‘ନିଜ ଭୁଲ୍ ପାଇଁ ଡ୍ରାଇଭରର ମୃତ୍ୟୁ ହେଲେ, ବୀମା କମ୍ପାନୀ ବଧ୍ୟ ନୁହେଁ ଅନୁକମ୍ପା ରାଶି ଦେବାକୁ’: ସୁପ୍ରିମକୋର୍ଟ

ନୂଆଦିଲ୍ଲୀ: ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଶୁଣାଣି କରିଛନ୍ତି। ଯଦି କୌଣସି ଡ୍ରାଇଭର ଦାୟିତ୍ୱହୀନ ହୋଇ ଦ୍ରୁତଗତିରେ ବା ଭୁଲ ଭାବେ ଗାଡ଼ି ଚଳାଇ ମୃତ୍ୟୁବରଣ କରୁଛି ତେବେ ତାଙ୍କ ପରିବାରକୁ ଅନୁକମ୍ପା ରାଶି ଦେବା ଲାଗି ବୀମା କମ୍ପାନୀଗୁଡ଼ିକ ବାଧ୍ୟ ନୁହଁନ୍ତି।

ଏହି ନିଷ୍ପତ୍ତିକୁ ଦ୍ରୁତଗତିରେ ଗାଡ଼ି ଚଳାଉଥିବା ଏବଂ ଷ୍ଟଣ୍ଟ ପ୍ରଦର୍ଶନ କରି ଲୋକଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରୁଥିବା ଲୋକଙ୍କ ପାଇଁ ଏକ କଠୋର ବାର୍ତ୍ତା ବୋଲି କୁହାଯାଉଛି।

ଏକ ମାମଲାରେ, ବିଚାରପତି ପି.ଏସ୍. ନରସିଂହ ଏବଂ ଆର. ମହାଦେବନଙ୍କ ଖଣ୍ଡପୀଠ ମୃତକଙ୍କ ପତ୍ନୀ, ପୁଅ ଏବଂ ପିତାମାତାଙ୍କ କ୍ଷତିପୂରଣ ଦାବିକୁ ଖାରଜ କରିଦେଇଛନ୍ତି।

ଦୁର୍ଘଟଣାଟି ୧୮ ଜୁନ୍ ୨୦୧୪ରେ ଘଟିଥିଲା: କୋର୍ଟ ଜଣେ ବ୍ୟକ୍ତିଙ୍କ ସହ ଜଡିତ ଏକ ମାମଲାରେ ଏହି ନିଷ୍ପତ୍ତି ଦେଇଛନ୍ତି। ଏହି ବ୍ୟକ୍ତି ଦ୍ରୁତ ଗତିରେ ଏବଂ ଅସାବଧାନତାରେ ଗାଡ଼ି ଚଲାଇବା ସମୟରେ ଦୁର୍ଘଟଣାର ଶିକାର ହୋଇଥିଲେ।

ଏହି ଦୁର୍ଘଟଣା ୧୮ ଜୁନ୍ ୨୦୧୪ରେ ଘଟିଥିଲା, ଯେତେବେଳେ ଏନ.ଏସ. ରବିଶ କର୍ଣ୍ଣାଟକର ମଲ୍ଲାସାନ୍ଦ୍ରା ଗ୍ରାମରୁ ଆର୍ସିକେର ସହରକୁ ତାଙ୍କ କାରରେ ଯାତ୍ରା କରୁଥିଲେ। ତାଙ୍କ ବାପା, ଭଉଣୀ ଏବଂ ଭଉଣୀଙ୍କ ପିଲାମାନେ ତାଙ୍କ ସହିତ ଯାତ୍ରା କରୁଥିଲେ।

ରବିଶ ଦ୍ରୁତ ଗତିରେ ଏବଂ ଅସାବଧାନତାରେ ଗାଡ଼ି ଚଲାଇଥିଲେ ଏବଂ ଟ୍ରାଫିକ୍ ନିୟମ ଉଲ୍ଲଂଘନ କରିଥିଲେ। ମାଇଲାନାହାଲ୍ଲି ଗେଟ୍ ନିକଟରେ ସେ କାର ଉପରୁ ନିୟନ୍ତ୍ରଣ ହରାଇଥିଲେ, ଯାହା ଫଳରେ କାରଟି ଓଲଟି ପଡ଼ିଥିଲା। ଏହି ଦୁର୍ଘଟଣାରେ ରବିଶଙ୍କର ମୃତ୍ୟୁ ହୋଇଥିଲା।

