ମର୍ମନ୍ତୁଦ ଦୁର୍ଘଟଣା: ଡମ୍ପର ସହ ପିଟି ହୋଇ କାରରେ ଲାଗିଲା ନିଆଁ, ୮ଜଣ ଜୀବନ୍ତ ଦଗ୍ଧ
ବରେଲି: ଶନିବାର ବିଳମ୍ବିତ ରାତିରେ ଉତ୍ତରପ୍ରଦେଶର ବରେଲିରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଯେଉଁଥିରେ ଏକ କାରରେ ଯାତ୍ରା କରୁଥିବା ୮ ଜଣ ଜୀବନ୍ତ ଦଗ୍ଧ ହୋଇଛନ୍ତି। ମିଳିଥିବା ସୂଚନା ଅନୁଯାୟୀ, ଶନିବାର ରାତି ୧୧ଟା ସମୟରେ ବରେଲି-ନୈନିତାଲ ରାଜପଥରେ ମାରୁତି ଏର୍ଟିଗା କାରର ଟାୟାର ଫାଟି ଯାଇଥିଲା ଏବଂ ଏହା ଅନ୍ୟ ପାର୍ଶ୍ୱ ଡିଭାଇଡର୍ ପାର ହୋଇ ଏକ ଡମ୍ପର ସହିତ ମୁହାଁମୁହିଁ ଧକ୍କା ହୋଇଥିଲା। ଏହି ଦୁର୍ଘଟଣା ପରେ କାରଟି ଲକ ହୋଇଯାଇଥିଲା ଯେଉଁଥିରେ ଜଣେ ଶିଶୁ ସମେତ ୮ ଜଣ ପୋଡି ପାଉଁଶ ହୋଇଯାଇଛନ୍ତି।
ଘଟଣା ସମ୍ପର୍କରେ ସୂଚନା ପାଇବା ପରେ ଏସଏସପି ବରେଲି, ଆଇଜି ବରେଲି ରେଞ୍ଜ ଡକ୍ଟର ରାକେଶ କୁମାରଙ୍କ ସମେତ ଅନେକ ପୋଲିସ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ବହୁ ଉଦ୍ୟମ ପରେ ଅଗ୍ନିଶମ ବାହିନୀ ଦଳ ନିଆଁକୁ ନିୟନ୍ତ୍ରଣକୁ ଆଣିଥିଲେ। ସମସ୍ତ ମୃତଦେହକୁ ବାହାର କରି ପୋଷ୍ଟମର୍ଟମ ପାଇଁ ପଠାଯାଇଥିବାବେଳେ ପୋଲିସ ୩ ଟି ମୃତଦେହ ଚିହ୍ନଟ କରିଛି।
