ବଲିଉଡ ଅଭିନେତା ସଞ୍ଜୟ ଦତ୍ତ ଆହତ: ହାତ, ମୁହଁ ଓ କହୁଣୀରେ ଲାଗିଛି ଗଭୀର ଆଘାତ

ନୂଆଦିଲ୍ଲୀ: ବଲିଉଡ ଦୁନିଆରୁ ଏକ ଦୁଃଖ ଖବର ଆସିଛି । ସୁଟିଂ ବେଳେ ଆହତ ହୋଇଛନ୍ତି ମୁନ୍ନାଭାଇ ତଥା ଅଭିନେତା ସଞ୍ଜୟ ଦତ୍ତ । ସଞ୍ଜୟଙ୍କ ମୁହଁ, ହାତ ଓ କହୁଣୀରେ ଗଭୀର ଆଘାତ ଲାଗିଥିବା ଜଣାପଡ଼ିଛି । ବେଙ୍ଗାଲୁରୁରେ ଏକ ଫିଲ୍ମ ଶୁଟିଂ ବେଳେ ସଞ୍ଜୟ ଆହତ ହୋଇଥିଲେ । ତେବେ ସଞ୍ଜୟ ଆହତ ହେବା ପରେ ଉକ୍ତ ଫିଲ୍ମ ଶୁଟିଂକୁ ବନ୍ଦ କରି ଦିଆଯାଇଥିବା ଜଣାପଡ଼ିଛି ।

ସୂଚନା ମୁତାବକ, ଅଭିନେତା ସଞ୍ଜୟ ଆଜି ବେଙ୍ଗାଲୁରୁରେ ତାଙ୍କର କନ୍ନଡ଼ ଫିଲ୍ମ ‘କେଡି- ଦି ଡେଭିଲ’ର ଶୁଟିଂ କରୁଥିଲେ । ତେବେ ଶୁଟିଂ ସମୟରେ ଏକ ବୋମା ବିସ୍ଫୋରଣ ସିନ ସମୟରେ ସେ ଆହତ ହୋଇଥିଲେ । ସଞ୍ଜୟ ଆହତ ହେବା ପରେ ସଙ୍ଗେସଙ୍ଗେ ଶୁଟିଂକୁ ବନ୍ଦ କରି ଦିଆଯାଇଥିଲା । ଏହି ଅଘଟଣରେ ସୁପରଷ୍ଟାର ସଞ୍ଜୟଙ୍କ ଶରୀରର ଏକାଧିକ ସ୍ଥାନରେ ଗଭୀର ଆଘାତ ଲାଗିଛି । ତାଙ୍କର ହାତ, ମୁହଁ ଓ କହୁଣୀରେ ଗଭୀର ଆଘାତ ଲାଗିଥିବା କୁହାଯାଉଛି ।

ଏହି ଫିଲ୍ମରେ ସଞ୍ଜୟଙ୍କ ବ୍ୟତୀତ ଆକ୍ସନ ହିରୋ ଧ୍ରୁବ ଶର୍ଜା ଅଭିନୟ କରୁଛନ୍ତି । ସଞ୍ଜୟ ଏଥିରେ ଜଣେ ଆଣ୍ଟାଗୋନିଷ୍ଟ ଭାବେ ପରଦା ଉପରକୁ ଆସିବେ । କେଜିଏଫ ଫିଲ୍ମରେ ଅଦ୍ଭୂତପୂର୍ବ ସଫଳତା ପରେ ସଞ୍ଜୟ ପୁଣି ଥରେ ଖଳନାୟକ ଭୂମିକାରେ ପରଦାକୁ ଆସୁଛନ୍ତି । ୧୯୭୦ ଦଶକର ବେଙ୍ଗାଲୁରୁର ବାସ୍ତବ ଘଟଣାବଳୀକୁ ନେଇ ଏହି ଫିଲ୍ମ ନିର୍ମାଣ କରାଯାଇଛି । ଏହି ଫିଲ୍ମଟି ହିନ୍ଦି, ତେଲୁଗୁ, ତାମିଲ, ମାଲୟାଲମ ଓ କନ୍ନଡ଼ ଆଦି ଏକାଧିକ ଭାଷାରେ ମୁକ୍ତିଲାଭ କରିବ ।