ପହଲଗାମ ଆକ୍ରମଣ ଘଟଣା ପରେ ପ୍ରଥମଥର ପ୍ରଧାନମନ୍ତ୍ରୀଙ୍କୁ ଭେଟିଲେ ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ, କହିଲେ ମୋ’ ରାଜନୀତି ଏତେ…

ନୂଆଦିଲ୍ଲୀ,୩ା୫: ପହଲଗାମ ଆତଙ୍କବାଦୀ ଆକ୍ରମଣ ପରେ ପ୍ରଥମ ଥର ପାଇଁ ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଛନ୍ତି। ଏହି ବୈଠକ ପ୍ରଧାନମନ୍ତ୍ରୀଙ୍କ ବାସଭବନରେ ହୋଇଥିଲା। ବୈଠକ ପ୍ରାୟ ଅଧ ଘଣ୍ଟା ଧରି ଚାଲିଥିଲା। ସୂତ୍ର ଅନୁଯାୟୀ, ଆକ୍ରମଣ ପରେ ସୃଷ୍ଟି ହେଉଥିବା ପରିସ୍ଥିତି ଉପରେ ଦୁଇ ନେତା ଆଲୋଚନା କରିଥିଲେ।

ସୂତ୍ର ଅନୁସାରେ, ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ପ୍ରଧାନମନ୍ତ୍ରୀଙ୍କ ସହିତ ସିନ୍ଧୁ ଜଳ ଚୁକ୍ତିନାମା ସ୍ଥଗିତ ରଖିବା ଏବଂ ଏହାର ପ୍ରଭାବ ବିଷୟରେ ମଧ୍ୟ ଆଲୋଚନା କରିଛନ୍ତି, ଯାହା ଜମ୍ମୁ-କାଶ୍ମୀର ଉପରେ ସର୍ବାଧିକ ପ୍ରଭାବ ପକାଇବ। ଏହି ଆତଙ୍କବାଦୀ ଆକ୍ରମଣ ପରେ ଓମାର ଅବଦୁଲ୍ଲା ଦୃଢ଼ତାର ସହ କହିଛନ୍ତି, ତାଙ୍କର ରାଜନୀତି ଏତେ ଛୋଟ ନୁହେଁ ଯେ, ସେ ଏହି ଦୁଃଖଦ ସମୟରେ ତାଙ୍କ ସରକାରଠାରୁ ପୂର୍ଣ୍ଣ ରାଜ୍ୟ ମାନ୍ୟତା ଦାବି କରିବେ।

ଜମ୍ମୁ ଓ କାଶ୍ମୀର ବିଧାନସଭାର ସ୍ୱତନ୍ତ୍ର ଅଧିବେଶନ ସମୟରେ ସେ କହିଥିଲେ, “ଜମ୍ମୁ ଓ କାଶ୍ମୀର ବର୍ତ୍ତମାନ ନିର୍ବାଚିତ ସରକାରଙ୍କ ଦାୟିତ୍ୱ ନୁହେଁ କିନ୍ତୁ ମୁଁ ଏହି ସୁଯୋଗକୁ ରାଜ୍ୟ ମାନ୍ୟତା ଦାବି ପାଇଁ ବ୍ୟବହାର କରିବାକୁ ଚାହୁଁନାହିଁ। ମୁଁ ପହଲଗାମ ଦୁର୍ଘଟଣାକୁ କେନ୍ଦ୍ରଠାରୁ ରାଜ୍ୟ ମାନ୍ୟତା ଦାବି ପାଇଁ କିପରି ବ୍ୟବହାର କରିପାରିବି? ମୋର ରାଜନୀତି କ’ଣ ଏତେ ଶସ୍ତା? ମୁଁ କ’ଣ ଏହି ୨୬ ଜଣଙ୍କ ଜୀବନକୁ ଏତେ କମ୍ ଗୁରୁତ୍ୱ ଦେଉଛି? ଆମେ ଅତୀତରେ ରାଜ୍ୟ ମାନ୍ୟତା ବିଷୟରେ କଥା ହୋଇଛୁ ଏବଂ ଭବିଷ୍ୟତରେ ମଧ୍ୟ ଏହା କରିବୁ କିନ୍ତୁ ଯଦି ମୁଁ କେନ୍ଦ୍ରକୁ ଯାଇ ଏହା ମାଗିବି, ତେବେ ଏହା ମୋ ପାଇଁ ଲଜ୍ଜାର ବିଷୟ ହେବ। ଏହି ସମୟରେ କୌଣସି ରାଜନୀତି ନାହିଁ, କୌଣସି ବ୍ୟବସାୟ ନାହିଁ, କୌଣସି ରାଜ୍ୟ ମାନ୍ୟତା ନାହିଁ। ଏହି ଆକ୍ରମଣକୁ କେବଳ କଠୋର ନିନ୍ଦା କରିବା ଏବଂ ପୀଡିତମାନଙ୍କୁ ହୃଦୟର ସମର୍ଥନ ଜଣାଇବାର ସମୟ।”

ତାଙ୍କ ଭାଷଣରେ ଓମାର ଅବଦୁଲ୍ଲା କହିଥିଲେ, ଦେଶର ପ୍ରତ୍ୟେକ ଅଂଶ, ଉତ୍ତରରୁ ଦକ୍ଷିଣ ଏବଂ ପୂର୍ବରୁ ପଶ୍ଚିମ ପର୍ଯ୍ୟନ୍ତ, ଏହି ଘୃଣ୍ୟ ଆକ୍ରମଣର କବଳରେ ଅଛି। ଏପ୍ରିଲ ୨୨ରେ ପହଲଗାମର ବୈସାରଣ ଗ୍ରାଉଣ୍ଡରେ ଆତଙ୍କବାଦୀମାନେ ୨୫ ଜଣ ପର୍ଯ୍ୟଟକ ଏବଂ ଜଣେ କାଶ୍ମୀର ଘୋଡାଚାଳକଙ୍କୁ ନିର୍ମମ ଭାବରେ ହତ୍ୟା କରିଥିଲେ। ଏହି ଆକ୍ରମଣ ଜମ୍ମୁ-କାଶ୍ମୀର ଏବଂ ସମଗ୍ର ଦେଶକୁ ମର୍ମାହତ କରିଛି।