ବିହାର ଟ୍ରେନ୍ ଦୁର୍ଘଟଣା: ଆଜି ମଧ୍ୟ ଅନେକ ଟ୍ରେନ୍ ବାତିଲ୍,ଅନେକ ଟ୍ରେନର ମାର୍ଗ ପରିବର୍ତ୍ତନ
ନୂଆଦିଲ୍ଲୀ: ବୁଧବାର ରାତିରେ ବିହାରର ବକ୍ସାରରେ ଘଟିଥିବା ଟ୍ରେନ୍ ଦୁର୍ଘଟଣା ଏବେ ମଧ୍ୟ ରେଳ ଚଳା ଚଳକୁ ପ୍ରଭାବିତ କରିଛି । ଦୁର୍ଘଟଣା ଯୋଗୁ ଗୁରୁବାର ମଧ୍ୟ ଅନେକ ଟ୍ରେନ୍ ବାତିଲ କରାଯାଇଥିଲା। ଆଜି ଶୁକ୍ରବାର ଦିନ ମଧ୍ୟ ଅନେକ ଟ୍ରେନ୍ ବାତିଲ କରାଯାଇଛି। ଏହା ସହିତ ଅନେକ ଟ୍ରେନରେ ରୁଟ ପରିବର୍ତ୍ତନ କରାଯାଇଛି |ଏହି ଭୟଙ୍କର ଟ୍ରେନ୍ ଦୁର୍ଘଟଣାରେ ୪ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଥିଲେ। ଏହି ଦୁର୍ଘଟଣା ପରେ ଅନୁସନ୍ଧାନରୁ ଜଣାପଡିଛି ଯେ ଟ୍ରାକରେ କିଛି ତ୍ରୁଟି ହେତୁ ଏହି ଦୁର୍ଘଟଣା ଘଟିଥିଲା ।
ପ୍ରାଥମିକ ଅନୁସନ୍ଧାନ ରିପୋର୍ଟ ଅନୁଯାୟୀ ଏହି ଦୁର୍ଘଟଣା ଯୋଗୁଁ ହୋଇଥିବା କ୍ଷତି ୫୨ କୋଟିରୁ ଅଧିକ ହେବ ବୋଲି ଆକଳନ କରାଯାଇଛି। ବୁଧବାର ରାତିରେ ଘଟିଥିବା ଦୁର୍ଘଟଣାରେ ଲୋକୋ ପାଇଲଟ୍ (ଡ୍ରାଇଭର) ଆଂଶିକ ଆହତ ହୋଇଥିଲେ ଏବଂ ତାଙ୍କ ସହାୟକ ଗୁରୁତର ଆହତ ହୋଇଥିଲେ। ଏହି ରିପୋର୍ଟରେ ଲୋକୋ ପାଇଲଟଙ୍କ ଏକ ବିବୃତ୍ତି ମଧ୍ୟ ରହିଛି ଯେଉଁଥିରେ ଦର୍ଶାଯାଇଛି ଯେ ଟ୍ରେନ୍ ୧୨୮ କିଲୋମିଟର ବେଗରେ ରଘୁନାଥପୁର ଷ୍ଟେସନ ଦେଇ ଯାଇଥିଲା, କିନ୍ତୁ ଷ୍ଟେସନ ଅତିକ୍ରମ କରିବା ପରେ ଏହା ପଛପଟୁ ଏକ ତୀବ୍ର ଆଘାତ ପାଇଥିଲା।
ଲୋକୋ ପାଇଲଟଙ୍କ କହିବା ଅନୁସାରେ ଅତ୍ୟଧିକ କମ୍ପନ ଏବଂ ପ୍ରବଳ ଝଟକା ଯୋଗୁଁ ହଠାତ୍ ବ୍ରେକ୍ ପାଇପ୍ ଚାପ ହ୍ରାସ ପାଇ ରାତି ୯.୫୨ ରେ ଟ୍ରେନ୍ ଖସିପଡିଥିଲା। ଏଥିରେ ରଘୁନାଥପୁର ଷ୍ଟେସନର ଜଣେ ଗେଟମ୍ୟାନ ଏବଂ ପଏଣ୍ଟମ୍ୟାନ କହିଛନ୍ତି ଯେ ସେମାନେ ଟ୍ରେନର ଚକ ନିକଟରୁ ସ୍ପାର୍କ ଆସୁଥିବାର ଦେଖିଥିଲେ । ବୁଧବାର ରାତିରେ ବିହାରର ବକ୍ସାର ଜିଲ୍ଲାର ରଘୁନାଥପୁର ନିକଟରେ ୧୨୫୦୬ ନର୍ଥ ଇଷ୍ଟ ଏକ୍ସପ୍ରେସ ଦୁର୍ଘଟଣାଗ୍ରସ୍ତ ହେବାପରେ ଅତି କମରେ ଚାରି ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଥିଲେ।
