେହିଭଳି ଫିଲ୍ମ ନିର୍ମାତାଙ୍କ ଦ୍ୱାରା ଜାରି କରାଯାଇଥିବା ବୟାନ ଅନୁଯାୟୀ ଆଦିପୁରୁଷ ଭାରତ ସମେତ ବିଦେଶରେ ମଧ୍ୟ ଭଲ ବ୍ୟବସାୟ କରୁଛି ଏବଂ ଫିଲ୍ମ ଦର୍ଶକମାନଙ୍କ ମନକୁ ମଧ୍ୟ ଛୁଇଁଛି। ତେବେ ଫିଲ୍ମର କେତେକ ଡାଏଲଗକୁ ନେଇ ବିବାଦ ଦେଖା ଦେଇଥିବାରୁ ଏହାକୁ ପରିବର୍ତ୍ତନ କରିବାକୁ ନିର୍ମାତା ନିଷ୍ପତି ନେଇଛନ୍ତି।