ମେଁ ୧ରୁ ସାରା ଦେଶରେ ବନ୍ଦ ହୋଇଯିବ FASTag ସିଷ୍ଟମ

ନୂଆଦିଲ୍ଲୀ: ଆସନ୍ତା ମାସ ମେଁ ୧ ତାରିଖରୁ ସାରା ଦେଶରେ ରାଜପଥରେ ଟୋଲ୍ ଆଦାୟ ପଦ୍ଧତିରେ ବଡ଼ ପରିବର୍ତ୍ତନ ହେବାକୁ ଯାଉଛି। ଭାରତ ସରକାର ମେଁ ମାସ ଆରମ୍ଭରୁ FASTag ସିଷ୍ଟମକୁ ବନ୍ଦ କରିବାକୁ ଯାଉଛନ୍ତି ଏବଂ GNSS ଆଧାରିତ ଟୋଲ୍ ସିଷ୍ଟମ ପ୍ରଚଳନ କରିବାକୁ ଯାଉଛନ୍ତି।

ଏହି ନୂଆ ବ୍ୟବସ୍ଥାରେ, ଯାନବାହନରୁ ଟୋଲ୍ ଆଦାୟ ସାଟେଲାଇଟ୍ ମାଧ୍ୟମରେ ସ୍ଥିର କରାଯିବ, ଏବଂ  ଯାତ୍ରା କରାଯାଇଥିବା ଦୂରତା ଉପରେ ଆଧାର କରି ଫି ଆଦାୟ କରାଯିବ।

କେନ୍ଦ୍ର ସରକାର ଏକ ନୂତନ GPS-ଆଧାରିତ ଟୋଲ୍ ଆଦାୟ ବ୍ୟବସ୍ଥା ପ୍ରଚଳନ କରିବାକୁ ଯାଉଥିବାରୁ, ୧ ମେ, ୨୦୨୫ ଠାରୁ ରାସ୍ତାରେ ଯାତ୍ରା ଆହୁରି ସୁଗମ ହୋଇଯିବ।

ଏହି ଦିଗରେ, ଭାରତୀୟ ଜାତୀୟ ରାଜପଥ ପ୍ରାଧିକରଣ (NHAI) FASTag ସିଷ୍ଟମକୁ ସମ୍ପୂର୍ଣ୍ଣ ଭାବରେ ବନ୍ଦ କରି ଏହି ନୂତନତମ ସାଟେଲାଇଟ୍-ଆଧାରିତ ପ୍ରଯୁକ୍ତିବିଦ୍ୟା ଗ୍ରହଣ କରିବାକୁ ପ୍ରସ୍ତୁତ ହେଉଛି।

ଏହି ନୂତନ ବ୍ୟବସ୍ଥା ଅନୁଯାୟୀ, ଯାନବାହନଗୁଡ଼ିକ ଅତିକ୍ରମ କରିଥିବା ଦୂରତା ଆଧାରରେ ଟୋଲ୍ ଗଣନା କରାଯିବ। ଏହି GPS-ଆଧାରିତ ଟୋଲ୍ ସଂଗ୍ରହ ବ୍ୟବସ୍ଥା କ’ଣ ଏବଂ ଏହା କିପରି କାମ କରିବ, ଆସନ୍ତୁ ଆମେ ବିସ୍ତାରିତ ଭାବରେ ଜାଣିବା।

ଦେଶରେ ଟୋଲ୍ ଆଦାୟ ପାଇଁ ବ୍ୟବହୃତ ଫାଷ୍ଟାଗ୍ ସିଷ୍ଟମ୍ ଖୁବ୍ ଶୀଘ୍ର ଗ୍ଲୋବାଲ୍ ନାଭିଗେସନ୍ ସାଟେଲାଇଟ୍ ସିଷ୍ଟମ୍ (GNSS) ଦ୍ୱାରା ବଦଳାଯିବ। ନିକଟରେ, କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀ ନାଗପୁରରେ ଘୋଷଣା କରିଥିଲେ ଯେ ଏପ୍ରିଲ ଶେଷ ସୁଦ୍ଧା ନୂତନ GNSS ଆଧାରିତ ଟୋଲ୍ ବ୍ୟବସ୍ଥା ଆରମ୍ଭ ହେବ।

ପୂର୍ବରୁ ଏହି ବ୍ୟବସ୍ଥା ୧ ଏପ୍ରିଲରୁ କାର୍ଯ୍ୟକାରୀ ହେବାର ଆଶା କରାଯାଉଥିଲା, କିନ୍ତୁ କିଛି ବିଳମ୍ବ ପରେ, ଏବେ ଏହା ଆଗାମୀ ୧୫ ଦିନ ମଧ୍ୟରେ ସାରା ଦେଶରେ ସମ୍ପୂର୍ଣ୍ଣ କାର୍ଯ୍ୟକାରୀ ହେବ।

GNSS ଆଧାରିତ ଟୋଲ୍ ସିଷ୍ଟମ୍ କିପରି କାମ କରିବ: RFID ପ୍ରଯୁକ୍ତିବିଦ୍ୟା ସହିତ FASTag ପରି, GNSS (ଗ୍ଲୋବାଲ୍ ନାଭିଗେସନ୍ ସାଟେଲାଇଟ୍ ସିଷ୍ଟମ୍) ଆଧାରିତ ଟୋଲ୍ ସିଷ୍ଟମ୍ ମଧ୍ୟ ପ୍ରଚଳନ କରାଯାଉଛି।