ପରିବାର ପକ୍ଷରୁ 80 ଲକ୍ଷ ଟଙ୍କା କ୍ଷତିପୂରଣ ଦାବି କରାଯାଇଥିଲା: ରବିଶଙ୍କ ପରିବାର ୟୁନାଇଟେଡ୍ ଇଣ୍ଡିଆ ଇନସୁରାନ୍ସ କମ୍ପାନୀ ଠାରୁ 80 ଲକ୍ଷ ଟଙ୍କା କ୍ଷତିପୂରଣ ଦାବି କରିଥିଲେ। ପରିବାର ପକ୍ଷରୁ ଦାବି କରାଯାଇଥିଲା ଯେ, ରବିଶ ଠିକାଦାର ଭାବରେ ପ୍ରତି ମାସରେ 3 ଲକ୍ଷ ଟଙ୍କା ରୋଜଗାର କରୁଥିଲେ।

କିନ୍ତୁ ପୋଲିସ ଚାର୍ଜସିଟରେ ସ୍ପଷ୍ଟ ଭାବରେ ଉଲ୍ଲେଖ ଥିଲା ଯେ, ରବିଶଙ୍କ ଅବହେଳା ଏବଂ ଦ୍ରୁତ ଗତି ଯୋଗୁଁ ଦୁର୍ଘଟଣା ଘଟିଥିଲା। ମୋଟର ଦୁର୍ଘଟଣା ଟ୍ରିବ୍ୟୁନାଲ ପରିବାରର ଦାବିକୁ ଖାରଜ କରିଦେଇଥିଲେ।

କର୍ଣ୍ଣାଟକ ହାଇକୋର୍ଟ ମଧ୍ୟ 23 ନଭେମ୍ବର 2024 ରେ ପରିବାରର ଆବେଦନକୁ ଖାରଜ କରି କହିଥିଲେ ଯେ, ଯେତେବେଳେ ଦୁର୍ଘଟଣା ମୃତକଙ୍କ ନିଜ ଦୋଷ ଯୋଗୁଁ ଘଟେ, ପରିବାର ବୀମା କ୍ଷତିପୂରଣ ମାଗିପାରିବେ ନାହିଁ।

‘ବୀମା କମ୍ପାନୀ କ୍ଷତିପୂରଣ ଦେବାକୁ ବାଧ୍ୟ ନୁହେଁ’: ହାଇକୋର୍ଟ କହିଛନ୍ତି ଯେ, ପରିବାରକୁ ପ୍ରମାଣ କରିବାକୁ ପଡିବ ଯେ; ଦୁର୍ଘଟଣା ମୃତକଙ୍କ ଦୋଷ ଯୋଗୁଁ ହୋଇନାହିଁ ଏବଂ ଏହା ବୀମା ପଲିସିର ପରିସର ମଧ୍ୟରେ ଥିଲା।

ସୁପ୍ରିମକୋର୍ଟ ହାଇକୋର୍ଟଙ୍କର ଏହି ନିଷ୍ପତ୍ତିକୁ ସମର୍ଥନ କରିଛନ୍ତି ଏବଂ ପରିବାରର ଆବେଦନକୁ ଖାରଜ କରିଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ, ଯଦି ମୃତ୍ୟୁ ଡ୍ରାଇଭରଙ୍କ ନିଜ ଦୋଷ ଯୋଗୁଁ ହୋଇଥାଏ ଏବଂ ଏଥିରେ କୌଣସି ବାହ୍ୟ କାରଣ ଜଡିତ ନାହିଁ, ତେବେ ବୀମା କମ୍ପାନୀ କ୍ଷତିପୂରଣ ଦେବାକୁ ବାଧ୍ୟ ନୁହେଁ।

ସଡ଼କ ସୁରକ୍ଷାକୁ ପ୍ରୋତ୍ସାହିତ କରିବା ଏବଂ ଅସାବଧାନତାବଶତଃ ଗାଡ଼ି ଚଲାଉଥିବା ଲୋକଙ୍କୁ ଶିକ୍ଷା ଦେବା ଦୃଷ୍ଟିରୁ ଏହି ନିଷ୍ପତ୍ତିକୁ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।