ଦିଲ୍ଲୀ ମହିଳା କମିସନ ଅଧ୍ୟକ୍ଷା ସ୍ୱାତୀଙ୍କୁ କାର ଘୋଷାରି ନେଲା: ଅଭିଯୁକ୍ତ ଗିରଫ
ନୂଆଦିଲ୍ଲୀ: ଗତମାସ ୩୧ ତାରିଖ ବିଳମ୍ବିତ ରାତ୍ରିରେ ଦିଲ୍ଲୀରେ ଜଣେ ଯୁବତୀ ଅଞ୍ଜଳି ସିଂହଙ୍କୁ ଏକ କାର ପାଖାପାଖି ୧୩ କିମି ପର୍ଯ୍ୟନ୍ତ ଘୋଷାରି ନେଇଥିଲା । ତେବେ ଏହା ମଧ୍ୟରେ ସେଭଳି ଏକାଧିକ ଘଟଣା ସାମ୍ନାକୁ ଆସିଛି । ଏହି କ୍ରମରେ ଆଜି ଏକ ବଡ଼ ଦୁର୍ଘଟଣାର ଶିକାର ହୋଇଛନ୍ତି ଦିଲ୍ଲୀ ମହିଳା କମିସନ (ଡିସିଡବ୍ଲ୍ୟୁ) ଅଧ୍ୟକ୍ଷା ସ୍ୱାତୀ ମାଲିୱାଲ । ଏକ କାର ସ୍ୱାତୀଙ୍କୁ ୧୫ ମିଟର ପର୍ଯ୍ୟନ୍ତ ଘୋଷାରି ନେଇଥିବା ଜଣାପଡ଼ିଛି ।
ସୂଚନା ମୁତାବକ, ଗତକାଲି ବିଳମ୍ବିତ ରାତ୍ରିରେ ଦିଲ୍ଲୀ ଏମ୍ସ ନିକଟରେ ସ୍ୱାତୀଙ୍କ ସହ ଏହି ଦୁର୍ଘଟଣା ଘଟିଥିଲା । ନିଶାସକ୍ତ ଅବସ୍ଥାରେ ଥିବା ଜଣେ ବଲେନୋ କାର ଚାଳକ ସ୍ୱାତୀଙ୍କୁ ଗାଡ଼ିରେ ବସିବାକୁ କହିଥିଲେ । ଏପରିକି ଗାଡ଼ି ଚାଳକ ସ୍ୱାତୀଙ୍କ ସହ ଛେଡ଼ଛାଡ଼ କରିଥିଲେ । ମାତ୍ର ସ୍ୱାତୀ ଏନେଇ ବିରୋଧ କରିବାରୁ ଗାଡ଼ି ଚାଳକ ଅଧ୍ୟକ୍ଷାଙ୍କ ହାତକୁ କାର କାଚ ଭିତରେ ବନ୍ଦ କରି ଗାଡ଼ି ଷ୍ଟାର୍ଟ କରିଦେଇଥିଲେ । ଫଳରେ ସ୍ୱାତୀଙ୍କ ହାତ କାର ଭିତରେ ଫସି ରହିଥିବାରୁ ସେ ୧୦-୧୫ ମିଟର ପର୍ଯ୍ୟନ୍ତ ଘୋଷାରି ହୋଇ ଯାଇଥିଲେ । ତେବେ ଈଶ୍ୱରଙ୍କ କୃପାରୁ ତାଙ୍କର ଜୀବନ ବଞ୍ଚିପାରିଥିବା ସ୍ୱାତୀ କହିଛନ୍ତି ।
ବିଳମ୍ବିତ ରାତିରେ ମହିଳା କମିସନ ଅଧ୍ୟକ୍ଷା ଦିଲ୍ଲୀର ସୁରକ୍ଷା ପରିସ୍ଥିତି ବିଷୟରେ ଅନୁଧ୍ୟାନ କରୁଥିଲେ । ମାତ୍ର ଦୁର୍ଭାଗ୍ୟବଶତଃ ତାଙ୍କ ସହ ଏପରି ଘଟିଥିଲା । ତେବେ ଦିଲ୍ଲୀରେ ଯେଉଁଠି ମହିଳା କମିସନ ଅଧ୍ୟକ୍ଷା ସୁରକ୍ଷିତ ନୁହନ୍ତି ସେଠାରେ ପରିସ୍ଥିତି କିପରି ରହିଥିବ ସେନେଇ ସମସ୍ତେ ଭାବିବା ଦରକାର ବୋଲି ସ୍ୱାତୀ ଟ୍ୱିଟ୍ କରିଛନ୍ତି । ବିଳମ୍ବିତ ରାତି ପାଖାପାଖି ୩.୦୫ ସମୟରେ ଏମ୍ସର ଗେଟ୍ ନମ୍ବର-୨ ନିକଟସ୍ଥ ଫୁଟପାଥ ନିକଟରେ ଏହି ଘଟଣା ଘଟିଥିବା ପୋଲିସ ସୂତ୍ରରୁ ଜଣାପଡ଼ିଛି । ତେବେ ଏହି ମାମଲାର ତଦନ୍ତ ଜାରି ରହିଥିବା ବେଳେ ପୋଲିସ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡ଼ିଛି ।
कल देर रात मैं दिल्ली में महिला सुरक्षा के हालात Inspect कर रही थी। एक गाड़ी वाले ने नशे की हालत में मुझसे छेड़छाड़ की और जब मैंने उसे पकड़ा तो गाड़ी के शीशे में मेरा हाथ बंद कर मुझे घसीटा। भगवान ने जान बचाई। यदि दिल्ली में महिला आयोग की अध्यक्ष सुरक्षित नहीं, तो हाल सोच लीजिए।
— Swati Maliwal (@SwatiJaiHind) January 19, 2023
