EPFO ସଦସ୍ୟମାନେ ଖୁବ୍ଶୀଘ୍ର ପାଇବେ ଖୁସି ଖବର ! ମିନିମମ ପେନସନ ହୋଇଯିବ ୭୫୦୦ ଟଙ୍କା
ନୂଆଦିଲ୍ଲୀ : କର୍ମଚାରୀ ଭବିଷ୍ୟ ନିଧି ସଂଗଠନ (ଇପିଏଫ୍ଓ) ଅଧୀନରେ ଥିବା କୋଟି କୋଟି ପେନସନଭୋଗୀଙ୍କ ପାଇଁ ଖୁସି ଖବର। ସରକାର କର୍ମଚାରୀ ପେନସନ ଯୋଜନା (ଇପିଏସ୍-୯୫) ଅଧୀନରେ ନ୍ୟୁନତମ ମାସିକ ପେନସନକୁ ବର୍ତ୍ତମାନର ୧୦୦୦ ଟଙ୍କାରୁ ୭୫୦୦ ଟଙ୍କାକୁ ବୃଦ୍ଧି କରିବା ପାଇଁ ବିଚାର କରୁଛନ୍ତି। ଏହି ପ୍ରସ୍ତାବ ସଂସଦୀୟ କମିଟି ଓ ପେନ୍ସନଭୋଗୀ ସଂଘର ଦୀର୍ଘ ଦିନର ଦାବି ପରେ ଆସିଛି। ଏହା ୨୦୨୫ ବଜେଟ୍ରେ ଘୋଷଣା ହେବାର ସମ୍ଭାବନା ରହିଛି।
୨୦୧୪ ମସିହାରେ କେନ୍ଦ୍ର ସରକାର ଇପିଏସ୍-୯୫ ଅଧୀନରେ ନ୍ୟୁନତମ ପେନସନକୁ ୧୦୦୦ ଟଙ୍କାରେ ସ୍ଥିର କରିଥିଲେ। କିନ୍ତୁ ମୁଦ୍ରାସ୍ଫୀତି, ଚିକିତ୍ସା ଖର୍ଚ୍ଚ ଓ ଜୀବନଯାପନ ଖର୍ଚ୍ଚ ବୃଦ୍ଧି ଯୋଗୁଁ ଏହି ରାଶି ଅପର୍ଯ୍ୟାପ୍ତ ବୋଲି ପେନ୍ସନଭୋଗୀମାନେ ଅଭିଯୋଗ କରିଆସୁଛନ୍ତି। ଇପିଏସ୍-୯୫ ଜାତୀୟ ଆନ୍ଦୋଳନ କମିଟି ଓ ଟ୍ରେଡ୍ ୟୁନିୟନ୍ଗୁଡ଼ିକ ନ୍ୟୁନତମ ପେନସନକୁ ୭୫୦୦ ଟଙ୍କା ଏବଂ ମୁଦ୍ରାସ୍ଫୀତି ଅନୁଯାୟୀ ମହଙ୍ଗା ଭତ୍ତା (ଡିଏ) ଯୋଗ କରିବାକୁ ଦାବି କରିଛନ୍ତି। ୧୦ ଜାନୁଆରୀ ୨୦୨୫ରେ ଏକ ପେନସନଭୋଗୀ ପ୍ରତିନିଧି ଦଳ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଭେଟି ଏହି ଦାବି ରଖିଥିଲେ, ଯେଉଁଠାରେ ମନ୍ତ୍ରୀ ଏହାକୁ ସହାନୁଭୂତି ସହ ବିଚାର କରିବାକୁ ପ୍ରତିଶ୍ରୁତି ଦେଇଥିଲେ।
କେତେ ଲୋକ ଉପକୃତ ହେବେ?
ଇପିଏଫ୍ଓର ପ୍ରାୟ ୭୮ ଲକ୍ଷ ପେନ୍ସନଭୋଗୀ ଏବଂ ୭.୫ କୋଟି ସକ୍ରିୟ ସଦସ୍ୟ ଏହି ପେନସନ ବୃଦ୍ଧିରୁ ଉପକୃତ ହେବେ ବୋଲି ଆଶା କରାଯାଉଛି। ଏହା ବିଶେଷ କରି ସେହି ବୃଦ୍ଧ ପେନସନଭୋଗୀଙ୍କ ପାଇଁ ଆର୍ଥିକ ସ୍ଥିରତା ଆଣିବ, ଯେଉଁମାନେ ଏହି ପେନସନ ଉପରେ ନିର୍ଭର କରନ୍ତି। ଏହାଛଡ଼ା, ବିଧବା, ଅକ୍ଷମ ବ୍ୟକ୍ତି ଓ ପେନସନଭୋଗୀଙ୍କ ପରିବାର ମଧ୍ୟ ଏହାର ଲାଭ ପାଇବେ।
କିପରି କାର୍ଯ୍ୟ କରେ ଇପିଏସ୍-୯୫?
ଇପିଏସ୍-୯୫ ଅନୁଯାୟୀ, କର୍ମଚାରୀ ଓ ନିଯୁକ୍ତିଦାତା ପ୍ରତ୍ୟେକେ ମୂଳ ଦରମାର ୧୨% ଇପିଏଫ୍ ପାଇଁ ଯୋଗଦାନ କରନ୍ତି। ନିଯୁକ୍ତିଦାତାଙ୍କ ଯୋଗଦାନରୁ ୮.୩୩% ଇପିଏସ୍ ପାଇଁ ଏବଂ ୩.୬୭% ଇପିଏଫ୍ ପାଇଁ ଯାଇଥାଏ। ଏହି ଯୋଗଦାନ ସର୍ବାଧିକ ୧୫,୦୦୦ ଟଙ୍କା ମାସିକ ଦରମା ଉପରେ ଆଧାରିତ। ଅବସର ପରେ ପେନସନ ପାଇବା ପାଇଁ ଅତି କମରେ ୧୦ ବର୍ଷର ସେବା ଆବଶ୍ୟକ।
ପେନସନଭୋଗୀଙ୍କ ପାଇଁ ପରାମର୍ଶ
ପେନସନଭୋଗୀମାନଙ୍କୁ ସେମାନଙ୍କର ଆଧାର, ବ୍ୟାଙ୍କ ବିବରଣୀ ଓ ଇପିଏଫ୍ଓ ରେକର୍ଡକୁ ଅଦ୍ୟତନ ରଖିବାକୁ ପରାମର୍ଶ ଦିଆଯାଇଛି, ଯାହା ଦ୍ୱାରା ପେନସନ ବୃଦ୍ଧି ଲାଗୁ ହେବା ପରେ ବିଳମ୍ବ କିମ୍ବା ଅସୁବିଧା ଏଡ଼ାଯାଇପାରିବ। ଇପିଏଫ୍ଓର ଅଫିସିଆଲ୍ ୱେବସାଇଟ୍ କିମ୍ବା ନିକଟସ୍ଥ ଇପିଏଫ୍ଓ ଅଫିସ୍ ମାଧ୍ୟମରେ ପେନସନ ସ୍ଥିତି ଯାଞ୍ଚ କରାଯାଇପାରିବ।