‘ମୋ ପିଲାମାନଙ୍କୁ ଫେରାଇ ଆଣ ବାବୁ’, ମାଆର ଏହି କଥା ଶୁଣି କାନ୍ଧି ପକାଇଲେ ଅଧିକାରୀ
ପାଟଣା: ବିହାରର ମୁଜାଫରପୁର ଜିଲ୍ଲାରେ ଅଗ୍ନିକାଣ୍ଡ ଘଟଣାରେ ଏକ ପରିବାରର ୧୦ ଜଣ ଆହତ ହୋଇଛନ୍ତି। ଯେଉଁଥିରେ ୪ ଜଣ ଝିଅଙ୍କର ମୃତ୍ୟୁ ହୋଇଥିବା ବେଳେ ୬ ଜଣ ଆହତ ହୋଇଛନ୍ତି, ସେଥିମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ବୋଲି କୁହାଯାଉଛି।
ଆହତଙ୍କ ମଧ୍ୟରେ ପାଞ୍ଚ ଜଣ ଶିଶୁ ମଧ୍ୟ ସାମିଲ ହୋଇଛନ୍ତି। ସ୍ଥାନୀୟ ଲୋକମାନେ କହିଥିଲେ ଯେ, ଯେତେବେଳେ ଏହି ଯନ୍ତ୍ରଣାଦାୟକ ଦୁର୍ଘଟଣା ଘଟିଲା, ସମସ୍ତେ ରାତ୍ରି ଭୋଜନ କରିବା ପରେ ଶୋଇଥିଲେ। ହଠାତ୍ ଘରେ ନିଆଁ ଲାଗିବା କାରଣରୁ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା, ଏହାସହ ପିଲାମାନେ ନିଆଁରେ ଫସିଯାଇ ମୃତ୍ୟୁ ବରଣ କରିଛନ୍ତି। ମାଆକୁ ନିଆଁରୁ ରକ୍ଷା କରିବା ପାଇଁ ୧୭ ବର୍ଷର ଝିଅ ଏବଂ ତାଙ୍କ ତିନି ଭଉଣୀ କୋଠରୀରେ ପ୍ରବେଶ କରିଥିଲେ। ମାଆ ଉଦ୍ଧାର ହୋଇଥିଲେ କିନ୍ତୁ ସେ ନିଜେ ଏହି ଦୁର୍ଘଟଣାର ଶିକାର ହୋଇଥିଲେ।
ମା ଫୁଲୋ ଦେବୀ ନିଜ ଝିଅ ମାନଙ୍କୁ ନିଆଁରେ ହରାଇଥିଲେ, କିନ୍ତୁ ସେ ଦୁର୍ଘଟଣାସ୍ଥଳରୁ ନିଜକୁ ବାହାର କରିବାରେ ଅସମର୍ଥ ଥିଲେ। ଯଦି କେହି ତାଙ୍କୁ ଭେଟିବାକୁ ଯାଉଛନ୍ତି, ତେବେ ସେ ପିଲାମାନଙ୍କୁ ଫେରାଇ ଆଣିବାକୁ ତାଙ୍କ ନିକଟରେ ନିବେଦନ କରୁଛନ୍ତି। ଯେତେବେଳେ ଜୋନାଲ ଅଫିସର ସୁଦର୍ଶନ ଶେଖର ପୀଡ଼ିତାଙ୍କ ପରିବାରକୁ ଭେଟିବାକୁ ପହଞ୍ଚିଲେ, ଫୁଲୋ ଦେବୀ କେବଳ ଗୋଟିଏ ଅନୁରୋଧ କରୁଥିଲେ ଯେ, ‘ପିଲାମାନଙ୍କୁ ଫେରାଇ ଆଣ, ସାର୍’।
ମାଆଙ୍କ କଥା ଶୁଣିବା ପରେ ଜୋନାଲ ଅଫିସରଙ୍କ ଆଖି କୁହରେ ଛଳଛଳ ହୋଇଗଲା। ସ୍ଥାନୀୟ ଲୋକମାନେ କହିଥିଲେ ଯେ, ପ୍ରତିଦିନ ଭଳି ପରିବାର ସଦସ୍ୟମାନେ ଖାଦ୍ୟ ଖାଇବା ପରେ ଅଲଗା ଅଲଗା କୋଠରୀରେ ଶୋଇଥିଲେ। ପରିବାରରେ ୧୧ ଜଣ ପିଲାଙ୍କ ସମେତ ମୋଟ ୧୬ ଜଣ ଥିଲେ। ରାତି ପ୍ରାୟ ୧୧ଟା ସମୟରେ ଅଗ୍ନିକାଣ୍ଡ ଘଟିଥିଲା। ନିଆଁ କିପରି ଆରମ୍ଭ ହେଲା ତାହା ସ୍ପଷ୍ଟ ହୋଇନାହିଁ। ଚାଳ ଛାତ ଥିବାରୁ ସମସ୍ତ ତିନୋଟି କୋଠରୀରେ ନିଆଁ ଲାଗିଯାଇଥିଲା। ଏଥିରେ ସୋନି କୁମାରୀ (୧୭ ବର୍ଷ), ଅମୃତା କୁମାରୀ (୧୨ ବର୍ଷ), କବିତା କୁମାରୀ (୮ ବର୍ଷ) ଏବଂ ଶିବାନୀ କୁମାରୀ (୬ ବର୍ଷ) ଏହି ଦୁର୍ଘଟଣାର ଶିକାର ହୋଇଥିଲେ। ଜିଲ୍ଲା ପ୍ରଶାସନ ଦ୍ୱାରା ମୃତକଙ୍କ ପରିବାରକୁ ୧୬ ଲକ୍ଷ ଟଙ୍କା ଦିଆଯାଇଛି।