କିନ୍ତୁ ଏଥିରେ ଗାଡ଼ିର ୱିଣ୍ଡସିଲ୍ଡରେ ଟ୍ୟାଗ୍ ଲଗାଇବାର ଆବଶ୍ୟକତା ରହିବ ନାହିଁ। ଏହି ନୂତନ ସିଷ୍ଟମରେ, ଯାନଗୁଡ଼ିକରେ ଏକ ଅନ୍-ବୋର୍ଡ ୟୁନିଟ୍ (OBU) କିମ୍ବା ଟ୍ରାକର ସ୍ଥାପନ କରାଯିବ, ଯାହା ସାଟେଲାଇଟ୍ ମାଧ୍ୟମରେ ସେମାନଙ୍କର ଗତିବିଧି ଉପରେ ନଜର ରଖିବ।

ରାଜପଥରେ ଗାଡ଼ି କେତେ ଦୂର ଅତିକ୍ରମ କରିବ ତାହା ଉପରେ ଟୋଲ୍ ପରିମାଣ ନିର୍ଣ୍ଣୟ କରାଯିବ ଏବଂ ଲିଙ୍କ୍ ହୋଇଥିବା ଡିଜିଟାଲ୍ ୱାଲେଟ୍ ରୁ ସ୍ୱୟଂଚାଳିତ ଭାବରେ କଟିଯିବ। ଏହି ଆଧୁନିକ ଟୋଲ୍ ସିଷ୍ଟମ ପ୍ରିପେଡ୍ ଏବଂ ପୋଷ୍ଟପେଡ୍ ଉଭୟ ବିକଳ୍ପକୁ ସମର୍ଥନ କରିବ।

FASTag ବ୍ୟବହାରକାରୀଙ୍କୁ କରିବାକୁ ପଡିବ ଏହି କାମ: ଯାନବାହନ ମାଲିକମାନେ ସେମାନଙ୍କର ପୂର୍ବରୁ ଥିବା FASTag ୩୦ ଏପ୍ରିଲ, ୨୦୨୫ ପର୍ଯ୍ୟନ୍ତ ବ୍ୟବହାର କରିପାରିବେ। ମେଁ ୧ରୁ ସମସ୍ତ ଯାନରେ ସରକାରଙ୍କ ଦ୍ୱାରା ଅନୁମୋଦିତ GPS ଡିଭାଇସ୍ ଲଗାଇବା ବାଧ୍ୟତାମୂଳକ ହେବ।

ନୂତନ ବ୍ୟବସ୍ଥା ଅନୁଯାୟୀ, ଯାନବାହନ ମାଲିକମାନଙ୍କୁ ସେମାନଙ୍କର ବ୍ୟାଙ୍କ ଆକାଉଣ୍ଟକୁ GPS ଟୋଲ୍ ସିଷ୍ଟମ ସହିତ ଲିଙ୍କ୍ କରିବାକୁ ପଡିବ। ସମ୍ପୂର୍ଣ୍ଣ ପ୍ରକ୍ରିୟା ସଫଳ ହେବା ପରେ, ପୁରୁଣା FASTag ଷ୍ଟିକରକୁ ବାହାର କରାଯାଇପାରିବ।

GNSSରୁ ଅନେକ ଲାଭ ମିଳିବ: ନୂତନ GNSS (ଗ୍ଲୋବାଲ୍ ନାଭିଗେସନ୍ ସାଟେଲାଇଟ୍ ସିଷ୍ଟମ୍) ଆଧାରିତ ଟୋଲ୍ ସିଷ୍ଟମ୍ ରାଜପଥରେ ଯାତ୍ରା କରୁଥିବା ଯାତ୍ରୀମାନଙ୍କୁ ଅନେକ ସୁବିଧା ପ୍ରଦାନ କରିବ।

ଏହି ପ୍ରଯୁକ୍ତିବିଦ୍ୟା ମାଧ୍ୟମରେ, ଏବେ ଟୋଲ୍ ପ୍ଲାଜାରେ ଅଟକିବାର ଆବଶ୍ୟକତା ରହିବ ନାହିଁ, ଯାହା ଅପେକ୍ଷା ସମୟ ବଞ୍ଚାଇବ ଏବଂ ଯାତ୍ରାକୁ ଅଧିକ ସୁବିଧାଜନକ କରିବ। ଆପଣ ଯେତେ ଅଧିକ ଯାତ୍ରା କରିବେ, ଆପଣଙ୍କୁ ସେତେ ଅଧିକ ଟୋଲ୍ ଦେବାକୁ ପଡିବ।

ଏହି ବ୍ୟବସ୍ଥା କାର୍ଯ୍ୟକାରୀ ହେବା ସହିତ, ମାନୁଆଲ୍ ତ୍ରୁଟିର ସମ୍ଭାବନା ହ୍ରାସ ପାଇବ ଏବଂ ଠକେଇ ଘଟଣା ମଧ୍ୟ ହ୍ରାସ ପାଇବ।