ଦୀପାବଳି ପାଇଁ ଦୀପ ଲଗାଇ ଶୋଇଥିଲେ, ନିଆଁ ଲାଗି ଜୀବନ୍ତ ଦଗ୍ଧ ହେଲେ ଦମ୍ପତି

ନୂଆଦିଲ୍ଲୀ: ଭାବିଥିଲେ ଠାକୁରଙ୍କ ପାଖେ ଦୀପ ଜାଳି ଦୀପାବଳି ପାଳନ କରିବେ । ହେଲେ ସୁଖର ପର୍ବ ଭିତରେ ଘୋଟି ଆସିଲି ଦୁଃଖ । ସେହି ଦୀପ ନିଆଁରେ ହିଁ ଜୀବନ୍ତ ଦଗ୍ଧ ହୋଇଗଲା ପୁରା ପରିବାର । ଦମ୍ପତିଙ୍କ ସହିତ ଘରୋଇ ସହାୟିକାଙ୍କର ମୃତ୍ୟୁ ହୋଇଛି । ଉତ୍ତରପ୍ରଦେଶ କାନପୁରରୁ ସାମ୍ନାକୁ ଆସିଛି ଏହି ଦୁଃଖଦ ଘଟଣା ।

ସୂଚନା ଅନୁସାରେ, ଦୀପାବଳି ପାଇଁ ଘରେ ଦୀପ ଲଗାଇଥିଲେ । ତେବେ ରାତିରେ ଶୋଇଥିବା ସମୟରେ ନିଆଁ ପ୍ରଥମେ ଏକ ସ୍କ୍ରିନରେ ଲାଗି ଚାରିଆଡେ ବ୍ୟାପିଯାଇଥିଲା । ଫଳରେ ପୁରା ଘର ଧୂଆଁମୟ ହୋଇଯାଇଥିଲା । ତେବେ ନିଆଁ ଧୂଆଁ ଏତେ ଭୟଙ୍କର ରହିଥିଲା ଯେ, କେହି ମଧ୍ୟ ଘରୁ ବାହାରିପାରିନଥିଲେ । ଦମ୍ପତିଙ୍କ ସହିତ ଘରୋଇ ସହାୟିକାଙ୍କର ମୃତ୍ୟୁ ହୋଇଥିବା ବେଳେ ପୋଷା ବିଲେଇର ମଧ୍ୟ ପ୍ରାଣ ଚାଲିଯାଇଥିବା ଜଣାପଡିଛି । ତେବେ ମୃତକ ହେଲେ ବିସ୍କେଟ କାରୋବାରୀ ଶ୍ୟାମ ଦସାନୀ, ପତ୍ନୀ କନିକା ଦଶାନୀ ଏବଂ ଘରୋଇ ସହାୟିକା ଛବି । ଦୀପାବଳିରେ 3ଜଣଙ୍କ ମୃତ୍ୟୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ବିଳମ୍ବିତ ରାତିରେ ଖବର ପାଇଁ ପୋଲିସ ଏବଂ ଅଗ୍ନିଶମ ବାହୀନି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । 3ଜଣଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ ହେଁ ସେତେବେଳକୁ ସମସ୍ତଙ୍କର ଜୀବନ ଚାଲିଯାଇଥିଲା । ତେବେ ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି ।