କଶ୍ମୀର ଠାରୁ କେରଳ ପର୍ଯ୍ୟନ୍ତ ରହିଥିବା ସ୍ଥିତି କାରଣରୁ ଉପନିବେଶ ଯୁଗର ଦେଶଦ୍ରୋହ ଆଇନକୁ ବଜାୟ ରଖିବା ନିହାତି ଆବଶ୍ୟକ ହୋଇଯାଇଛି: ଆଇନ ପ୍ୟାନେଲ ମୁଖ୍ୟ

ନୂଆଦିଲ୍ଲୀ: ଦେଶଦ୍ରୋହ ଆଇନକୁ ବଜାୟ ରଖିବା ପାଇଁ ପ୍ୟାନେଲ ପକ୍ଷରୁ କରାଯାଇଥିବା ସୁପାରିଶକୁ ରକ୍ଷା କରି ଆଇନ କମିଶନ ଅଧ୍ୟକ୍ଷ ଜଷ୍ଟିସ ଋତୁ ରାଜ ଆୱସ୍ତି ନିଜର ମନ୍ତବ୍ୟ ପ୍ରଦାନ କରିଛନ୍ତି । ଜଷ୍ଟିସ ଆୱସ୍ତି କହିଛନ୍ତି, ଆଇନର ଅପବ୍ୟବହାରକୁ ରୋକିବା ପାଇଁ ଅନେକ ସୁରକ୍ଷା ପ୍ରସ୍ତାବ ଦିଆଯାଇଛି ।

ଶ୍ରୀ ଆୱସ୍ତି କହିଛନ୍ତି, କଶ୍ମୀରଠାରୁ ଆରମ୍ଭ କରି କେରଳ ପର୍ଯ୍ୟନ୍ତ ଓ ପଞ୍ଜାବ ଠାରୁ ଆରମ୍ଭ କରି ଉତ୍ତର-ପୂର୍ବ ପର୍ଯ୍ୟନ୍ତ ଦେଶର ଅନେକ ସ୍ଥାନରେ ଏଭିଳି ସ୍ଥିତି ଦେଖିବାକୁ ମିଳୁଛି । ତେଣୁ ‘ଭାରତର ସୁରକ୍ଷା ଓ ଅଖଣ୍ଡତା’କୁ ରକ୍ଷା କରିବା ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ଉପକରଣ ଅଟେ । ଦେଶଦ୍ରୋହ ଆଇନ ଉପନିବେଶର ଉତ୍ତରାଧିକାରୀ ହୋଇଥିବା କାରଣରୁ ଏହାକୁ ରଦ୍ଦ କରାଯିବା ବୈଧ ହେବନି । ଆମେରିକା, କାନାଡ଼ା, ଅଷ୍ଟ୍ରେଲିଆ, ଜର୍ମାନୀ ପରି ବହୁ ଦେଶରେ ଏନେଇ ନିଜସ୍ୱ ଆଇନ ରହିଛି ।

ଗତବର୍ଷ ମେ ମାସରେ ସୁପ୍ରିମକୋର୍ଟ ପ୍ରଦାନ କରିଥିବା ନିର୍ଦ୍ଦେଶ ମୁତାବକ, ଏହି ଆଇନକୁ ବଜାୟ ରଖିବା ପାଇଁ ପ୍ୟାନେଲର ସୁପାରିଶ ରକ୍ଷା କରି ଶ୍ରୀ ଆୱସ୍ତି କହିଛନ୍ତି, ଏହି ଆଇନର ଅପବ୍ୟବହାରକୁ ରୋକିବା ପାଇଁ ପର୍ଯ୍ୟାପ୍ତ ମାତ୍ରାରେ ସୁରକ୍ଷା ପ୍ରସ୍ତାବ ଦିଆଯାଇଛି । ଏକ ସାକ୍ଷାତକାର ଅବସରରେ ସେ ପିଟିଆଇକୁ କହିଛନ୍ତି, ବେଆଇନ କାର୍ଯ୍ୟକଳାପ (ପ୍ରତିରୋଧ) ଆକ୍ଟ ଓ ଜାତୀୟ ସୁରକ୍ଷା ଆକ୍ଟ ବିଭିନ୍ନ କ୍ଷେତ୍ରରେ କାର୍ଯ୍ୟ କରିଥାଏ । ଏହା ଦେଶଦ୍ରୋହ ଅପରାଧକୁ କଭର କରେ ନାହିଁ । ତେଣୁ ସେ କ୍ଷେତ୍ରରେ ଦେଶଦ୍ରୋହ ଆଇନର ଏକ ନିର୍ଦ୍ଦିଷ୍ଟ ଆଇନ ରହିବାର ଆବଶ୍ୟକତା ରହିଥିଲା । କଶ୍ମୀରରୁ କେରଳ ଓ ପଞ୍ଜାବରୁ ଉତ୍ତର-ପୂର୍ବ ପର୍ଯ୍ୟନ୍ତ ପରିସ୍ଥିତି ଏପରି ହୋଇଛି ଯେ ଭାରତର ଏକତା ଓ ଅଖଣ୍ଡତା ପାଇଁ ଦେଶଦ୍ରୋହ ଆଇନ ନିହାତି ଆବଶ୍ୟକ ।